سبھی کردار تھک کر سو گئے ہیں

مگر اب تک کہانی چل رہی ہے

جینا تو الگ بات ہے مرنا بھی یہاں پر

ہر شخص کی اپنی ہی ضرورت کے لیے ہے

وقت گزر جاتا ہے لیکن دل کی رنجش

دل میں بیٹھی کی بیٹھی ہی رہ جاتی ہے

سچائی وہ جنگ ہے جس میں بعض اوقات سپاہی کو

آپ مقابل اپنے ہی ڈٹ جانا پڑتا ہے

وہ کچھ سے کچھ بنا ڈالے گا تسلیمات کے معنی

سلیقہ آ گیا اس کو اگر انکار کرنے کا

اپنے صحرا سے بندھے پیاس کے مارے ہوئے ہم

منتظر ہیں کہ ادھر کوئی کنواں آ نکلے

وہ کہ بن پا نہیں رہا مجھ سے

جو کہ شاید بنا رہا ہوں میں

بننے والی بات وہی ہوتی ہے وہ جو

بنتے بنتے یکسر بنتی رہ جاتی ہے

صبح ہوتی ہے تو کنج خوش گمانی میں کہیں

پھینک دی جاتی ہے شب بھر کی سیاہی باندھ کر

اک چنگاری آگ لگا جاتی ہے بن میں اور کبھی

ایک کرن سے ظلمت کو چھٹ جانا پڑتا ہے

یوں ہی بے کار میں پڑا خود کو

کار آمد بنا رہا ہوں میں

نہیں ہے کوئی بھی حتمی یہاں حد معلوم

ہر ایک انتہا اک اور انتہا تک ہے

دلوں کی شیشہ گری کارگاہ ہستی میں

ہنر کے زیر و زبر سے بھی ٹوٹ سکتی تھی

روح کے دامن سے اپنی دنیا داری باندھ کر

چل رہے ہیں دم بہ دم آنکھوں پہ پٹی باندھ کر