tū dard bhī duā bhī tū zaḳhm bhī davā bhī

shikve bhī haiñ tujhī se aur pyaar bhī tujhī se

tu dard bhi dua bhi tu zaKHm bhi dawa bhi

shikwe bhi hain tujhi se aur pyar bhi tujhi se

shaam kī shaam se sargoshī sunī thī ik baar

bas tabhī se tujhe imkān meñ rakkhā huā hai

sham ki sham se sargoshi suni thi ek bar

bas tabhi se tujhe imkan mein rakkha hua hai

kitnī vīrānī hai mere andar

kis qadar terī kamī hai mujh meñ

kitni virani hai mere andar

kis qadar teri kami hai mujh mein

bin tire vaqt hī guzartā hai

bin tire zindagī nahīñ hotī

bin tere waqt hi guzarta hai

bin tere zindagi nahin hoti

be-sabab ḳhāmushī nahīñ oḌhī

terī āñkhoñ kā hukm maanā hai

be-sabab KHamushi nahin oDhi

teri aankhon ka hukm mana hai

zindagī is qadar burī bhī nahīñ

dekh maiñ muskurā rahī huuñ nā

zindagi is qadar buri bhi nahin

dekh main muskura rahi hun na

koī to baat us kī maan letī

mohabbat umr meñ mujh se baḌī thī

koi to baat us ki man leti

mohabbat umr mein mujh se baDi thi

kitnī ḳhvāhisheñ dil meñ paltī haiñ magar 'nāhīd'

haath hī na.iiñ aate bhāgte hue lamhe

kitni KHwahishen dil mein palti hain magar 'nahid'

hath hi nain aate bhagte hue lamhe

reza reza honā bantā hai mirā

tum mukammal mere dil par utre ho

reza reza hona banta hai mera

tum mukammal mere dil par utre ho

ya.anī ki tū qadīm jazīra hai ishq kā

aur is meñ huuñ hunūt-shuda shāhzādī maiñ

yani ki tu qadim jazira hai ishq ka

aur is mein hun hunut-shuda shahzadi main

maan letī huuñ mukammal ho tum

maan letī huuñ kamī hai mujh meñ

man leti hun mukammal ho tum

man leti hun kami hai mujh mein

jaane kis samt uḌtā phirtā hai

merā ye dil tire ḳhayāl meñ gum

jaane kis samt uDta phirta hai

mera ye dil tere KHayal mein gum

ab to vo shahr-e-ḳhamoshāñ kā makīñ ho chukā hai

apnī āñkhoñ se mire aañsū bahāne vaalā

ab to wo shahr-e-KHamoshan ka makin ho chuka hai

apni aankhon se mere aansu bahane wala

mujhe dard kī bārishoñ meñ bahā kar

vo rahnā tirā be-ḳhabar yaad aayā

mujhe dard ki barishon mein baha kar

wo rahna tera be-KHabar yaad aaya

vo hijrateñ hoñ hijr ho yā qissa-e-visāl

aa phir se mere naam sabhī vāqi.āt kar

wo hijraten hon hijr ho ya qissa-e-visal

aa phir se mere nam sabhi waqiat kar

maiñ us ke dhyān meñ khoī huī thī

sabhī misre ġhazal ke saj ga.e haiñ

main us ke dhyan mein khoi hui thi

sabhi misre ghazal ke saj gae hain

shoḳh havāoñ ke āñchal meñ tham tham kar

shaam se hī haiñ dard purāne yaad aa.e

shoKH hawaon ke aanchal mein tham tham kar

sham se hi hain dard purane yaad aae

aur phir dil ne us ko chhoḌ diyā

jab ta'alluq bahāl thā hī nahīñ

aur phir dil ne us ko chhoD diya

jab ta'alluq bahaal tha hi nahin

ḳhushk hone hī nahīñ detī aañkh

vo jo sāvan kī jhaḌī hai mujh meñ

KHushk hone hi nahin deti aankh

wo jo sawan ki jhaDi hai mujh mein

sun kisī din to mire ġham kī kahānī

tujh ko dard-e-dil batānā chāhtī huuñ

sun kisi din to mere gham ki kahani

tujh ko dard-e-dil batana chahti hun

merī āñkheñ tirī diid kī lālchī

ya.anī tū mujh ko yūsuf-numā sāhibā

meri aankhen teri did ki lalchi

yani tu mujh ko yusuf-numa sahiba