vo habīb ho ki rahbar vo raqīb ho ki rahzan

jo dayār-e-dil se guzre use ham-kalām kar lo

wo habib ho ki rahbar wo raqib ho ki rahzan

jo dayar-e-dil se guzre use ham-kalam kar lo

hameñ bāda-kash-e-dard-e-tamannā

hamīñ par band hai mai-ḳhāna dil kā

hamein baada-kash-e-dard-e-tamanna

hamin par band hai mai-KHana dil ka

sab dikhāte haiñ tirā aks mirī āñkhoñ meñ

ham zamāne ko isī taur se mahbūb hue

sab dikhate hain tera aks meri aankhon mein

hum zamane ko isi taur se mahbub hue

aao dekheñ ahl-e-vafā kī hotī hai tauqīr kahāñ

kis mahfil kā naam hai maqtal khiñchtī hai shamshīr kahāñ

aao dekhen ahl-e-wafa ki hoti hai tauqir kahan

kis mahfil ka nam hai maqtal khinchti hai shamshir kahan

āñkhoñ meñ ghul na jaa.eñ kahīñ zulmatoñ ke rañg

jis samt raushnī hai udhar dekhte raho

aankhon mein ghul na jaen kahin zulmaton ke rang

jis samt raushni hai udhar dekhte raho

hujūm-e-sub.h kī tanhā.iyoñ meñ Duub ga.e

vo qāfile jo añdheroñ kī anjuman se chale

hujum-e-subh ki tanhaiyon mein Dub gae

wo qafile jo andheron ki anjuman se chale

diloñ kī aag baḌhāo ki log kahte haiñ

charāġh-e-husn se raushan jahāñ nahīñ hotā

dilon ki aag baDhao ki log kahte hain

charagh-e-husn se raushan jahan nahin hota

dhuāñ uThtā nazar aatā hai har-sū

abhī ābād hai vīrāna dil kā

dhuan uThta nazar aata hai har-su

abhi aabaad hai virana dil ka

ek āvāz to gūñjī thī ufuq-tā-ba-ufuq

kārvāñ gum hai kahāñ gard-e-safar se pūchho

ek aawaz to gunji thi ufuq-ta-ba-ufuq

karwan gum hai kahan gard-e-safar se puchho

kaun royā pas-e-dīvār-e-chaman āḳhir-e-shab

kyuuñ sabā lauT ga.ī rāhguzar se pūchho

kaun roya pas-e-diwar-e-chaman aaKHir-e-shab

kyun saba lauT gai rahguzar se puchho

vaqt jhūme kahīñ bahke kahīñ tham jaa.e kahīñ

khil uTheñ naqsh-e-qadam yuuñ koī dīvāna chale

waqt jhume kahin bahke kahin tham jae kahin

khil uThen naqsh-e-qadam yun koi diwana chale

na milā par na milā ishq ko andāz-e-junūñ

ham ne majnūñ kī bhī āshufta-sarī dekhī hai

na mila par na mila ishq ko andaz-e-junun

hum ne majnun ki bhi aashufta-sari dekhi hai