کچھ آستینوں کی مجبوریاں بھی ہوتی ہیں

خوشی سے اپنی بھلا سانپ کون پالتا ہے

اس قدر اعتبار ٹھیک نہیں

تم مجھے جانتی ہی کتنا ہو

میری خاطر وہ کسی اور کو چھوڑ آیا ہے

اب کسی اور کی خاطر وہ مجھے چھوڑے گا

یہ عشق جذبۂ روحانیت ہے مانتا ہوں

مگر تو جسم کی مجبوریاں بھی سمجھا کر

اپنی رسوائیوں سے کیسے بچیں

لوگ اخبار بھی تو پڑھتے ہیں

میری ناکامیاں ہیں میری مگر

میری شہرت میں سب کا حصہ ہے

تجھ کو حق ہے تو دل دکھا میرا

میں تجھے پیار بھی تو کرتا ہوں

نیند میں بھی ہے شرم چہرے پر

خواب میں مجھ سے مل رہی ہو کیا

تم مرے خواب میں نہیں آنا

ٹوٹ جاتے ہیں میرے خواب سبھی

ان سمجھ داروں میں کوئی تو مری بات سنے

ان سمجھ داروں میں اک شخص تو پاگل نکلے

وہ مجھ کو ڈستا ہے پر زہر چھوڑتا ہی نہیں

لحاظ رکھتا ہے کچھ آستیں میں پلنے کا

جانے کیا حشر ہو ان موم صفت لوگوں کا

ان دنوں وقت کے سورج میں تمازت ہے بہت

ظلم کی ابتدا پہ ختم ہوئی

ضبط کی میرے انتہا آخر

پہلے ہنسنے تو دو مصیبت پر

پھر یہ سوچیں گے کیا کیا جائے

کیا کرتے اس سے ہاتھ ملا کر بتائیے

دل کیسے ملتا جس سے طبیعت نہیں ملی

آپ کی تلخیاں بھی سہ لوں گا

مجھ کو عادت ہے زہر پینے کی

خود کشی بھی حرام ہے یا رب

دل کی وحشت کا کیا علاج کروں

زمیں کے چہرے پہ اے خون ملنے والو سنو

زمیں ہلی تو تمہیں خاک میں ملا دے گی

وقت کے ساتھ حسن ڈھلتا ہے

تم مگر اب بھی خوبصورت ہو

بد سلوکی پہ تری ہم سے روایت کے امین

اب تجھے لوٹ کے گالی بھی نہیں دے سکتے

جب سے دیکھا ہے اس کے چہرے کو

تتلیاں اڑ رہی ہیں آنکھوں میں

ہم ترے ہجر کی سبھی راتیں

پی کے سگریٹ گزار دیتے ہیں

میری آنکھوں سے دیکھنے والے

اس کو بے حد حسین کہتے ہیں

جانے کیوں ہجر کے سبھی موسم

تیرے لہجے میں بات کرتے ہیں

میری بینائی چھین لی جس نے

آپ بھی وہ ہی خواب دیکھتے ہو

اس کو دیکھو کبھی اداسی میں

کس بلا کی حسین لگتی ہے

پھر وہی ضد کہ دل کو سمجھا لو

دل مری بات مانتا کب ہے

ہر ایک بار وفاؤں پہ ضرب لگتی ہے

ہر ایک بار مرا پیار ہار جاتا ہے