iz.hār pe bhārī hai ḳhamoshī kā takallum

harfoñ kī zabāñ aur hai āñkhoñ kī zabāñ aur

izhaar pe bhaari hai KHamoshi ka takallum

harfon ki zaban aur hai aankhon ki zaban aur

kisī ke jaur-e-musalsal kā faiz hai 'aḳhgar'

vagarna dard hamāre suḳhan meñ kitnā thā

kisi ke jaur-e-musalsal ka faiz hai 'aKHgar'

wagarna dard hamare suKHan mein kitna tha

jo kushūd-e-kār-e-tilism hai vo faqat hamārā hī ism hai

vo girah kisī se khulegī kyā jo tirī jabīñ kī shikan meñ hai

jo kushud-e-kar-e-tilism hai wo faqat hamara hi ism hai

wo girah kisi se khulegi kya jo teri jabin ki shikan mein hai

be-shak asīr-e-gesū-e-jānāñ haiñ be-shumār

hai koī ishq meñ bhī giraftār dekhnā

be-shak asir-e-gesu-e-jaanan hain be-shumar

hai koi ishq mein bhi giraftar dekhna

ishq meñ dil kā ye manzar dekhā

aag meñ jaise samundar dekhā

ishq mein dil ka ye manzar dekha

aag mein jaise samundar dekha

kāfir sahī hazār magar is ko kyā kaheñ

ham par vo mehrbāñ hai musalmān kī tarah

kafir sahi hazar magar is ko kya kahen

hum par wo mehrban hai musalman ki tarah

aa.ine meñ hai faqat aap kā aks

aa.ina aap kī sūrat to nahīñ

aaine mein hai faqat aap ka aks

aaina aap ki surat to nahin

shāmil hue haiñ bazm meñ misl-e-charāġh ham

ab sub.h tak jaleñge lagātār dekhnā

shamil hue hain bazm mein misl-e-charagh hum

ab subh tak jalenge lagatar dekhna

vo kam-sinī meñ bhī 'aḳhgar' hasīn thā lekin

ab us ke husn kā aalam ajiib aalam hai

wo kam-sini mein bhi 'aKHgar' hasin tha lekin

ab us ke husn ka aalam ajib aalam hai

jo hai tāzgī mirī zaat meñ vahī zikr-o-fikr-e-chaman meñ hai

ki vajūd merā kahīñ bhī ho mirī ruuh mere vatan meñ hai

jo hai tazgi meri zat mein wahi zikr-o-fikr-e-chaman mein hai

ki wajud mera kahin bhi ho meri ruh mere watan mein hai

log milne ko chale aate haiñ dīvāne se

shahr kā ek ta.alluq to hai vīrāne se

log milne ko chale aate hain diwane se

shahr ka ek talluq to hai virane se

dekho hamārī samt ki zinda haiñ ham abhī

sachchā.iyoñ kī āḳhirī pahchān kī tarah

dekho hamari samt ki zinda hain hum abhi

sachchaiyon ki aaKHiri pahchan ki tarah

koī sāġhar pe sāġhar pī rahā hai koī tishna hai

murattab is tarah ā.īn-e-mai-ḳhāna nahīñ hotā

koi saghar pe saghar pi raha hai koi tishna hai

murattab is tarah aain-e-mai-KHana nahin hota

dekhiye rusvā na ho jaa.e kahīñ kār-e-junūñ

apne dīvāne ko ik patthar to maare jā.iye

dekhiye ruswa na ho jae kahin kar-e-junun

apne diwane ko ek patthar to mare jaiye

jab bhī us zulf-e-pareshāñ kī havā aatī hai

ham to ḳhushbū kī tarah ghar se nikal jaate haiñ

jab bhi us zulf-e-pareshan ki hawa aati hai

hum to KHushbu ki tarah ghar se nikal jate hain

tumhārī āñkhoñ kī gardishoñ meñ baḌī muravvat hai ham ne maanā

magar na itnī tasalliyāñ do ki dam nikal jaa.e aadmī kā

tumhaari aankhon ki gardishon mein baDi murawwat hai hum ne mana

magar na itni tasalliyan do ki dam nikal jae aadmi ka

jo musāfir bhī tire kūche se guzrā hogā

