مسافروں سے محبت کی بات کر لیکن

مسافروں کی محبت کا اعتبار نہ کر

وہی دیا کہ تھیں عاجز ہوائیں جن سے عمرؔ

کسی کے پھر نہ جلائے جلا بجھا ایسا

طاری ہے ہر طرف جو یہ عالم سکوت کا

طوفاں کا پیش خیمہ سمجھ خامشی نہیں

چلے جو دھوپ میں منزل تھی ان کی

ہمیں تو کھا گیا سایہ شجر کا

باہر باہر سناٹا ہے اندر اندر شور بہت

دل کی گھنی بستی میں یارو آن بسے ہیں چور بہت

اٹھا یہ شور وہیں سے صداؤں کا کیوں کر

وہ آدمی تو سنا اپنے گھر میں تنہا تھا

جو تیر آیا گلے مل کے دل سے لوٹ گیا

وہ اپنے فن میں میں اپنے ہنر میں تنہا تھا

اس اک دئیے سے ہوئے کس قدر دئیے روشن

وہ اک دیا جو کبھی بام و در میں تنہا تھا

برا سہی میں پہ نیت بری نہیں میری

مرے گناہ بھی کار ثواب میں لکھنا

چھپ کر نہ رہ سکے گا وہ ہم سے کہ اس کو ہم

پہچان لیں گے اس کی کسی اک ادا سے بھی

اکثر ہوا ہے یہ کہ خود اپنی تلاش میں

آگے نکل گئے ہیں حد ماسوا سے بھی

وہ چپ لگی ہے کہ ہنستا ہے اور نہ روتا ہے

یہ ہو گیا ہے خدا جانے دل کو رات سے کیا