rah-e-vafā meñ unhīñ kī ḳhushī kī baat karo

vo zindagī haiñ to phir zindagī kī baat karo

rah-e-wafa mein unhin ki KHushi ki baat karo

wo zindagi hain to phir zindagi ki baat karo

zulmatoñ kā guzar kahāñ mumkin

un kā raushan ḳhayāl aatā hai

zulmaton ka guzar kahan mumkin

un ka raushan KHayal aata hai

masrūr ho rahe haiñ ġham-e-āshiqī se ham

kyuuñ tañg hoñge kashmakash-e-zindagī se ham

masrur ho rahe hain gham-e-ashiqi se hum

kyun tang honge kashmakash-e-zindagi se hum

rāh-e-vafā meñ jī ke mare mar ke bhī jiye

khelā usī tarah se kiye zindagī se ham

rah-e-wafa mein ji ke mare mar ke bhi jiye

khela usi tarah se kiye zindagi se hum

mujhe vo bātoñ bātoñ meñ agar dīvāna kah dete

to dīvānoñ meñ merī mo'atabar dīvāngī hotī

mujhe wo baaton baaton mein agar diwana kah dete

to diwanon mein meri mo'atabar diwangi hoti

agar terī tarah tablīġh kartā pīr-e-mai-ḳhāna

to duniyā-bhar meñ vaa.iz mai-kashī hī mai-kashī hotī

agar teri tarah tabligh karta pir-e-mai-KHana

to duniya-bhar mein waiz mai-kashi hi mai-kashi hoti

kārvāñ ishq kī manzil ke qarīñ aa pahūñchā

ḳhud mire dil meñ mire dil kā makīñ aa pahūñchā

karwan ishq ki manzil ke qarin aa pahuncha

KHud mere dil mein mere dil ka makin aa pahuncha

tire ḳhayāl meñ maiñ huuñ mire ḳhayāl meñ tū

mire baġhair tirī dāstāñ rahe na rahe

tere KHayal mein main hun mere KHayal mein tu

mere baghair teri dastan rahe na rahe

hamārī laash gulistāñ meñ dafn kar sayyād

chaman se duur koī nauha-ḳhvāñ rahe na rahe

hamari lash gulistan mein dafn kar sayyaad

chaman se dur koi nauha-KHwan rahe na rahe

dil ke ā.īne meñ jab aap kī sūrat dekhī

jis ko dhokā maiñ samajhtā thā vo dhokā bhī gayā

dil ke aaine mein jab aap ki surat dekhi

jis ko dhoka main samajhta tha wo dhoka bhi gaya

ek hī chiiz hai parde meñ ki bairūn-e-hijāb

mujh ko zāhir bhī kiyā ḳhud ko chhupāyā bhī gayā

ek hi chiz hai parde mein ki bairun-e-hijab

mujh ko zahir bhi kiya KHud ko chhupaya bhi gaya

sard-mehrī se tirī garmī-e-ulfat na rahī

dil meñ uThtā thā jo har-dam vo sharāra bhī gayā

sard-mehri se teri garmi-e-ulfat na rahi

dil mein uThta tha jo har-dam wo sharara bhi gaya

vafādārī ġhurūr-e-be-ruḳhī ko ḳhatm kar degī

ziyāda to nahīñ kuchh din raheñ vo bad-gumāñ shāyad

wafadari ghurur-e-be-ruKHi ko KHatm kar degi

ziyaada to nahin kuchh din rahen wo bad-guman shayad

hañsā karte haiñ akasr log dīvānoñ kī bātoñ par

jahāñ vaale nahīñ samjhe mohabbat kī zabāñ shāyad

hansa karte hain akasr log diwanon ki baaton par

jahan wale nahin samjhe mohabbat ki zaban shayad

hosh meñ laane kī tadbīr na kar ai nāseh

maiñ ne paayā hai unheñ chāk-e-garebāñ ho kar

hosh mein lane ki tadbir na kar ai naseh

main ne paya hai unhen chaak-e-gareban ho kar

nigāh-e-parda-kushā kā kamāl kyā kahnā

jahāñ jahāñ vo chhupe us ne jā ke dekh liyā

nigah-e-parda-kusha ka kamal kya kahna

jahan jahan wo chhupe us ne ja ke dekh liya

mizāj-e-husn to ik haal par rahā qaa.em

luTāne vāloñ ne sab kuchh luTā ke dekh liyā

mizaj-e-husn to ek haal par raha qaem

luTane walon ne sab kuchh luTa ke dekh liya