مری طرح کوئی برباد ہونے والا نہیں

مری طرح کوئی برباد ہونے والا نہیں

یہ دشت عشق اب آباد ہونے والا نہیں

بس ایک دن اسے زنجیر خود رہا کرے گی

یہ قیدی ایسے تو آزاد ہونے والا نہیں

بلا سبب یہاں لوگوں سے کون ملتا ہے

یہ کار خیر مرے بعد ہونے والا نہیں

سبھی کو شوق یہاں انکشاف ذات کا ہے

مگر وہ آئنہ ایجاد ہونے والا نہیں

پڑھا رہے ہو سبق دل کو دنیاداری کا

پڑھائے جاؤ اسے یاد ہونے والا نہیں

یہ کہہ کے کار جہاں کوئی مجھ کو سونپ گیا

یہ کام مجھ سے تو استاد ہونے والا نہیں