apnī nazroñ ko bhī dīvār samajhtā hogā

jo musafir bhi tere kuche se guzra hoga

apni nazron ko bhi diwar samajhta hoga

nigāheñ pherne vaale ye nazreñ uTh hī jaatī haiñ

kabhī begānagī vaj.h-e-shanāsā.ī bhī hotī hai

nigahen pherne wale ye nazren uTh hi jati hain

kabhi beganagi wajh-e-shanasai bhi hoti hai

hasīn sūrat hameñ hamesha hasīñ hī ma.alūm kyuuñ na hotī

hasīn andāz-e-dil-navāzī hasīn-tar naaz barhamī kā

hasin surat hamein hamesha hasin hi malum kyun na hoti

hasin andaz-e-dil-nawazi hasin-tar naz barhami ka

ajab hai aalam ajab hai manzar ki sakta meñ hai ye chashm-e-hairat

naqāb ulaT kar vo aa ga.e haiñ to aa.ine gungunā rahe haiñ

ajab hai aalam ajab hai manzar ki sakta mein hai ye chashm-e-hairat

naqab ulaT kar wo aa gae hain to aaine gunguna rahe hain

ye sāneha bhī baḌā ajab hai ki apne aivān-e-rañg-o-bū meñ

haiñ jam.a sab mahr o maah o anjum patā nahīñ phir bhī raushnī kā

ye saneha bhi baDa ajab hai ki apne aiwan-e-rang-o-bu mein

hain jama sab mahr o mah o anjum pata nahin phir bhi raushni ka

āñkhoñ meñ jal rahe the diye e'tibār ke

ehsās-e-zulmat-e-shab-e-hijrāñ nahīñ rahā

aankhon mein jal rahe the diye e'tibar ke

ehsas-e-zulmat-e-shab-e-hijran nahin raha

pūchhtī rahtī hai jo qaisar-o-kisrā kā mizāj

shaan ye ḳhāk-nashīnoñ meñ kahāñ se aa.ī

puchhti rahti hai jo qaisar-o-kisra ka mizaj

shan ye KHak-nashinon mein kahan se aai

bazm ko rañg-e-suḳhan maiñ ne diyā hai 'aḳhgar'

log chup chup the mirī tarz-e-navā se pahle

bazm ko rang-e-suKHan main ne diya hai 'aKHgar'

log chup chup the meri tarz-e-nawa se pahle

fuqdān-e-urūj-e-rasan-o-dār nahīñ hai

mansūr bahut haiñ lab-e-iz.hār nahīñ hai

fuqdan-e-uruj-e-rasan-o-dar nahin hai

mansur bahut hain lab-e-izhaar nahin hai

kushta-e-zabt-e-fuġhāñ naġhma-e-be-sāz-o-sadā

uf vo aañsū jo lahū ban ke Tapaktā hogā

kushta-e-zabt-e-fughan naghma-e-be-saz-o-sada

uf wo aansu jo lahu ban ke Tapakta hoga

yād-e-faroġh-e-dast-e-hinā.ī na pūchhiye

har zaḳhm-e-dil ko rashk-e-namak-dāñ banā diyā

yaad-e-farogh-e-dast-e-hinai na puchhiye

har zaKHm-e-dil ko rashk-e-namak-dan bana diya

ḳhalvat-e-jāñ meñ tirā dard basānā chāhe

dil samundar meñ bhī dīvār uThānā chāhe

KHalwat-e-jaan mein tera dard basana chahe

dil samundar mein bhi diwar uThana chahe

har taraf haiñ ḳhāna-barbādī ke manzar be-shumār

kuchh Thikāna hai bhalā is jazba-e-tāmīr kā

har taraf hain KHana-barbaadi ke manzar be-shumar

kuchh Thikana hai bhala is jazba-e-tamir ka

pal-bhar na bijliyoñ ke muqābil Thahar sake

itnā bhī kam-savād mirā āshiyāñ kahāñ

pal-bhar na bijliyon ke muqabil Thahar sake

itna bhi kam-sawad mera aashiyan kahan

har-chand hama-gīr nahīñ zauq-e-asīrī

har paañv meñ zanjīr hai maiñ dekh rahā huuñ

har-chand hama-gir nahin zauq-e-asiri

har panw mein zanjir hai main dekh raha hun

shadīd tund havā.eñ haiñ kyā kiyā jaa.e

sukūt-e-ġham kī sadā.eñ haiñ kyā kiyā jaa.e

shadid tund hawaen hain kya kiya jae

sukut-e-gham ki sadaen hain kya kiya jae