یاد آئے ہیں اف گنہ کیا کیا

ہاتھ اٹھائے ہیں جب دعا کے لئے

اہل دل نے کئے تعمیر حقیقت کے ستوں

اہل دنیا کو روایات پہ رونا آیا

تو ہی بتا دے کیسے کاٹوں

رات اور ایسی کالی رات

حسن جس حال میں نظر آیا

ہم نے اس حال میں پرستش کی

عقل نے ترک تعلق کو غنیمت جانا

دل کو بدلے ہوئے حالات پہ رونا آیا

کتنے ہی پھول چن لئے میں نے

کتنے ہی پھول رہ گئے باقی

صاف کہئے کہ پیار کرتے ہیں

یہ نگاہوں کا قول مبہم کیا

جنوں کے کیف و کم سے آگہی تجھ کو نہیں ناصح

گزرتی ہے جو دیوانوں پہ دیوانے سمجھتے ہیں

لوگ کہتے رہے قریب ہے وہ

ہم نے ڈھونڈا تو دور دور نہ تھا

منزل جسے سمجھتے تھے یاران قافلہ

پہنچے جو اس جگہ تو فقط سنگ میل تھا

یاد اتنا ہے کہ میں ہوش گنوا بیٹھا تھا

چھٹ گیا ہاتھ سے کب جام مجھے یاد نہیں

وہ تری زلف کا سایہ ہو کہ آغوش ترا

مل گیا ہو کبھی آرام مجھے یاد نہیں

تری جوان امنگوں کو ہو گیا ہے کیا

ڈری ڈری سی محبت مجھے پسند نہیں

یہ رات یونہی بسر ہو گئی تو کیا ہوگا

ترے بغیر سحر ہو گئی تو کیا ہوگا

میں نے تنہائیوں کے لمحوں میں

تم کو اکثر قریب پایا ہے

کارواں تو نکل گیا کوسوں

راہ بھٹکے ہوئے کہاں جائیں

شکوہ نہیں دنیا کے صنم ہائے گراں کا

افسوس کہ کچھ پھول تمہارے بھی ملے ہیں

دوسروں کو فریب دے دے کر

ہم نے خود بھی فریب کھایا ہے

مرنے کے بعد کوئی پشیماں ہوا تو کیا

ماتم کدہ جو گور غریباں ہوا تو کیا

مجھ کو سکوں کی چین کی پژمردگی سے کیا

ہر روز ایک تازہ قیامت کی آرزو

بری تقدیر کے رونے سے حاصل

طلب ہو گر تو ویرانے بہت ہیں

وائے ناکامئ قسمت کہ بھنور سے بچ کر

لب ساحل پہ جو آئے تو کگارا ٹوٹا

رموز عشق کی گہرائیاں سلامت ہیں

ہمارے خواب پریشاں کسی کو کیا معلوم

درد دل نے لی نہ تھی کروٹ ابھی

ان کے ماتھے پہ پسینا آ گیا

الجھی تھیں جن نسیم سے کلیاں خبر نہ تھی

پہنچے گی بوئے ناز مرے پیرہن سے دور