میں پیروی اہل سیاست نہیں کرتا

اک راستہ ان سب سے جدا چاہئے مجھ کو

اک تیری بے رخی سے زمانہ خفا ہوا

اے سنگ دل تجھے بھی خبر ہے کہ کیا ہوا

ایک لمحے کو تم ملے تھے مگر

عمر بھر دل کو ہم مسلتے رہے

ہاں سمندر میں اتر لیکن ابھرنے کی بھی سوچ

ڈوبنے سے پہلے گہرائی کا اندازہ لگا

دیکھ رہ جائے نہ تو خواہش کے گنبد میں اسیر

گھر بناتا ہے تو سب سے پہلے دروازہ لگا

بس یوں ہی تنہا رہوں گا اس سفر میں عمر بھر

جس طرف کوئی نہیں جاتا ادھر جاتا ہوں میں

زمانے بھر نے کہا عرشؔ جو، خوشی سے سہا

پر ایک لفظ جو اس نے کہا سہا نہ گیا

ہم نے چاہا تھا تیری چال چلیں

ہائے ہم اپنی چال سے بھی گئے

ہم کہ مایوس نہیں ہیں انہیں پا ہی لیں گے

لوگ کہتے ہیں کہ ڈھونڈے سے خدا ملتا ہے

اٹھتی تو ہے سو بار پہ مجھ تک نہیں آتی

اس شہر میں چلتی ہے ہوا سہمی ہوئی سی

وہ عیادت کو تو آیا تھا مگر جاتے ہوئے

اپنی تصویریں بھی کمرے سے اٹھا کر لے گیا