na koī ḳhvāb na ḳhvāhish na koī hangāma

ka.ī dinoñ se hai mausam 'ajab udāsī kā

na koi KHwab na KHwahish na koi hangama

kai dinon se hai mausam 'ajab udasi ka

āsmānoñ kī tamannā meñ zamīñ ke na rahe

ḳhvāb vo dekhe the ham ne ki kahīñ ke na rahe

aasmanon ki tamanna mein zamin ke na rahe

KHwab wo dekhe the hum ne ki kahin ke na rahe

abhī to maut ke ḳhvāboñ ke silsile haiñ magar

ham ek roz haqīqat meñ maare jā.eñge

abhi to maut ke KHwabon ke silsile hain magar

hum ek roz haqiqat mein mare jaenge

tire bayān kī shoḳhī se mujh ko ḳhadsha hai

tire ḳhayāl kī tā.īd kar na jā.ūñ maiñ

tere bayan ki shoKHi se mujh ko KHadsha hai

tere KHayal ki taid kar na jaun main

tasḳhīr-e-kā.enāt meñ masrūf hai magar

insān ke zavāl kā mausam hai in dinoñ

tasKHir-e-kaenat mein masruf hai magar

insan ke zawal ka mausam hai in dinon

sab ghūmte haiñ dard kī chādar lapeT kar

kyā dard hai ye kaun sā mātam hai in dinoñ

sab ghumte hain dard ki chadar lapeT kar

kya dard hai ye kaun sa matam hai in dinon

is baar to mahrūmī-e-ummīd ġhazab thī

ye bhī na rahā yaad ki kis shai kī talab thī

is bar to mahrumi-e-ummid ghazab thi

ye bhi na raha yaad ki kis shai ki talab thi

phir gire haiñ mire ehsās pe patthar ke gulāb

phir mire zehn se risne lagā ḳhush-bū kā lahū

phir gire hain mere ehsas pe patthar ke gulab

phir mere zehn se risne laga KHush-bu ka lahu

baaqī nahīñ rahī kisī jazbe meñ raushnī

rishtoñ kā e'tibār ḳhat-e-dūd ho ga.ī

baqi nahin rahi kisi jazbe mein raushni

rishton ka e'tibar KHat-e-dud ho gai

maiñ apnā zehn apnī nazar bechtā rahā

kāġhaz ke tājiroñ meñ hunar bechtā rahā

main apna zehn apni nazar bechta raha

kaghaz ke tajiron mein hunar bechta raha

usī kajravī kī sazā milī ki hamārī 'azmateñ chhin ga.iiñ

kabhī sach ko jhuuT banā diyā kabhī 'aib ko bhī hunar kiyā

usi kajrawi ki saza mili ki hamari 'azmaten chhin gain

kabhi sach ko jhuT bana diya kabhi 'aib ko bhi hunar kiya

itnā dabā huā thā zarūrat ke bojh se

miTTī ke mol lā'l-o-gauhar bechtā rahā

itna daba hua tha zarurat ke bojh se

miTTi ke mol la'l-o-gauhar bechta raha

zindagī ho ga.ī sūkhe hue pattoñ kī tarah

ab havāoñ kī hai marzī ki jidhar le jaa.eñ

zindagi ho gai sukhe hue patton ki tarah

ab hawaon ki hai marzi ki jidhar le jaen

tanhā.ī kī dīvār se lag kar tirī āñkheñ

mashkūk nigāhoñ se mujhe ghuur rahī haiñ

tanhai ki diwar se lag kar teri aankhen

mashkuk nigahon se mujhe ghur rahi hain

nashsha-e-shauq-e-safar TuuTā to ehsās huā

jis jagah kā hameñ honā thā vahīñ ke na rahe

nashsha-e-shauq-e-safar TuTa to ehsas hua

jis jagah ka hamein hona tha wahin ke na rahe