ڈاکٹر اسحاق وردگ خیبر پختونخوا سے تعلق رکھنے والے  اکیسویں صدی کی نئی نسل کےایسے شاعر ہیں جو اپنے جدید لہجے اور منفرد شاعری کی وجہ سے خیبر پختونخوا کے نمائندہ شاعر کی حیثیت سے پہچانے جاتے ہیں۔ اسحاق وردگ اپنی ادبی زندگی کے پہلے دور میں بچوں کے ادب سے وابستہ رہے۔ انھوں نے ساتویں جماعت سے بچوں کے رسائل میں لکھنے کا آغاز کیا۔ وہ خیبرپختونخوا کے پہلے شاعر ہیں۔ جنھیں بچوں کے ادب کے لئے، دعوت اکیڈمی انٹرنیشنل اسلامک یونی ورسٹی اسلام آباد نے "نشان اعزاز " عطا کیا۔ بچوں کے لیے کہانیوں کی کتاب "اور تتلیاں روٹھ گئیں" چھپ چکی ہے۔ وہ ادبی زندگی کے دوسرے دور میں اردو غزل و نظم کے جدت پسند شاعر کے طور پر سامنے آئے۔ اپنے منفرد لہجے کی بنا پر پاکستان اور بیرون پاکستان ان کی شاعری ناقدین کی توجہ حاصل کرنے میں کامیابی حاصل کر رہی ہے۔ اسحاق وردگ کو یہ امتیاز حاصل ہے کہ وہ غلام محمد قاصر مرحوم کے بعد پختونخوا کے دوسرے شاعر ہیں، جن  کی شاعری کو صاحب اسلوب شاعر ظفر اقبال نے نہ صرف سراہا بلکہ اپنے ادبی کالم میں کئی بار ان کی شاعری کا انتخاب بھی شائع کیا۔ ممتاز نقاد ڈاکٹر طارق ہاشمی اپنی کتاب ''شعریات ِ خیبر عصری تناظر'' میں ان  کی شاعری کے تجزیے میں لکھتے ہیں:
 ''اسحاق وردگ کے ہاں اِک توازن نظر آتا ہے تو ساتھ ہی وہ جدید پیرایوں کا شعور بھی رکھتا ہے ۔''
 اسحاق وردگ کے شعری رجحانات  میں مابعد الطبیعاتی رویہ ، تصوف، فرد کی تنہائی ،سیاسی المیوں ، پشاور میں دہشت گردی کا مسئلہ، شناخت کا مسئلہ، فلسفہء وجودیت اور انسانی اقدار کو نمایاں حثیت حاصل ہے۔ چند اشعار میں ان رویوں کی جھلک دیکھیں
مجھے اس موڑ پر مارا گیا ہے 
کہانی میں جہاں مرنا نہیں تھا
۔۔۔۔۔۔۔۔
مشکل ہے تجھے آگ کے دریا سے بچا لوں
اے شہر پشاور میں تجھے ہار گیا ہوں 
۔۔۔۔۔۔۔
وہ لوگ جو سورج کو بچانے نہیں نکلے 
اب راکھ کی بستی میں شرر ڈھونڈ رہے ہیں
 
2007 میں جب طویل تعطل کے بعد حلقہءارباب ذوق پشاور کا احیاء ہوا۔تو اسحاق وردگ عہد نو کے بانی سیکرٹری کے طور پر منتخب ہوئے۔ انھوں نے دہشتگردی اور بم دھماکوں کے باوجود حلقے کی نشستیں جاری رکھیں اور جدت پسند ادب کی تفہیم کے لیے اردو غزل، نظم، افسانہ، تنقید، ناول پر جدیدیت کے اثرات کے حوالے سے مذاکروں کا سلسلہ شروع کیا۔ 
ان کا پہلا شعری مجموعہ "شہر میں گاوءں کے پرندے" چھپنے جا رہا ہے۔
اسحاق وردگ 24 اپریل 1977 کو کوچہ رسالدار پشاور میں پیدا ہوئے۔ وہ ان دنوں بطور ایسوسی ایٹ پروفیسر شعبہءاردو گورنمنٹ پوسٹ گریجویٹ کالج تیمرگرہ دیر میں تدریس اردو ادب سے وابستہ ہیں۔