sitāroñ āsmāñ ko jagmagā do raushnī se

december aaj milne jā rahā hai january se

sitaron aasman ko jagmaga do raushni se

december aaj milne ja raha hai january se

agar hai ishq sachchā to nigāhoñ se bayāñ hogā

zabāñ se bolnā bhī kyā koī iz.hār hotā hai

agar hai ishq sachcha to nigahon se bayan hoga

zaban se bolna bhi kya koi izhaar hota hai

haiñ dastaras meñ yuuñ to zabāneñ ka.ī magar

ḳhāmoshī aaj bhī merī pahlī pasand hai

hain dastaras mein yun to zabanen kai magar

KHamoshi aaj bhi meri pahli pasand hai

muskurāhaT oḌh kar yuuñ hī nahīñ rahtā huuñ maiñ

jhāñk kar dekho kabhī andar bahut TuuTā huuñ maiñ

muskurahaT oDh kar yun hi nahin rahta hun main

jhank kar dekho kabhi andar bahut TuTa hun main

nahīñ jāntā maiñ tirī ḳhāmushī kī vajūhāt kyā haiñ

nahīñ māntā maiñ ki tujh tak sadā.eñ pahuñchtī nahīñ haiñ

nahin jaanta main teri KHamushi ki wajuhat kya hain

nahin manta main ki tujh tak sadaen pahunchti nahin hain

she'r kahnā hai un kī āñkhoñ par

dekhiye ban sake agar tasvīr

she'r kahna hai un ki aankhon par

dekhiye ban sake agar taswir

kisī kī maut kā dukh hai magar is se ziyāda

mujhe is baat kā dukh hai ki koī ro rahā hai

kisi ki maut ka dukh hai magar is se ziyaada

mujhe is baat ka dukh hai ki koi ro raha hai

vo bhī maqām aa.e hai majnūñ ke baḳht meñ

lailā dikhā.ī dene lage har daraḳht meñ

wo bhi maqam aae hai majnun ke baKHt mein

laila dikhai dene lage har daraKHt mein

ḳhvāhish sab rakhte haiñ tujh ko paane kī

aur phir apnī apnī qismat hotī hai

KHwahish sab rakhte hain tujh ko pane ki

aur phir apni apni qismat hoti hai

bahut āsān hai kahnā burā kyā hai bhalā kyā hai

karoge 'ishq tab mā'lūm hogā mas.ala kyā hai

bahut aasan hai kahna bura kya hai bhala kya hai

karoge 'ishq tab ma'lum hoga masala kya hai

mushkil hai samjhānā us ko

dil ke paas dimāġh nahīñ hai

mushkil hai samjhana us ko

dil ke pas dimagh nahin hai

kaun sā tujh se milāne ke liye aayā hai

ye nayā saal bhī jaane ke liye aayā hai

kaun sa tujh se milane ke liye aaya hai

ye naya sal bhi jaane ke liye aaya hai

ga.ī shab niiñd meñ chalte hue dekhā gayā mujh ko

batāyā thā kisī ne ḳhvāb meñ terā pata mujh ko

gai shab nind mein chalte hue dekha gaya mujh ko

bataya tha kisi ne KHwab mein tera pata mujh ko

kuchh bolo ki ḳhāmoshī chup ho jaa.e

us kī bāteñ sun kar ke Dar lagtā hai

kuchh bolo ki KHamoshi chup ho jae

us ki baaten sun kar ke Dar lagta hai

ham yahāñ kāTne aa.e haiñ shab-e-furqat-e-yār

ham zarā bhī haiñ agar ḳhush to ġhanīmat jaano

hum yahan kaTne aae hain shab-e-furqat-e-yar

hum zara bhi hain agar KHush to ghanimat jaano

hijr ne us ke hameñ baḳhshī ġhazal

ham firāq-e-yār kā ġham kyoñ kareñ

hijr ne us ke hamein baKHshi ghazal

hum firaq-e-yar ka gham kyon karen

ik nadī sahrā kī honā chāhtī hai

ik nadī jis par samundar khul gayā hai

ek nadi sahra ki hona chahti hai

ek nadi jis par samundar khul gaya hai

tumhāre shahr se guzrī thī gaaḌī

utarne kā bahut man kar rahā thā

tumhaare shahr se guzri thi gaDi

utarne ka bahut man kar raha tha

makāñ to hai nahīñ jo khīñch deñ dīvār is dil meñ

koī duujā nahīñ rah pā.egā ab yaar is dil meñ

makan to hai nahin jo khinch den diwar is dil mein

koi duja nahin rah paega ab yar is dil mein

auroñ kā batāyā huā rastā nahīñ chunte

jo 'ishq chunā karte haiñ duniyā nahīñ chunte

auron ka bataya hua rasta nahin chunte

jo 'ishq chuna karte hain duniya nahin chunte