بہت حیرت زدہ ہے آئنہ بھی

کہ چہرے پر کوئی چہرہ نہیں ہے

نیند مت ڈھونڈ میری آنکھوں میں

سلوٹیں دیکھ میرے بستر پر

اس کو مطلب کا جب ملا موسم

رنگ اس کے تھے دیکھنے والے

تو بھی دیکھے گا ذرا رنگ اتر لیں تیرے

ہم ہی رکھتے ہیں تجھے یاد کہ سب رکھتے ہیں

کیوں مری داستاں کا حصہ ہیں

جو مری داستاں کے تھے ہی نہیں

یہ اس کے لمس کا جادو نہیں تو پھر کیا ہے

ہوا نے چوما ہے مجھ کو گلے ملی ہے شام

ایسا ہوں بد گمان کہ دستک تو اس نے دی

لیکن مرا خیال ہوا کی طرف گیا

یہ گواہی ترے سفر کی ہے

یہ تھکن کیوں اتارتا ہے میاں

سلوک ایسا نہیں اس کا پھر بھی جانے کیوں

وہ یاد آئے تو دل سے دعا نکلتی ہے

محبت ایسا دروازہ ہے خاورؔ

ہر اک دستک پہ جو کھلتا نہیں ہے

اظہار کی یہ بھی صورت تھی

خاموشی کو فریاد کیا

تم نے بہتا دریا دیکھا اور میں نے

پانی پر اک عکس ٹھہرتے دیکھا ہے

آئنے پر کوئی تہمت نہ دھرو

خال و خد اپنے سنوارو صاحب

کیسے کیسے موڑ آئے

عمر کی ایک کہانی میں

اک ترے عشق کے حوالے سے

کام کتنے یہاں نکل آئے

بہت وہ ساتھ رہا ہے بہت ہے یاد مجھے

اسے بھلانے کو خاورؔ یہ زندگی کم ہے

میری وحشت تو میاں مجھ میں تھی

یہ جو صحرا ہے کہاں تھا پہلے

کھلا تھا لفظ بھی جادو مثال ہوتے ہیں

وہ جب گلاب ہوا تھا گلاب کہنے سے