اب چراغوں میں زندگی کم ہے

دل جلاؤ کہ روشنی کم ہے

بے وفا کہئے با وفا کہئے

دل میں آئے جو برملا کہئے

نہیں ملتی انہیں منزل جنہیں خوف حوادث ہے

جو موجوں سے نہیں ڈرتے ندی کو پار کرتے ہیں

زندگی چھوٹی ہے سامان بہت

اور دل کے بھی ہیں ارمان بہت

جس کے پیروں تلے زمین نہیں

اس کا سارا جہان ہوتا ہے

سب اپنی اپنی راہ پر آگے نکل گئے

اب کس کا انتظار کئے جا رہے ہیں ہم

نہ جانے کس کی یاد نے لی دل میں گدگدی

آئنہ دیکھ دیکھ کے شرما رہے ہیں ہم

کہاں شکوہ زمانے کا پس دیوار کرتے ہیں

ہمیں کرنا ہے جو بھی ہم سر بازار کرتے ہیں

اپنے دامن کی کچھ خبر ہے مجیدؔ

سوچ کر خود کو پارسا کہئے

کیف و مستی سرور کیا معنی

زندگی میں بھی اب خوشی کم ہے