کیوں سر سے پاؤں تک میں اٹا ہوں غبار میں

کیوں سر سے پاؤں تک میں اٹا ہوں غبار میں

گھر میں پڑا ہوں یا میں کسی رہ گزار میں

معلوم کچھ نہیں کہ مجھے دیر کیوں ہوئی

میرے سوا بھی کوئی نہیں تھا قطار میں

یہ عشق ہار جیت سے آگے کی بات ہے

دنیا لگی ہوئی ہے مگر جیت ہار میں

صحرا میں کوئی اور مجھے کام ہی نہیں

وحشت پرو رہا ہوں گریباں کے تار میں

کیا پوچھتے ہو مجھ سے مرے اختیار کی

بس جبر رہ گیا ہے مرے اختیار میں

غائرؔ جو اپنے آپ سے ملنے کا وقت ہے

وہ صرف ہو رہا ہے غم روزگار میں