phuul khilte haiñ to lagtā hai tire hoñToñ ne

muskurāhaT ko baḌe naaz se āzād kiyā

phul khilte hain to lagta hai tere honTon ne

muskurahaT ko baDe naz se aazad kiya

aap ne jis ko farishte kā diyā thā darja

us kī insānoñ sī fitrat hai to hairat kyā hai

aap ne jis ko farishte ka diya tha darja

us ki insanon si fitrat hai to hairat kya hai

ehsān le ke dil se kareñ shukriya adā

duniyā meñ kam haiñ jin meñ ye ġhairat hai āj-kal

ehsan le ke dil se karen shukriya ada

duniya mein kam hain jin mein ye ghairat hai aaj-kal

jo auroñ ko uḌte hue dekhtā ho

vo piñjre meñ kaise sukūñ se rahegā

jo auron ko uDte hue dekhta ho

wo pinjre mein kaise sukun se rahega

mire qalam kī siyāhī meñ 'ishq hai terā

mirā ye naam ye shohrat tirī badaulat hai

mere qalam ki siyahi mein 'ishq hai tera

mera ye nam ye shohrat teri badaulat hai

hijr meñ shiddat dikhāte haiñ sabhī 'āshiq magar

lutf tab hai vasl ho par aarzū baaqī rahe

hijr mein shiddat dikhate hain sabhi 'ashiq magar

lutf tab hai wasl ho par aarzu baqi rahe

jo haqīqat se ḳhauf khāne lage

ḳhvāb aise maiñ dekhtā hī nahīñ

jo haqiqat se KHauf khane lage

KHwab aise main dekhta hi nahin

nāche hai mohabbat kī ye sur taal pe ḳhud hī

dil ko ye hunar yaar sikhāyā nahīñ jaatā

nache hai mohabbat ki ye sur tal pe KHud hi

dil ko ye hunar yar sikhaya nahin jata

'ajab ehsās hai ki jab use dekhūñ

mujhe pahlī mohabbat yaad aatī hai

'ajab ehsas hai ki jab use dekhun

mujhe pahli mohabbat yaad aati hai

umīdoñ se karo āzād aur phir

mohabbat kī sanam parvāz dekho

umidon se karo aazad aur phir

mohabbat ki sanam parwaz dekho