وقت بے وقت یہ پوشاک مری تاک میں ہے

وقت بے وقت یہ پوشاک مری تاک میں ہے

جانتا ہوں کہ مری خاک مری تاک میں ہے

مجھ کو دنیا کے عذابوں سے ڈرانے والو

ایک عالم پس افلاک مری تاک میں ہے

جمع کرتا ہے شواہد مرے ہونے کے خلاف

درحقیقت مرا ادراک مری تاک میں ہے

ہے مرے گرد حفاظت کے لئے ایک حصار

ہو اگر کوئی غضب ناک مری تاک میں ہے

وہ تو یوں ہے کہ بچاتا ہے بچانے والا

ورنہ اک لشکر سفاک مری تاک میں ہے

اک طرف روح وضو میں نہیں ہوتی شامل

اک طرف سجدۂ ناپاک مری تاک میں ہے

آشنا ایک ہے اس شہر میں عاصمؔ میرا

اور وہ دشمن بے باک مری تاک میں ہے