عورت ہوں مگر صورت کہسار کھڑی ہوں

اک سچ کے تحفظ کے لیے سب سے لڑی ہوں

الفاظ نہ آواز نہ ہم راز نہ دم ساز

یہ کیسے دوراہے پہ میں خاموش کھڑی ہوں

جس بادل نے سکھ برسایا جس چھاؤں میں پریت ملی

آنکھیں کھول کے دیکھا تو وہ سب موسم لمحاتی تھے

وہ آئے تو رنگ سنورنے لگتے ہیں

جیسے بچھڑا یار بھی کوئی موسم ہے

یہ چاند مجھ کو ہی تک رہا ہے

تمہیں ہمیشہ یہ شک رہا ہے

کرتا رہا وہ مجھ پہ سدا مہربانیاں

کچھ اور ڈھونڈھتی رہی میں مہربان میں

کسی خیال کی دستک کسی امید کی لو

میں تھک کے سوئی تو پھر سے جگا دیا اس نے

میں کسی کے ساتھ ہوں اور وہ کسی کے ساتھ ہے

اک مسلسل حادثہ یہ زندگی کے ساتھ ہے

مسلک وفا کے باب میں وہ اختیار کر

میں جھوٹ بھی کہوں تو مرا اعتبار کر

خزاں کے آخری دن تھے وہ خوشبو مانگنے آیا

مرا دامن ہی خالی تھا میں اس کو پھول کیا دیتی

عجب در پر سوالی تھا میں اس کو پھول کیا دیتی

وہ خود گلشن کا مالی تھا میں اس کو پھول کیا دیتی

میں بھی نہ تھی کلام میں اتنی فراخ دل

کچھ وہ بھی اختصار سے آگے نہ جا سکا

کسی کی جنگ لڑنی پڑ گئی ہے

کسی کے فیصلے مہنگے پڑے ہیں

خواب جو بھی دیکھے تھے بن گئے شرارے سے

دیکھنا ہے اب اس کو دوسرے کنارے سے

ماں بن چکی ہوں میں بھی مگر اس سے کیا کہوں

جو اپنی ماں کے پیار سے آگے نہ جا سکا

صدیوں کی راکھ وقت کی جھولی میں ڈال کر

میں جا رہی ہوں اب تو مرا انتظار کر

محبت منتقل ہونے لگی ہے

میں اب بچوں کی ہوتی جا رہی ہوں

وقت بھی عجب شے ہے ہاتھ ہی نہیں آیا

عمر بھر اٹھائے ہیں دل نے بس خسارے سے

وہ جا چکا ہے مگر پھول کھل رہے ہیں ابھی

محبتوں کو تماشا بنا دیا اس نے

وہ ایک لمحہ جو تتلی سا اپنے بیچ میں ہے

اسے میں لے کے چلی ماہ و سال سے آگے

بچپن سے لین دین تھا اس کی سرشت میں

باتوں میں کاروبار سے آگے نہ جا سکا

اب سوچتی ہوں کیوں یہ سفر دائرے کا تھا

میں اس کے پر لگائے ہوئے تھی اڑان میں

عجیب رت ہے یہ ہجر و وصال سے آگے

کمال ہونے لگا ہے کمال سے آگے

عجب در پر سوالی تھا میں اس کو پھول کیا دیتی

وہ خود گلشن کا مالی تھا میں اس کو پھول کیا دیتی