خواب لپٹے ہیں عجب دیدۂ بے دار کے ساتھ

خواب لپٹے ہیں عجب دیدۂ بے دار کے ساتھ

نیند آتی ہے مجھے صبح کے آثار کے ساتھ

تھک گئی گردش ایام بھی چلتے چلتے

اور میں دوڑ رہا ہوں اسی رفتار کے ساتھ

دل کو دنیا سے علاقہ ہے تو بس اتنا ہے

جیسے دیوار اٹھا دے کوئی دیوار کے ساتھ

لطف کچھ اور ہی ہے ایسے اکیلے پن کا

پھر کے دیکھا ہے بہت شہر میں دو چار کے ساتھ

اور ہوں گے جو میاں دل سے پریشاں ہوں گے

میں نے تو عمر گزاری ہے اس آزار کے ساتھ

آپ اس شہر کی تعمیر بہت دیکھ چکے

اب ذرا دیکھیے تعمیر کو معمار کے ساتھ

زندگی ہے کسی عجلت میں لکھا افسانہ

کون انصاف کرے گا مرے کردار کے ساتھ