terī yādeñ agar nahīñ hotīñ

itnī sardī meñ jam gaye hote

teri yaaden agar nahin hotin

itni sardi mein jam gaye hote

us kī yādoñ se bhare haiñ sabhī kamre ghar ke

kisī sāmān ko rakhne kī jagah hai hī nahīñ

us ki yaadon se bhare hain sabhi kamre ghar ke

kisi saman ko rakhne ki jagah hai hi nahin

sard mausam ye havā.eñ ye fazā aur ye saḌak

kisī gumnām sī manzil kā pata dete haiñ

sard mausam ye hawaen ye faza aur ye saDak

kisi gumnam si manzil ka pata dete hain

tujh se judā na hoñge ye sochā thā 'umr bhar

ye faisla tirā thā jo ye fāsla huā

tujh se juda na honge ye socha tha 'umr bhar

ye faisla tera tha jo ye fasla hua

jin ko mā'lūm nahīñ kyā hai taḌapnā dil kā

un se keh do ki bas ik baar mohabbat kar leñ

jin ko ma'lum nahin kya hai taDapna dil ka

un se keh do ki bas ek bar mohabbat kar len

usī kā zikr hai har dam usī kī bas talab mujh ko

ḳhayāl us kā hī us kā hai isī ko 'ishq kahte haiñ

usi ka zikr hai har dam usi ki bas talab mujh ko

KHayal us ka hi us ka hai isi ko 'ishq kahte hain

hamārā chāñd sar-e-bām aa rahā hogā

hameñ to 'iid use dekh kar manānī hai

hamara chand sar-e-baam aa raha hoga

hamein to 'id use dekh kar manani hai

bahut se chehre nazar meñ aa kar guzar chuke haiñ

tumhāre chehre kā is jahāñ meñ badal nahīñ hai

bahut se chehre nazar mein aa kar guzar chuke hain

tumhaare chehre ka is jahan mein badal nahin hai

safar tavīl hai is kā ḳhayāl mat karnā

ki har qadam se safar muḳhtasar bhī hotā hai

safar tawil hai is ka KHayal mat karna

ki har qadam se safar muKHtasar bhi hota hai

mire ḳhāmosh ashkoñ ko suno ḳhāmosh rahne do

qayāmat aa hī jā.egī agar ye bol baiTheñge

mere KHamosh ashkon ko suno KHamosh rahne do

qayamat aa hi jaegi agar ye bol baiThenge

'ātish' kī aabrū huuñ maiñ 'ġhālib' kī shaan huuñ

mujh se adab se miliye maiñ urdu zabān huuñ

'atish' ki aabru hun main 'ghaalib' ki shan hun

mujh se adab se miliye main urdu zaban hun

rātoñ kī niiñd ham ko bhī pyārī to thī bahut

shauq-e-suḳhan ne dekhiye jugnū banā diyā

raaton ki nind hum ko bhi pyari to thi bahut

shauq-e-suKHan ne dekhiye jugnu bana diya

mohabbat sīkhnī hai to zarā tum maut se sīkho

ye jab apnā banātī hai hamesha saath rahtī hai

mohabbat sikhni hai to zara tum maut se sikho

ye jab apna banati hai hamesha sath rahti hai

terī yādoñ kī tapish vo hai ki jis ke aage

maiñ hathelī pe bhī sūraj ko rakhūñ to kam hai

teri yaadon ki tapish wo hai ki jis ke aage

main hatheli pe bhi suraj ko rakhun to kam hai

maiñ aaj kisī aur kī paḌhtī huuñ kitābeñ

kal aur koī mujh ko kitāboñ meñ paḌhegā

main aaj kisi aur ki paDhti hun kitaben

kal aur koi mujh ko kitabon mein paDhega

the masīhā to masīhā.ī tumheñ karnī thī

tum ne jazbāt ko maslūb kiyā hai mere

the masiha to masihai tumhein karni thi

tum ne jazbaat ko maslub kiya hai mere

ḳhvāb koī āñkhoñ meñ dafn kar liyā maiñ ne

chaltī phirtī sī tab se ik mazār haiñ āñkheñ

KHwab koi aankhon mein dafn kar liya main ne

chalti phirti si tab se ek mazar hain aankhen