جب بھی والد کی جفا یاد آئی

اپنے دادا کی خطا یاد آئی

دشمنوں کی دشمنی میرے لیے آسان تھی

خرچ آیا دوستوں کی میزبانی میں بہت

اپنے دم سے ہے زمانے میں گھٹالوں کا وجود

ہم جہاں ہوں گے گھٹالے ہی گھٹالے ہوں گے

دوسری نے جو سنبھالی چپل

پہلی بیوی کی وفا یاد آئی

جب ہوا کالے کا گورے سے ملاپ

مل گئیں تاریکیاں تنویر سے

یہاں جتنے ہیں اپنے باپ کے ہیں

تمہارے باپ کا کوئی نہیں ہے

جل گیا کون میرے ہنسنے پر

''یہ دھواں سا کہاں سے اٹھتا ہے''

عشق اولاد کر رہی ہے مگر

میرا جینا حرام ہوتا ہے

کہا اٹھلا کے اس نے آئیے نا

یہاں میرے سوا کوئی نہیں ہے

زلف کے پیچ میں لٹکے ہوئے شاعر کا وجود

تھک چکا ہوگا اسے مل کے اتارو یارو

جھوٹ ہے دل نہ جاں سے اٹھتا ہے

یہ دھواں درمیاں سے اٹھتا ہے

شانتی والوں سے جب کرسی چھنی

سب کے سب ہڑبونگ ہلا بن گئے

ہم کہ ہیں بے گھر کوئی وارنٹ لائے گا کہاں

جرم کی آسانیاں ہیں لا مکانی میں بہت

درد تو اپنی کمائی کا ہوا کرتا ہے

باپ کا مال ہے کھا کھا کے ڈکارو یارو

جو حسن جوانوں کے لیے وقف ہے اس کو

اک بار تو بوڑھوں کو دکھانے کے لیے آ

دن میں کبھی ہاتھوں کی صفائی سے گرہ کاٹ

شب میں کبھی سامان چرانے کے لیے آ

دل میں لڈو سے پھوٹتے ہیں مرے

جب بھی وہ ہم کلام ہوتا ہے

حسن جب بیوی بنا ہم اس کے بعد

نون لکڑی تیل غلہ بن گئے

جن کے باطن میں اندھیرا ہی اندھیرا ہوگا

ان کے چہروں کے لیے نور کے ہالے ہوں گے

جوان گھر میں بڑھاپے کو کیوں کروں برداشت

ٹھکانا اپنا کہیں اور باپ ماں کر لیں

مار لاتا ہے جوتیاں دو چار

''جو ترے آستاں سے اٹھتا ہے''

دل کے فٹ پاتھ کو ہموار بنانے کے لئے

اس سے دس بیس حسینوں کو گزارو یارو

دبانا شرط ہے بجتے ہیں سارے

کھلونا بے صدا کوئی نہیں ہے

وہ محبت کے لین دین میں بھی

آرزوئیں ادھار کرتا ہے

پہلے ہوتا تھا نظر کے تیر سے

کام اب ہوتا ہے وہ کف گیر سے

بھوک کا کچھ اسے بھی ہو احساس

وہ ستم گر ادیب ہو جائے

پڑھا رہے ہیں جو بچوں کو ان جوانوں سے

یہ التجا ہے کہ سب پان کی دکاں کر لیں

دل کے بجائے کیسے وہ پہلو میں آ گیا

اے شیخ جی پڑھا یہ سبق کس کتاب میں