vo bastī nā-ḳhudāoñ kī thī lekin

mile kuchh Dūbne vaale vahāñ bhī

wo basti na-KHudaon ki thi lekin

mile kuchh Dubne wale wahan bhi

guftugū kar ke pareshāñ huuñ ki lahje meñ tire

vo khulā-pan hai ki dīvār huā jaatā hai

guftugu kar ke pareshan hun ki lahje mein tere

wo khula-pan hai ki diwar hua jata hai

tirī tarah nahīñ āsān vāpsī merī

maiñ rāstoñ ko samajhtā huā nahīñ aaya

teri tarah nahin aasan wapsi meri

main raston ko samajhta hua nahin aaya

shāyad use zarūrat ho ab parde kī

raushniyāñ ghar kī maddham kar jā.ūñ maiñ

shayad use zarurat ho ab parde ki

raushniyan ghar ki maddham kar jaun main

ab mujhe kaun jiit saktā hai

tū mire dil kā āḳhirī Dar thā

ab mujhe kaun jit sakta hai

tu mere dil ka aaKHiri Dar tha

bahut bhaTke to ham samjhe haiñ ye baat

burā aisā nahīñ apnā makāñ bhī

bahut bhaTke to hum samjhe hain ye baat

bura aisa nahin apna makan bhi

raat thī jab tumhārā shahr aayā

phir bhī khiḌkī to maiñ ne khol hī lī

raat thi jab tumhaara shahr aaya

phir bhi khiDki to main ne khol hi li

vahāñ iid kyā vahāñ diid kyā

jahāñ chāñd raat na aa.ī ho

wahan id kya wahan did kya

jahan chand raat na aai ho

pata thā mujh ko mulāqāt ġhair-mumkin hai

so terā dhyān kiyā aur gulāb chuum liyā

pata tha mujh ko mulaqat ghair-mumkin hai

so tera dhyan kiya aur gulab chum liya

nayā yuuñ hai ki an-dekhā hai sab kuchh

yahāñ tak raushnī aatī kahāñ thī

naya yun hai ki an-dekha hai sab kuchh

yahan tak raushni aati kahan thi

kabhī ḳhud ko chhū kar nahīñ dekhtā huuñ

ḳhudā jaane kis vahm meñ mubtalā huuñ

kabhi KHud ko chhu kar nahin dekhta hun

KHuda jaane kis wahm mein mubtala hun

bhiiḌ meñ jab tak rahte haiñ joshīle haiñ

alag alag ham log bahut sharmīle haiñ

bhiD mein jab tak rahte hain joshile hain

alag alag hum log bahut sharmile hain

bīnā.ī bhī kyā kyā dhoke detī hai

duur se dekho saare dariyā niile haiñ

binai bhi kya kya dhoke deti hai

dur se dekho sare dariya nile hain

larazte kāñpte hāthoñ se būḌhā

chilam meñ phir koī dukh bhar rahā thā

larazte kanpte hathon se buDha

chilam mein phir koi dukh bhar raha tha

nahīñ maiñ hausla to kar rahā thā

zarā tere sukūñ se Dar rahā thā

nahin main hausla to kar raha tha

zara tere sukun se Dar raha tha

maut ne saarī raat hamārī nabz TaTolī

aisā marne kā māhaul banāyā ham ne

maut ne sari raat hamari nabz TaToli

aisa marne ka mahaul banaya hum ne

kahāñ sochā thā maiñ ne bazm-ārā.ī se pahle

ye merī āḳhirī mahfil hai tanhā.ī se pahle

kahan socha tha main ne bazm-arai se pahle

ye meri aaKHiri mahfil hai tanhai se pahle

rakheñ kyūñkar hisāb ek ek pal kā

balā se roz kam hote hue ham

rakhen kyunkar hisab ek ek pal ka

bala se roz kam hote hue hum

bahut himmat kā hai ye kaam 'shāriq'

ki sharmāte nahīñ Darte hue ham

bahut himmat ka hai ye kaam 'shaariq'

