اردو کے جانے مانے شاعر جناب لیاقت علی عاصم 14 اگست 1951ء کو کراچی میں پیدا ہوئے۔ لیاقت علی عاصم اردو ڈکشنری بورڈ میں 1980ء سے 2011ء تک علم و ادب کی خدمت کرتے رہے اور بحیثیت ایڈیٹر اردو ڈکشنری بورڈ ریٹائر ہوئے۔ تین عشروں تک انہوں نے اردو ڈکشنری بورڈ میں خدمات انجام دیں۔ ان کے کل آٹھ شعری مجموعے اردو دُنیا میں مقبول ہوئے جن میں سبدِ گل (1970ء)، آنگن میں سمندر ( 1988ء)، رقصِ وصال (1996ء)، نشیبِ شہر (2008ء)، دل خراشی ( 2011ء)، باغ تو سارا جانے ہے ( 2013ء)، نیشِ عشق (2017ء) اور ان کے انتقال سے ایک ہفتے پہلے شایع ہونے والا شعری مجموعہ ’’میرے کَتبے پہ اُس کا نام لِکھو‘‘ شامل ہیں۔ ان کے تمام شعری مجموعے ’’یک جاں‘‘ کے زیرِ عنوان کلیات کی صورت میں شائع ہو چکے ہیں۔ 

29 جون 2019ء کو کراچی میں ان کا انتقال ہو گیا۔ وہ ایک عرصے سے سرطان کے مرض میں مبتلا تھے۔ انہیں محمد شاہ قبرستان نارتھ کراچی میں دفن کیا گیا۔