کام کچھ خوبیٔ کردار ہی آ جاتی ہے

کام کچھ خوبیٔ کردار ہی آ جاتی ہے

سر بچانے مرا دستار ہی آ جاتی ہے

لوگ اب دھوپ کی دستک پہ کہاں جاگتے ہیں

صبح اس شہر میں بے کار ہی آ جاتی ہے

میں کبھی رات کا انجام نہیں دیکھ سکا

نیند اس کھیل میں ہر بار ہی آ جاتی ہے

کہیں جانے نہیں دیتی مجھے وحشت میری

مجھ سے ٹکرانے کو دیوار ہی آ جاتی ہے

اتنی آسانی سے مجھ تک نہیں آتا کوئی

ایک بس ساعت دشوار ہی آ جاتی ہے

میں کبھی وقت کے ہم راہ نہیں چل پایا

میرے آڑے مری رفتار ہی آ جاتی ہے