bazm-e-falak meñ kaun hai us kī rā'nā.ī kā mahram-e-rāz

kis ko apne dāman-e-dil ke daaġh dikhā.egā mahtāb

bazm-e-falak mein kaun hai us ki ra'nai ka mahram-e-raaz

kis ko apne daman-e-dil ke dagh dikhaega mahtab

kyā pā sakegī duniyā hamāre dukhoñ kā ramz

rote haiñ qahqahoñ se to hañste haiñ phuuT ke

kya pa sakegi duniya hamare dukhon ka ramz

rote hain qahqahon se to hanste hain phuT ke

ai naqsh-gar yaqīn kar achchhā nahīñ banā

lā phir se kā.enāt kā naqsha banā.ūñ maiñ

ai naqsh-gar yaqin kar achchha nahin bana

la phir se kaenat ka naqsha banaun main

bachchoñ ke haath meñ bhalā dete haiñ aisī chiiz

dekho ḳharāb ho ga.ī mujh se ye zindagī

bachchon ke hath mein bhala dete hain aisi chiz

dekho KHarab ho gai mujh se ye zindagi

hāsil huā hai tujh ko mujhī se shu'ūr-e-zāt

maiñ terā aa.ina huuñ mirā ehtirām kar

hasil hua hai tujh ko mujhi se shu'ur-e-zat

main tera aaina hun mera ehtiram kar

mo'jizāt-e-dast-e-kun dekhnā thā so ham ne

pattharoñ pe de maarā ḳhud ko ā.īna kar ke

mo'jizat-e-dast-e-kun dekhna tha so hum ne

pattharon pe de mara KHud ko aaina kar ke

kūza-gar kis ko mayassar rahī fursat terī

kyoñ hameñ chaak se 'ujlat meñ utārā tū ne

kuza-gar kis ko mayassar rahi fursat teri

kyon hamein chaak se 'ujlat mein utara tu ne

palaT ke harzā-sarāoñ ko kis liye duuñ javāb

bhalā batāo ye laa.iq haiñ muñh lagāne ke

palaT ke harza-saraon ko kis liye dun jawab

bhala batao ye laiq hain munh lagane ke

agar maiñ chāhūñ bas ik chaal se ulaT duuñ bisāt

mujhe ḳhabar hai kahāñ kis ne daao khelā hai

agar main chahun bas ek chaal se ulaT dun bisat

mujhe KHabar hai kahan kis ne dao khela hai

shikastagī thī kuchh aisī ki kūza-gar merā

banā ke mujh ko baḌī der tak udaas rahā

shikastagi thi kuchh aisi ki kuza-gar mera

bana ke mujh ko baDi der tak udas raha