manzil jise samajhte the yārān-e-qāfila

pahuñche jo us jagah to faqat sañg-e-mīl thā

manzil jise samajhte the yaran-e-qafila

pahunche jo us jagah to faqat sang-e-mil tha

dard-e-dil ne lī na thī karvaT abhī

un ke māthe pe pasīnā aa gayā

dard-e-dil ne li na thi karwaT abhi

un ke mathe pe pasina aa gaya

vo tirī zulf kā saaya ho ki āġhosh tirā

mil gayā ho kabhī ārām mujhe yaad nahīñ

wo teri zulf ka saya ho ki aaghosh tera

mil gaya ho kabhi aaram mujhe yaad nahin

marne ke ba.ad koī pashemāñ huā to kyā

mātam-kada jo gor-e-ġharībāñ huā to kyā

marne ke baad koi pasheman hua to kya

matam-kada jo gor-e-ghariban hua to kya

kārvāñ to nikal gayā kosoñ

raah bhaTke hue kahāñ jaa.eñ

karwan to nikal gaya koson

rah bhaTke hue kahan jaen

husn jis haal meñ nazar aayā

ham ne us haal meñ parastish kī

husn jis haal mein nazar aaya

hum ne us haal mein parastish ki

vaa.e nākāmī-e-qismat ki bhañvar se bach kar

lab-e-sāhil pe jo aa.e to kagārā TuuTā

wae nakaami-e-qismat ki bhanwar se bach kar

lab-e-sahil pe jo aae to kagara TuTa

tirī javān umañgoñ ko ho gayā hai kyā

Darī Darī sī mohabbat mujhe pasand nahīñ

teri jawan umangon ko ho gaya hai kya

Dari Dari si mohabbat mujhe pasand nahin

rumūz-e-ishq kī gahrā.iyāñ salāmat haiñ

hamāre ḳhvāb-e-pareshāñ kisī ko kyā ma.alūm

rumuz-e-ishq ki gahraiyan salamat hain

hamare KHwab-e-pareshan kisi ko kya malum

shikva nahīñ duniyā ke sanam-hā-e-girāñ kā

afsos ki kuchh phuul tumhāre bhī mile haiñ

shikwa nahin duniya ke sanam-ha-e-giran ka

afsos ki kuchh phul tumhaare bhi mile hain

dūsroñ ko fareb de de kar

ham ne ḳhud bhī fareb khāyā hai

dusron ko fareb de de kar

hum ne KHud bhi fareb khaya hai

ye raat yūñhī basar ho ga.ī to kyā hogā

tire baġhair sahar ho ga.ī to kyā hogā

ye raat yunhi basar ho gai to kya hoga

tere baghair sahar ho gai to kya hoga

yaad aa.e haiñ uff gunah kyā kyā

haath uThā.e haiñ jab duā ke liye

yaad aae hain uff gunah kya kya

hath uThae hain jab dua ke liye

burī taqdīr ke rone se hāsil

talab ho gar to vīrāne bahut haiñ

buri taqdir ke rone se hasil

talab ho gar to virane bahut hain

tū hī batā de kaise kāTūñ

raat aur aisī kaalī raat

tu hi bata de kaise kaTun

raat aur aisi kali raat

saaf kahiye ki pyaar karte haiñ

ye nigāhoñ kā qaul-e-mub.ham kyā

saf kahiye ki pyar karte hain

ye nigahon ka qaul-e-mubham kya

mujh ko sukūñ kī chain kī pazhmurdagī se kyā

har roz ek taaza qayāmat kī aarzū

mujh ko sukun ki chain ki pazhmurdagi se kya

har roz ek taza qayamat ki aarzu

log kahte rahe qarīb hai vo

ham ne DhūñDā to duur duur na thā

log kahte rahe qarib hai wo

hum ne DhunDa to dur dur na tha

maiñ ne tanhā.iyoñ ke lamhoñ meñ

tum ko akasr qarīb paayā hai

main ne tanhaiyon ke lamhon mein

tum ko akasr qarib paya hai

kitne hī phuul chun liye maiñ ne

kitne hī phuul rah ga.e baaqī

kitne hi phul chun liye main ne

kitne hi phul rah gae baqi

uljhī thiiñ jin nasīm se kaliyāñ ḳhabar na thī

pahuñchegī bū-e-nāz mire pairahan se duur

uljhi thin jin nasim se kaliyan KHabar na thi

pahunchegi bu-e-naz mere pairahan se dur

yaad itnā hai ki maiñ hosh gañvā baiThā thā

chhuT gayā haath se kab jaam mujhe yaad nahīñ

yaad itna hai ki main hosh ganwa baiTha tha

chhuT gaya hath se kab jam mujhe yaad nahin

junūñ ke kaif-o-kam se āgahī tujh ko nahīñ nāseh

guzartī hai jo dīvānoñ pe dīvāne samajhte haiñ

junun ke kaif-o-kam se aagahi tujh ko nahin naseh

guzarti hai jo diwanon pe diwane samajhte hain

ahl-e-dil ne kiye ta.amīr haqīqat ke sutūñ

ahl-e-duniyā ko rivāyāt pe ronā aayā

ahl-e-dil ne kiye tamir haqiqat ke sutun

ahl-e-duniya ko riwayat pe rona aaya

aql ne tark-e-ta.alluq ko ġhanīmat jaanā

dil ko badle hue hālāt pe ronā aayā

aql ne tark-e-talluq ko ghanimat jaana

dil ko badle hue haalat pe rona aaya