یہ مسافت نہیں آسان کہاں جاتا ہے

یہ مسافت نہیں آسان کہاں جاتا ہے

اور پھر بے سر و سامان کہاں جاتا ہے

آج کل خواب کے بارے میں ہے تشویش مجھے

آنکھ کھلتے ہی یہ مہمان کہاں جاتا ہے

ایک نادیدہ سی زنجیر لئے پھرتی ہے

اپنی مرضی سے یہ انسان کہاں جاتا ہے

شام ہوتے ہی کہاں جاتا ہوں کیا بتلاؤں

آدمی ہو کے پریشان کہاں جاتا ہے

تو کہ آیا تھا مری مشکلیں آساں کرنے

ہو گئیں مشکلیں آسان کہاں جاتا ہے

خود بھی حیران ہوں میں اس سے گلے ملتے وقت

میرے اندر کا یہ حیوان کہاں جاتا ہے

بھاگ سکتا ہے کہاں دل کی عدالت سے کوئی

ہے یہی حشر کا میدان کہاں جاتا ہے