نغمۂ_وحدت

ہر طرف جلوۂ‌ قدرت ہے نمایاں تیرا

پھر بھی آساں نہیں انسان کو عرفاں تیرا

اللہ اللہ یہ کرم رحمت یزداں تیرا

عاصیوں پر بھی رہا سایۂ داماں تیرا

ہر جگہ سکہ رواں ہے تری یکتائی کا

دل سے قائل ہے ہر اک دیدۂ حیراں تیرا

آستانے پہ ترے کون نہیں سر بہ سجود

کون دنیا میں نہیں تابع فرماں تیرا

تو جو برہم ہو تو اک برق بلا چشم عتاب

اور خوش ہو تو تبسم ہو گل افشاں تیرا

حشر میں کاش یہ پوچھے تری رحمت مجھ سے

آئنہ گار بتا کیا ہے اب ارماں تیرا

سب کو تسلیم تری بندہ نوازی یارب

سب کو اقرار کہ ہر شے پہ ہے احساں تیرا

جو بشر راہ ہدایت سے بھٹک جاتا ہے

راستہ اس کو بتا دیتا ہے قرآں تیرا

رحم فرما کہ ہوا سارا زمانہ دشمن

آج ہر بندۂ مومن ہے پریشاں تیرا

آستانے سے ترے جائے کہاں اب محویؔ

کہ ازل ہی سے ہے وابستۂ داماں تیرا