خوشی کی بات اور ہے غموں کی بات اور

تمہاری بات اور ہے ہماری بات اور

ہر ایک شخص مرا شہر میں شناسا تھا

مگر جو غور سے دیکھا تو میں اکیلا تھا

ہنستے ہنستے نکل پڑے آنسو

روتے روتے کبھی ہنسی آئی

جی تو یہ چاہتا ہے مر جائیں

زندگی اب تری رضا کیا ہے

یہ یقیں ہے کی میری الفت کا

ہوگا ان پر اثر کبھی نہ کبھی

اس خوف میں کہ کھد نہ بھٹک جائیں راہ میں

بھٹکے ہوؤں کو راہ دکھاتا نہیں کوئی

سکون قلب کو جس سے مل جائے تاباںؔ

غزل کوئی ایسی سنا دیجئے گا

آئے گا وہ دن ہماری زندگی میں بھی ضرور

جو اندھیروں کو مٹا کر روشنی دے جائے گا

کچھ سمجھ میں مری نہیں آتا

دل لگانے سے فائدہ کیا ہے

دل ہے پریشاں ان کی خاطر

پل بھر کو آرام نہیں ہے

تمہیں دل دے تو دے تاباںؔ یہ ڈر ہے

ہمیشہ کو تمہارا ہو نہ جائے

تو اس نگاہ سے پی وقت مے کشی تاباںؔ

کی جس نگاہ پہ قربان پارسائی ہو

شاید آ جائے کبھی دیکھنے وہ رشک مسیح

میں کسی اور سے اس واسطے اچھا نہ ہوا

حریم ناز کے پردے میں جو نہاں تھا کبھی

اسی نے شوخ ادائیں دکھا کے لوٹ لیا

ستم بھی مجھ پہ وہ کرتا رہا کرم کی طرح

وہ مہرباں تو نہ تھا مہربان جیسا تھا

آج مغموم کیوں ہو اے تاباںؔ

کچھ تو بولو کہ ماجرا کیا ہے

کسی کی برق نظر سے نہ بجلیوں سے جلے

کچھ اس طرح کی ہو تعمیر آشیانے کی

شغل تھا دشت نوردی کا کبھی اے تاباںؔ

اب گلستاں میں بھی جاتے ہوئے ڈر لگتا ہے

سمجھ سے کام جو لیتا ہر ایک بشر تاباںؔ

نہ ہاہا کار ہی مچتے نہ گھر جلا کرتے