مقبول ذکی مقبول کا اصل نام مقبول حسین ہے۔ آپ یکم جنوری 1977ء کو ضلع لیّہ، پنجاب (پاکستان) میں پیدا ہوئے۔ آپ کے والد کا نام اقبال حسین ہے۔ پیشے کے اعتبار سے محکمۂ صحت سے وابستہ ہیں اور منکیرہ شہر، ضلع بھکر، پنجاب پاکستان میں سکونت پذیر ہیں۔

آپ نے باقاعدہ طور پر 2005ء میں شاعری اور 2014ء میں نثر نگاری کا آغاز کیا۔ ادب کے مختلف میدانوں میں آپ کی متعدد تصانیف منظرِ عام پر آچکی ہیں جن میں سجدہ، منتہائے فکر، سنہرے لوگ، روشن چہرے، اعترافِ فن: عاصم بخاری، شنذراتِ مقبول، یہ میرا بھکر، اندازِ بیاں دیکھ، عاصم بخاری: شخص اور شاعر، حُب دار قائم: جگمگاتا ستارہ اور حُسنِ بیان شامل ہیں۔

آپ کی ادبی خدمات پر غازی یونیورسٹی ڈیرہ غازی خان میں بی ایس اردو کے تین مقالے تحریر کیے جا چکے ہیں۔ آپ کی شخصیت اور فن پر ریحانہ بتول کی تصنیف مقبول ذکی مقبول کی ادبی مقبولیت شائع ہو چکی ہے جبکہ مقبول ذکی مقبول: خراجِ فن اشاعت کے مراحل میں ہے۔

مقبول ذکی مقبول بزمِ اوجِ ادب (بھکر) کے بانی چیئرمین ہیں۔ ادبی خدمات کے اعتراف میں آپ کو 6 گولڈ میڈلز، 26 ایوارڈز، 15 اسناد اور متعدد دیگر اعزازات سے نوازا جا چکا ہے۔ آپ ایک درجن سے زائد اخبارات، رسائل اور جرائد سے وابستہ رہے ہیں۔