کوئی بلا ہو در یار تک نہیں آتی

کوئی بلا ہو در یار تک نہیں آتی

کہ دھوپ سایۂ دیوار تک نہیں آتی

نکل پڑا ہے کوئی سر خریدنے کے لئے

کہ جتنے پیسوں میں دستار تک نہیں آتی

ترے بھی دل میں محبت کی آگ روشن ہے

تو آنچ کیوں لب و رخسار تک نہیں آتی

ہنر وری کے کچھ اپنے اصول ہوتے ہیں

یہ روشنی کسی بے کار تک نہیں آتی

عجیب باغ ہے اس باغ سے مہک تو کیا

کسی پرند کی چہکار تک نہیں آتی

میں گھر تک آتے ہوئے روز ٹوٹ جاتا ہوں

یہ وہ خبر ہے جو اخبار تک نہیں آتی