ki sharmate nahin Darte hue hum

haiñ ab is fikr meñ Duube hue ham

use kaise lage rote hue ham

hain ab is fikr mein Dube hue hum

use kaise lage rote hue hum

abhī to achchhī lagegī kuchh din judā.ī kī rut

abhī hamāre liye ye sab kuchh nayā nayā hai

abhi to achchhi lagegi kuchh din judai ki rut

abhi hamare liye ye sab kuchh naya naya hai

faisle auroñ ke kartā huuñ

apnī sazā kaTtī rahtī hai

faisle auron ke karta hun

apni saza kaTti rahti hai

aao gale mil kar ye dekheñ

ab ham meñ kitnī duurī hai

aao gale mil kar ye dekhen

ab hum mein kitni duri hai

duniyā shāyad bhuul rahī hai

chāhat kuchh ūñchā suntī hai

duniya shayad bhul rahi hai

chahat kuchh uncha sunti hai

patā nahīñ ye tamannā-e-qurb kab jaagī

mujhe to sirf use sochne kī aadat thī

pata nahin ye tamanna-e-qurb kab jagi

mujhe to sirf use sochne ki aadat thi

ga.e bhī jaan se aur koī mutma.in na huā

ki phir difā.a na karne kī ham pe tohmat thī

gae bhi jaan se aur koi mutmain na hua

ki phir difaa na karne ki hum pe tohmat thi

vo baat soch ke maiñ jis ko muddatoñ jiitā

bichhaḌte vaqt batāne kī kyā zarūrat thī

wo baat soch ke main jis ko muddaton jita

bichhaDte waqt batane ki kya zarurat thi

kaise TukḌoñ meñ use kar luuñ qubūl

jo mirā saare kā saarā thā kabhī

kaise TukDon mein use kar lun qubul

jo mera sare ka sara tha kabhi

pahlī baar vo ḳhat likkhā thā

jis kā javāb bhī aa saktā thā

pahli bar wo KHat likkha tha

jis ka jawab bhi aa sakta tha

kam se kam duniyā se itnā mirā rishta ho jaa.e

koī merā bhī burā chāhne vaalā ho jaa.e

kam se kam duniya se itna mera rishta ho jae

koi mera bhi bura chahne wala ho jae

ye sach hai duniyā bahut hasīñ hai

magar mirī umr kī nahīñ hai

ye sach hai duniya bahut hasin hai

magar meri umr ki nahin hai

kaun kahe ma.asūm hamārā bachpan thā

khel meñ bhī to aadhā aadhā āñgan thā

kaun kahe masum hamara bachpan tha

khel mein bhi to aadha aadha aangan tha

jhuuT par us ke bharosā kar liyā

dhuup itnī thī ki saayā kar liyā

jhuT par us ke bharosa kar liya

dhup itni thi ki saya kar liya

qurb kā us ke uThā kar fā.eda

hijr kā sāmāñ ikaTThā kar liyā

qurb ka us ke uTha kar faeda

hijr ka saman ikaTTha kar liya

saarī duniyā se laḌe jis ke liye

ek din us se bhī jhagḌā kar liyā

sari duniya se laDe jis ke liye

ek din us se bhi jhagDa kar liya

manziloñ par ham mileñ ye tai huā

vāpsī meñ saath pakkā kar liyā

manzilon par hum milen ye tai hua

wapsi mein sath pakka kar liya

intihā tak baat le jaatā huuñ maiñ

ab use aise hī samjhātā huuñ maiñ

intiha tak baat le jata hun main

ab use aise hi samjhata hun main

fāsla rakh ke bhī kyā hāsil huā

aaj bhī us kā hī kahlātā huuñ maiñ

fasla rakh ke bhi kya hasil hua

aaj bhi us ka hi kahlata hun main

ghar meñ ḳhud ko qaid to maiñ ne aaj kiyā hai

tab bhī tanhā thā jab mahfil mahfil thā maiñ

ghar mein KHud ko qaid to main ne aaj kiya hai

tab bhi tanha tha jab mahfil mahfil tha main

kahīñ na thā vo dariyā jis kā sāhil thā maiñ

aañkh khulī to ik sahrā ke muqābil thā maiñ

kahin na tha wo dariya jis ka sahil tha main

aankh khuli to ek sahra ke muqabil tha main

kaun thā vo jis ne ye haal kiyā hai merā

kis ko itnī āsānī se hāsil thā maiñ

kaun tha wo jis ne ye haal kiya hai mera

kis ko itni aasani se hasil tha main

kis ehsās-e-jurm kī sab karte haiñ tavaqqo

ik kirdār kiyā thā jis meñ qātil thā maiñ

kis ehsas-e-jurm ki sab karte hain tawaqqo

ek kirdar kiya tha jis mein qatil tha main

jin par maiñ thoḌā sā bhī āsān huā huuñ

vahī batā sakte haiñ kitnā mushkil thā maiñ

jin par main thoDa sa bhi aasan hua hun

wahi bata sakte hain kitna mushkil tha main

ho sabab kuchh bhī mire aañkh bachāne kā magar

saaf kar duuñ ki nazar kam nahīñ aatā hai mujhe

ho sabab kuchh bhi mere aankh bachane ka magar

saf kar dun ki nazar kam nahin aata hai mujhe

maiñ kisī dūsre pahlū se use kyuuñ sochūñ

yuuñ bhī achchhā hai vo jaisā nazar aatā hai mujhe

main kisi dusre pahlu se use kyun sochun

yun bhi achchha hai wo jaisa nazar aata hai mujhe

log sah lete the hañs kar kabhī be-zārī bhī

ab to mashkūk huī apnī milan-sārī bhī

log sah lete the hans kar kabhi be-zari bhi

ab to mashkuk hui apni milan-sari bhi

kis tarah aa.e haiñ is pahlī mulāqāt talak

aur mukammal hai judā hone kī tayyārī bhī

kis tarah aae hain is pahli mulaqat talak

aur mukammal hai juda hone ki tayyari bhi

umr bhar kis ne bhalā ġhaur se dekhā thā mujhe

vaqt kam ho to sajā detī hai bīmārī bhī

umr bhar kis ne bhala ghaur se dekha tha mujhe

waqt kam ho to saja deti hai bimari bhi

niiñd ke vāste vaise bhī zarūrī hai thakan

pyaas bhaḌkā.eñ kisī saa.e kā pīchhā kar aa.eñ

nind ke waste waise bhi zaruri hai thakan

pyas bhaDkaen kisi sae ka pichha kar aaen

ek muddat huī ghar se nikle hue

apne māhaul meñ ḳhud ko dekhe hue

ek muddat hui ghar se nikle hue

apne mahaul mein KHud ko dekhe hue