ہوا کا خوف اندھیرے کا ڈر بھی رہتا ہے

ہوا کا خوف اندھیرے کا ڈر بھی رہتا ہے

چراغ جلتے ہوئے با خبر بھی رہتا ہے

یہ بھول بھال کے رہتا ہوں میں سمندر میں

کہ آس پاس ہی کوئی بھنور بھی رہتا ہے

وہ جس گلی میں مری خاک اڑتی پھرتی ہے

اسی گلی میں کوئی کوزہ گر بھی رہتا ہے

کھلا یہ بھید ہمارے اداس رہنے سے

بجھا بجھا سا چراغ ہنر بھی رہتا ہے

یہی نہیں کہ دھرا ہے ہمارے کاندھوں پر

ی کیسا بوجھ ہے اعصاب پر بھی رہتا ہے

عجیب بات ہے کاشف حسینؔ اس دل میں

کہ دکھ بھی رہتے ہیں اور چارہ گر بھی رہتا ہے