کچرے سے اٹھائی جو کسی طفل نے روٹی

پھر حلق سے میرے کوئی لقمہ نہیں اترا

جب وصل کا آئے گا ترے ساتھ صنم دن

اس دن کو حقیقت میں کہوں گا میں جنم دن

اس سے بڑھ کر اور کیا ہم پر ستم ہوگا منیرؔ

مشورہ مانگا ہے اس نے فیصلہ کرنے کے بعد

کنج حیرت سے چلے دشت زیاں تک لائے

کون لا سکتا ہے ہم دل کو جہاں تک لائے

کوئی بھی سر میں نہیں ہے منیرؔ کیا کیجے

یہ زندگی کا ترانہ ریاض مانگتا ہے

چراغ اندر کی سازشوں سے بجھے ہوئے ہیں

اور اس کا الزام بھی ہوا پر چلا گیا ہے

پڑ جاتے ہیں کتنے چھالے ہاتھوں میں

آتے ہیں پھر چند نوالے ہاتھوں میں

بوڑھے کمزور والدین کے ساتھ

جی رہا ہوں میں کتنے چین کے ساتھ

کیا خبر کون سا رستہ تری جانب نکلے

بے ارادہ بھی کئی بار سفر کرتے ہیں

میں آج تجھ سے ملاقات کرنے آیا ہوں

نئی غزل کی شروعات کرنے آیا ہوں

سپہ سالار کے جب ہاتھ کانپیں تو سپاہی بھی

زیادہ دیر پھر میدان میں ٹھہرا نہیں کرتے

مسکرا کر اگر وہ دیکھے تو

آئنے پر نشان پڑ جائے

ایک امید کے سہارے پر

کتنی تاخیر دیکھ لیتے ہیں

زمیں پہ صرف اتارا نہیں منیرؔ اس نے

پھر اس کے بعد ہمارا خیال بھی رکھا

جو اہل عشق ہیں دیتے ہیں زور برگر پر

جو اہل حسن ہیں سپنے ڈنر کے دیکھتے ہیں

کرنی پڑ جائے وضاحت پہ وضاحت لیکن

ہم تری بات کی تردید نہیں کر سکتے

پھر اپنی اس پریم کہانی پر آیا ڈک لائن

اب وہ مجھ کو جن کہتی ہے اور میں اس کو ڈائن

اگر ہے نیند نہ آنے کا عارضہ تجھ کو

تو بیڈ پہ لیٹ کے فوراً کوئی کتاب اٹھا

کیا ہوا ہے اسے ڈائٹنگ نے اتنا سلم

سو اس کی پکس کو ہم زوم کر کے دیکھتے ہیں

اسی لیے تو صحافیوں کو یہ پر تکلف ڈنر دیا ہے

کسی طرف سے نہ کوئی کڑوا سوال ہوگا یہ طے ہوا تھا

سنا تھا گنجے قسمت والے ہوتے ہیں

اور سنتے ہی سنتے عرصہ بیت گیا

پولس کہاں سے ٹپک پڑی ہے کہا یہ ڈاکو نے سٹپٹا کر

مداخلت کا نہ رتی بھر احتمال ہوگا یہ طے ہوا تھا

آئینہ دیکھیں تو غصہ آتا ہے

سر سے ٹوپی اترے عرصہ بیت گیا

طے ہو چکی ہے اس سے جدائی مگر منیرؔ

تو اس کے ساتھ لمحۂ انکار تک تو چل

کر گئی ہیں دو ہی خوراکیں مجھے چنگا بھلا

دید اس کی جیسے اینٹی بائیٹک کی ڈوز ہو

ہماری زلف سیہ کا بھرم نہ کھل جائے

بچا ہوا ہے جو پیالی میں وہ خضاب اٹھا

قوم کے حق میں جو بھی تجاویز تھیں التوا میں رہیں

جن میں ذاتی مفادات تھے ان پہ فوراً عمل ہو گیا

جس منظر کا حصہ تیری ذات نہیں

میری نظر میں اس کی کوئی اوقات نہیں

جیون ہے سڑک اور کنارے پہ کھڑے ہیں

لگتا ہے کہ مدت سے اشارے پہ کھڑے ہیں

کچھ وقت جو اس شخص کی صحبت میں گزارے

آئیں گی نظر صرف اسے دہر میں غزلیں

یہ ایسی برق ہے اکثر جو میرے سر پہ گرتی ہے

نہیں ہے فرق اس میں اور بلائے ناگہانی میں

سارا ملبہ گرا نہ دیں مجھ پر

چل رہی ہے یہ افسران میں کیا

بن گئے دولہے ہزاروں اپنے ہاتھوں میں پلے

ہم مگر ہو جائیں گے یوں ہی پرانے ہائے ہائے

اک دوست مجھ سے کہنے لگا کچھ تو شرم کر

بکرے کے ساتھ اس نے اتاری ہیں سیلفیاں

کوئی قریب سے بولا کہ فکر مت کیجے

یہ پانچ سال اسمبلی میں جا کے سوئے گا

جب کبھی سہ بار کانوں میں پڑے حرف قبول

دل پہ لگتے ہیں ہزاروں تازیانے ہائے ہائے

لڑ رہا ہوں میں اکیلا کارزار ہست میں

کر فراہم تو بھی ظالم اپنے ہونے کا جواز

چائے کا تو ذکر ہی مت کیجیے

اب تو بس کالا ہے سب کچھ دال میں

عقابی روح جب بیدار ہوتی ہے زنانی میں

اماں شوہر کو پھر ملتی نہیں اس دار فانی میں

بے چہرہ انسانوں کی اس بستی میں

اچھا ہے آئینے توڑ دئے جائیں

آپ کی تو جلد باجی ہو رہی ہے اب خراب

میں کروں گی فیشیل بن جائے گی تازہ گلاب

نکلی ہو پارلر سے فریش فیس لے کے تم

لگتا ہوں میں جو کالی چرن تم کو اس سے کیا

گو حرف و اشک دونوں تھے سامان گفتگو

پھر بھی ہماری بات میں ابہام رہ گیا

تم نے تو دس ہزار کا جوڑا پہن لیا

ٹوٹے ہوئے ہیں میرے بٹن تم کو اس سے کیا

سمجھ میں آتا نہیں یہ کیسی نمو ہے مجھ میں

وہ میری مٹی میں کچھ ملا کر چلا گیا ہے

کہاں سے ہم اپنی گردشوں کا جواز ڈھونڈیں

ہمارا محور زمیں کے محور سے مختلف ہے

تری صورت میں رہائی مل گئی

آنکھ کتنے منظروں میں قید تھی

اور کیا مفہوم ہوگا خود فریبی کے سوا

تشنگی جلتے ہوئے سورج پہ گر ظاہر کریں

بن گئے انسان اپنی ذات میں جنگل منیرؔ

بستیوں سے اڑ گئی ہے بوئے آدم زاد تک

تجھ کو خود سے منہا کرتے

نا ممکن تھا ایسا کرتے