وہ خوش کلام ہے ایسا کہ اس کے پاس ہمیں

طویل رہنا بھی لگتا ہے مختصر رہنا

کھلی کتاب تھی پھولوں بھری زمیں میری

کتاب میری تھی رنگ کتاب اس کا تھا

اتنا نہ پاس آ کہ تجھے ڈھونڈتے پھریں

اتنا نہ دور جا کے ہمہ وقت پاس ہو

سفر طویل سہی حاصل سفر یہ ہے

وہاں کو بھول گئے اور یہاں کو پہچانا

اس کی آواز میں تھے سارے خد و خال اس کے

وہ چہکتا تھا تو ہنستے تھے پر و بال اس کے

عجب طرح سے گزاری ہے زندگی ہم نے

جہاں میں رہ کے نہ کار جہاں کو پہچانا

یا ابر کرم بن کے برس خشک زمیں پر

یا پیاس کے صحرا میں مجھے جینا سکھا دے

چلو اپنی بھی جانب اب چلیں ہم

یہ رستہ دیر سے سونا پڑا ہے

خود اپنے غم ہی سے کی پہلے دوستی ہم نے

اور اس کے بعد غم دوستاں کو پہچانا

منظر تھا راکھ اور طبیعت اداس تھی

ہر چند تیری یاد مرے آس پاس تھی

ریت پر چھوڑ گیا نقش ہزاروں اپنے

کسی پاگل کی طرح نقش مٹانے والا

آہستہ بات کر کہ ہوا تیز ہے بہت

ایسا نہ ہو کہ سارا نگر بولنے لگے

یہ کس حساب سے کی تو نے روشنی تقسیم

ستارے مجھ کو ملے ماہتاب اس کا تھا

یا رب تری رحمت کا طلب گار ہے یہ بھی

تھوڑی سی مرے شہر کو بھی آب و ہوا دے

عمر بھر اس نے بے وفائی کی

عمر سے بھی وہ باوفا نہ رہا

لازم کہاں کہ سارا جہاں خوش لباس ہو

میلا بدن پہن کے نہ اتنا اداس ہو

دھوپ کے ساتھ گیا ساتھ نبھانے والا

اب کہاں آئے گا وہ لوٹ کے آنے والا

کیسے کہوں کہ میں نے کہاں کا سفر کیا

آکاش بے چراغ زمیں بے لباس تھی

ایسے بڑھے کہ منزلیں رستے میں بچھ گئیں

ایسے گئے کہ پھر نہ کبھی لوٹنا ہوا

سمیٹتا رہا خود کو میں عمر بھر لیکن

بکھیرتا رہا شبنم کا سلسلہ مجھ کو

کہنے کو چند گام تھا یہ عرصۂ حیات

لیکن تمام عمر ہی چلنا پڑا تجھے

تھی نیند میری مگر اس میں خواب اس کا تھا

بدن مرا تھا بدن میں عذاب اس کا تھا

دئیے بجھے تو ہوا کو کیا گیا بد نام

قصور ہم نے کیا احتساب اس کا تھا

اب تو آرام کریں سوچتی آنکھیں میری

رات کا آخری تارا بھی ہے جانے والا

جبین سنگ پہ لکھا مرا فسانہ گیا

میں رہ گزر تھا مجھے روند کر زمانہ گیا

کرنا پڑے گا اپنے ہی سائے میں اب قیام

چاروں طرف ہے دھوپ کا صحرا بچھا ہوا

پہنا دے چاندنی کو قبا اپنے جسم کی

اس کا بدن بھی تیری طرح بے لباس ہو

قسمت ہی میں روشنی نہیں تھی

بادل تو کبھی کا چھٹ رہا تھا

یہ کیسی آنکھ تھی جو رو پڑی ہے

یہ کیسا خواب تھا جو بجھ گیا ہے

وہ اپنی عمر کو پہلے پرو لیتا ہے ڈوری میں

پھر اس کے بعد گنتی عمر کی دن رات کرتا ہے

بند اس نے کر لیے تھے گھر کے دروازے اگر

پھر کھلا کیوں رہ گیا تھا ایک در میرے لیے

کس کی خوشبو نے بھر دیا تھا اسے

اس کے اندر کوئی خلا نہ رہا

سکھا دیا ہے زمانے نے بے بصر رہنا

خبر کی آنچ میں جل کر بھی بے خبر رہنا

تیرگی بے آبرو تھی اور تجلی بے وقار

اک تھکا ہارا سا جگنو کس قدر دلگیر تھا