اے گردش ایام ہمیں رنج بہت ہے

کچھ خواب تھے ایسے کہ بکھرنے کے نہیں تھے

میں چپ رہا تو آنکھ سے آنسو ابل پڑے

جب بولنے لگا مری آواز پھٹ گئی

یہ محبت ہے اسے دیکھ تماشا نہ بنا

مجھ سے ملنا ہے تو مل حد ادب سے آگے

چھوڑ آیا ہوں پیچھے سب آوازوں کو

خاموشی میں داخل ہونے والا ہوں

آخر یہ ناکام محبت کام آئی

تجھ کو کھو کر میں نے خود کو پایا ہے

ایک مدت میں خموشی سے رہا محو کلام

تب کہیں جا کے یہ لفظوں میں معانی آئے

اس سے آگے جاؤ گے تب جانیں گے

منزل تک تو راستہ تم کو لایا ہے

جب بھی گھر کے اندر دیکھنے لگتا ہوں

کھڑکی کھول کے باہر دیکھنے لگتا ہوں

جانے کیا بات ہے پورے ہی نہیں ہوتے ہیں

جانے کیا دل میں خسارے لیے پھرتا ہوں میں

دکھ نہ سہنے کی سزاؤں میں گھرا رہتا ہے

شہر کا شہر دعاؤں میں گھرا رہتا ہے

اک جیسے ہیں دکھ سکھ سب کے اک جیسی امیدیں

ایک کہانی سب کی کیا عنوان کسی کا رکھیں

یہ الگ بات کہ چلتے رہے سب سے آگے

ورنہ دیکھا ہی نہیں تیری طلب سے آگے

تعلق ہی نہیں ہے جن سے میرا

میں ان خدشات میں رکھا ہوا ہوں

زمانے ہو گئے ہیں چلتے چلتے

کہاں جاتا یہ دل کا راستہ ہے

صرف ہم ہی تو نہیں ٹوٹے ہیں

راستوں پر بھی تھکن طاری ہے

کھڑکی تو شاذؔ بند میں کرتا ہوں بار بار

لیکن ہوائے شوق کہ ضد پر اڑی رہے

ان کو بھی اتارا ہے بڑے شوق سے ہم نے

جو نقش ابھی دل میں اترنے کے نہیں تھے

کچھ بھی دیکھا نہیں تھا میں نے جب

ہر نظارہ تھا میری آنکھوں میں

اپنے ہی بس پیچھے بھاگتا رہتا ہوں

خود کو ہی بس آگے نظر کے رکھا ہے

شاذؔ خود میں ہی گنوائے ہوئے خود کو رکھنا

ہاتھ جب تک نہ کوئی اپنی نشانی آئے

کس قیامت کی گھٹن طاری ہے

روح پر کب سے بدن طاری ہے

یہ کیسے موڑ پر میں آ گیا ہوں

کہ چلتا ہوں تو چلتا راستہ ہے

کیسے کہہ دوں بیچ اپنے دیوار ہے جب

چھوڑنے کوئی دروازے تک آیا ہے

پھاندنی پڑ گئی کانٹوں سے بھری باڑ ہمیں

جتنے پیغام تھے پھولوں کی زبانی آئے