چائے پر اشعار

چھوڑ آیا تھا میز پر چائے

یہ جدائی کا استعارا تھا

آج پھر چائے بناتے ہوئے وہ یاد آیا

آج پھر چائے میں پتی نہیں ڈالی میں نے

شعر جیسا بھی ہو اس شہر میں پڑھ سکتے ہو

چائے جیسی بھی ہو آسام میں بک جاتی ہے

دھیان اک بیتے ملن کے دوار

لب چائے کی پیالی پر

تیری ٹینشن میں پینا بھول گئی

چائے تو سامنے رکھی ہوئی تھی

چائے میں مت ملائیے شکر کہ ہے ضرر رساں

شامل مٹھاس واسطے اپنا لعاب کیجیے

ایک چائے کیا جان دیتی میں

شکریہ ایسے کہہ رہا تھا وہ

کبھی تو بیٹھ کے یاروں کے ساتھ چائے پی

کبھی تو بیٹھ کے فرصت سے دن گزارا کر

کپ میں گرمی دکھا رہی تھی بہت

چائے ساسر میں ڈال دی میں نے

چائے کی پیالی میں نیلی ٹیبلٹ گھولی

سہمے سہمے ہاتھوں نے اک کتاب پھر کھولی

آ میرے ساتھ بیٹھ مرے ساتھ چائے پی

آ میرے ساتھ میرے دلائل پہ بات کر

ٹھنڈی چائے کی پیالی پی کے

رات کی پیاس بجھائی ہے

پھر چائے میں بسکٹ کی طرح بھوکی سی یہ شام

کھا جائے گی سورج کو سمندر میں ڈبا کر

سستے میں ان کو بھولنا اچھا لگا ہے آج

چائے کا ایک گھونٹ بھی کافی رہا ہے آج

گرم موسم میں گرم چائے بھی

بد مزاجوں کا پیار لگتی ہے

تیرے ہاتھ کی چائے تو پی تھی

دل کا رنج تو دل میں رہا تھا

ہنس پڑی شام کی اداس فضا

اس طرح چائے کی پیالی ہنسی

آ ترے سنگ ذرا پینگ بڑھائی جائے

زندگی بیٹھ تجھے چائے پلائی جائے

میں اس کی چائے کی پیالی تھی لیکن

اسے پینے کی جرأت ہی نہیں تھی

اس کا خیال دل میں گھڑی دو گھڑی رہے

پھر اس کے بعد میز پہ چائے پڑی رہے

وہ چائے پی رہا تھا کسی دوسرے کے ساتھ

مجھ پر نگاہ پڑتے ہی کچھ جھینپ سا گیا

چائے پینا تو اک بہانہ تھا

آرزو دل کی ترجمانی تھی

نہیں ہے گھر میں تری یاد کے علاوہ کچھ

تو کس کے سامنے چائے بنا کے رکھتی ہوں

پھر کہیں بیٹھ کے پی جائے اکٹھے چائے

پھر کوئی شام کا پل ساتھ گزارا جائے

شام کی چائے ان کے ساتھ پیوں

دل کی حسرت بہت پرانی ہے

چائے کے تلخ گھونٹ سے اٹھتا ہوا غبار

وہ انتظار شام وہ منظر کہاں گیا

چائے کی برکت سے خالی ہیں

دیر میں اکثر اٹھنے والے

آپ اخبار دیکھیے تب تک

میں ابھی چائے لے کر آتی ہوں

چائے کے کپ میں ابلی

اخباروں کی سرخی دھوپ

میں نے چائے جو پیش کی تھی اسے

اک تکلف میں پڑ گیا تھا وہ

شب ڈھلی اٹھنے لگے ہوٹل سے لوگ

چائے کا یہ دور اس کے نام پر

تھوڑی دیر میں ٹرین نکلنے والی ہے

سن تھوڑی ہی دیر میں چائے آتی ہے

شاعری چائے تری یاد چمکتے جگنو

بس یہی چار طلب روز مری شام کے ہیں

چائے میں ڈال کر عشاق اسے پی جاتے

در حقیقت لب معشوق جو شکر ہوتا

چائے کے ایک کپ کا یہی ہے معاوضہ

یاروں کو عہد رفتہ کے قصے سنائیے

ہم جہاں چائے پینے جاتے تھے

کیا وہاں اب بھی آیا کرتے تھے

نام میرا یاد کرکے چسکیوں کے بیچ میں

کیا ہوئی ہے چائے کے کپ میں ترے ہلچل کبھی

چائے میرے ہاتھ سے گرنے والی تھی

اس نے اس انداز سے گھورا توبہ ہے

گرم چائے پی ہے تیری یاد کی

تشنہ لب ہوں شربت دیدار کا

ہیں دسترس میں ابھی بھی طاہرؔ اٹھا کے اب اس کو پی بھی ڈالو

مشاہدوں میں ہی ہو گئی گر یہ ٹھنڈی چائے تو کیا کرو گے

سامنے رکھ کے چائے کی پیالی

چسکی چسکی تری کمی چکھی

بھاپ اڑاڑ کے میری چائے سے

اس کا پیکر بناتی رہتی ہے

لو چائے میں بھی چائے کی پتی نہیں ڈالی

تم کو تو محبت کے سوا کچھ نہیں آتا

شام کی چائے کا وعدہ وہ ادھر بھول گئے

ہم ادھر صبح سے تیار ہوئے بیٹھے ہیں

میں نے پوچھا ہے کہ چائے کے لیے وقت کوئی

ہنس کے بولی ہے اشارے سے گھڑی ٹھیک نہیں

چائے میں اس کے پستاں تھے

میرا بدن پانی میں تھا

ایسی چائے کبھی نہ پی میں نے

سچ بتا تو نے اس میں کیا ڈالا

روز ہم چائے ساتھ پیتے تھے

بات آگے کبھی بڑھی ہی نہیں