کوئی تہمت ہو مرے نام چلی آتی ہے

جیسے بازار میں ہر گھر سے گلی آتی ہے

کہاں ملا میں تجھے یہ سوال بعد کا ہے

تو پہلے یاد تو کر کس جگہ گنوایا مجھے

کچھ تصاویر بول پڑتی ہیں

سب کی سب بے زباں نہیں ہوتیں

مرے مزار پہ آ کر دیے جلائے گا

وہ میرے بعد مری زندگی میں آئے گا

اندھیری رات ہے سایہ تو ہو نہیں سکتا

یہ کون ہے جو مرے ساتھ ساتھ چلتا ہے

بعض وعدے کیے نہیں جاتے

پھر بھی ان کو نبھایا جاتا ہے

شب کو اک بار کھل کے روتا ہوں

پھر بڑے سکھ کی نیند سوتا ہوں

اذاں پہ قید نہیں بندش نماز نہیں

ہمارے پاس تو ہجرت کا بھی جواز نہیں

جاں قرض ہے سو اتارتے ہیں

ہم عمر کہاں گزارتے ہیں

مجھے کچھ دیر رکنا چاہئے تھا

وہ شاید دیکھ ہی لیتا پلٹ کر

اس نام کا کوئی بھی نہیں ہے

جس نام سے ہم پکارتے ہیں

مجھے ہنسی بھی مرے حال پر نہیں آتی

وہ خود بھی روئے گا اوروں کو بھی رلائے گا

آنکھ جھپکیں تو اتنے عرصے میں

جانے کتنے برس گزر جائیں

عمر بھر جنگل میں رہ سکتا ہوں میں

اس میں گھر جیسی فضا موجود ہے

جب تک میں پہنچتا ہوں کڑی دھوپ میں چل کر

دیوار کا سایہ پس دیوار نہ ہو جائے