kamre meñ dhuāñ dard kī pahchān banā thā

kal raat koī phir mirā mehmān banā thā

kamre mein dhuan dard ki pahchan bana tha

kal raat koi phir mera mehman bana tha

tamām raat vo pahlū ko garm kartā rahā

kisī kī yaad kā nashsha sharāb jaisā thā

tamam raat wo pahlu ko garm karta raha

kisi ki yaad ka nashsha sharab jaisa tha

parinde fazāoñ meñ phir kho ga.e

dhuāñ hī dhuāñ āshiyānoñ meñ thā

parinde fazaon mein phir kho gae

dhuan hi dhuan aashiyanon mein tha

mujhe bhī fursat-e-nazzāra-e-jamāl na thī

aur us ko paas kisī aur ke bhī jaanā thā

mujhe bhi fursat-e-nazzara-e-jamal na thi

aur us ko pas kisi aur ke bhi jaana tha

āvāzoñ kā bojh uThā.e sadiyoñ se

banjāroñ kī tarah guzāra kartā huuñ

aawazon ka bojh uThae sadiyon se

banjaron ki tarah guzara karta hun

shāyad tumhārī yaad mire paas aa ga.ī

yā hai mire hī dil kī sadā sochnā paḌā

shayad tumhaari yaad mere pas aa gai

ya hai mere hi dil ki sada sochna paDa

maiñ ne kal toḌā ik ā.īna to mahsūs huā

is meñ poshīda koī chiiz thī jauhar jaisī

main ne kal toDa ek aaina to mahsus hua

is mein poshida koi chiz thi jauhar jaisi

chehroñ ke maile jismoñ ke jañgal the har jagah

un meñ kahīñ bhī koī magar aadmī na thā

chehron ke maile jismon ke jangal the har jagah

un mein kahin bhi koi magar aadmi na tha

ḳhushnumā dīvār-o-dar ke ḳhvāb hī dekhā kiye

jism sahrā zehn vīrāñ aañkh giilī ho ga.ī

KHushnuma diwar-o-dar ke KHwab hi dekha kiye

jism sahra zehn viran aankh gili ho gai