chhupā kar dil meñ le jā.eñge jo jo dil pe guzrī hai

ham is nā-qadr duniyā ko ye afsāne nahīñ deñge

chhupa kar dil mein le jaenge jo jo dil pe guzri hai

hum is na-qadr duniya ko ye afsane nahin denge

batā ai sham' kis ġham meñ jalegī

agar jaañ tujh pe parvāne na deñge

bata ai sham' kis gham mein jalegi

agar jaan tujh pe parwane na denge

kahāñ kī 'āshiqī kaisī mohabbat dil kā aanā kyā

havas kā naam mil kar rakh liyā hai 'āshiqī ham ne

kahan ki 'ashiqi kaisi mohabbat dil ka aana kya

hawas ka nam mil kar rakh liya hai 'ashiqi hum ne

kis liye tez huī jaatī hai dil kī dhaḌkan

aap ne dekhā hai mujh ko kahīñ aisā to nahīñ

kis liye tez hui jati hai dil ki dhaDkan

aap ne dekha hai mujh ko kahin aisa to nahin

'ishq aur mushk chhupā.e kahīñ chhupte haiñ 'amar'

laakh parda karo duniyā se ye pardā to nahīñ

'ishq aur mushk chhupae kahin chhupte hain 'amar'

lakh parda karo duniya se ye parda to nahin

tumhārī bazm meñ har do taraf thī ek majbūrī

na tum ne mad-bharī āñkheñ uThā.īñ aur na pī ham ne

tumhaari bazm mein har do taraf thi ek majburi

na tum ne mad-bhari aankhen uThain aur na pi hum ne

apne girne kā to afsos nahīñ hai mujh ko

dekhnā ye hai kisī ne mujhe dekhā to nahīñ

apne girne ka to afsos nahin hai mujh ko

dekhna ye hai kisi ne mujhe dekha to nahin

maleñge aap bhī dast-e-ta.assuf

agar ham ko sukūñ paane na deñge

malenge aap bhi dast-e-tassuf

agar hum ko sukun pane na denge

na karte un se iz.hār-e-tamannā ham to achchhā thā

tamanna to gañvā.ī thī gañvā.ī baat bhī ham ne

na karte un se izhaar-e-tamanna hum to achchha tha

tamanna to ganwai thi ganwai baat bhi hum ne

dekhā jā.egā un kī mahfil meñ

maiñ nahīñ aaj yā raqīb nahīñ

dekha jaega un ki mahfil mein

main nahin aaj ya raqib nahin

bahut dekhā hai ham ne un kā vā'da

unheñ ab dil ko bahkāne na deñge

bahut dekha hai hum ne un ka wa'da

unhen ab dil ko bahkane na denge

hameñ ḳhvāh 'aam hī karnā paḌe faizān-e-mai-ḳhāna

magar ham shaiḳh ko duniyā ko bahkāne nahīñ deñge

hamein KHwah 'am hi karna paDe faizan-e-mai-KHana

magar hum shaiKH ko duniya ko bahkane nahin denge

ham bahakte kabhī na yuuñ saaqī

tere hāthoñ jo pī nahīñ hotī

hum bahakte kabhi na yun saqi

tere hathon jo pi nahin hoti

yuuñ to taqdīr se haiñ sab bebas

'ishq sī bebasī nahīñ hotī

yun to taqdir se hain sab bebas

'ishq si bebasi nahin hoti

un se milnā to kuchh nahīñ mushkil

lekin aise mire nasīb nahīñ

un se milna to kuchh nahin mushkil

lekin aise mere nasib nahin