تو درد بھی دعا بھی تو زخم بھی دوا بھی

شکوے بھی ہیں تجھی سے اور پیار بھی تجھی سے

شام کی شام سے سرگوشی سنی تھی اک بار

بس تبھی سے تجھے امکان میں رکھا ہوا ہے

کتنی ویرانی ہے میرے اندر

کس قدر تیری کمی ہے مجھ میں

بن ترے وقت ہی گزرتا ہے

بن ترے زندگی نہیں ہوتی

بے سبب خامشی نہیں اوڑھی

تیری آنکھوں کا حکم مانا ہے

زندگی اس قدر بری بھی نہیں

دیکھ میں مسکرا رہی ہوں نا

کوئی تو بات اس کی مان لیتی

محبت عمر میں مجھ سے بڑی تھی

کتنی خواہشیں دل میں پلتی ہیں مگر ناہیدؔ

ہاتھ ہی نئیں آتے بھاگتے ہوئے لمحے

ریزہ ریزہ ہونا بنتا ہے مرا

تم مکمل میرے دل پر اترے ہو

یعنی کہ تو قدیم جزیرہ ہے عشق کا

اور اس میں ہوں حنوط شدہ شاہزادی میں

مان لیتی ہوں مکمل ہو تم

مان لیتی ہوں کمی ہے مجھ میں

جانے کس سمت اڑتا پھرتا ہے

میرا یہ دل ترے خیال میں گم

اب تو وہ شہر خموشاں کا مکیں ہو چکا ہے

اپنی آنکھوں سے مرے آنسو بہانے والا

مجھے درد کی بارشوں میں بہا کر

وہ رہنا ترا بے خبر یاد آیا

وہ ہجرتیں ہوں ہجر ہو یا قصۂ وصال

آ پھر سے میرے نام سبھی واقعات کر

میں اس کے دھیان میں کھوئی ہوئی تھی

سبھی مصرعے غزل کے سج گئے ہیں

شوخ ہواؤں کے آنچل میں تھم تھم کر

شام سے ہی ہیں درد پرانے یاد آئے

اور پھر دل نے اس کو چھوڑ دیا

جب تعلق بحال تھا ہی نہیں

خشک ہونے ہی نہیں دیتی آنکھ

وہ جو ساون کی جھڑی ہے مجھ میں

سن کسی دن تو مرے غم کی کہانی

تجھ کو درد دل بتانا چاہتی ہوں

میری آنکھیں تری دید کی لالچی

یعنی تو مجھ کو یوسف نما صاحبا