جب بھی والد کی جفا یاد آئی

اپنے دادا کی خطا یاد آئی

دشمنوں کی دشمنی میرے لیے آسان تھی

خرچ آیا دوستوں کی میزبانی میں بہت

یہاں جتنے ہیں اپنے باپ کے ہیں

تمہارے باپ کا کوئی نہیں ہے

دوسری نے جو سنبھالی چپل

پہلی بیوی کی وفا یاد آئی

جل گیا کون میرے ہنسنے پر

''یہ دھواں سا کہاں سے اٹھتا ہے''

عشق اولاد کر رہی ہے مگر

میرا جینا حرام ہوتا ہے

اپنے دم سے ہے زمانے میں گھٹالوں کا وجود

ہم جہاں ہوں گے گھٹالے ہی گھٹالے ہوں گے

زلف کے پیچ میں لٹکے ہوئے شاعر کا وجود

تھک چکا ہوگا اسے مل کے اتارو یارو

کہا اٹھلا کے اس نے آئیے نا

یہاں میرے سوا کوئی نہیں ہے

جھوٹ ہے دل نہ جاں سے اٹھتا ہے

یہ دھواں درمیاں سے اٹھتا ہے

جب ہوا کالے کا گورے سے ملاپ

مل گئیں تاریکیاں تنویر سے

مار لاتا ہے جوتیاں دو چار

''جو ترے آستاں سے اٹھتا ہے''

دبانا شرط ہے بجتے ہیں سارے

کھلونا بے صدا کوئی نہیں ہے