zamīñ uThegī nahīñ āsmāñ jhukegā nahīñ

anā-parast haiñ donoñ ke ḳhāndān bahut

zamin uThegi nahin aasman jhukega nahin

ana-parast hain donon ke KHandan bahut

ek hī rang meñ jiine kā hunar sīkhā hai

ham se har baat pe chehra nahīñ badlā jaatā

ek hi rang mein jine ka hunar sikha hai

hum se har baat pe chehra nahin badla jata

bas ek pal kī tamannā-e-vasl kī ḳhātir

tamām 'umr lagā dī ga.ī sañvarne meñ

bas ek pal ki tamanna-e-wasl ki KHatir

tamam 'umr laga di gai sanwarne mein

chhupā rahtā hai dast-e-ārzū ḳhuddār logoñ kā

baḌī mushkil se apnī zaat kā iz.hār karte haiñ

chhupa rahta hai dast-e-arzu KHuddar logon ka

baDi mushkil se apni zat ka izhaar karte hain

is bhiiḌ meñ duniyā kī ham tum na bichhaḌ jaa.eñ

maiñ tum pe nazar rakkhūñ tum mujh pe nazar rakhnā

is bhiD mein duniya ki hum tum na bichhaD jaen

main tum pe nazar rakkhun tum mujh pe nazar rakhna