maiñ zindagī ke sabhī ġham bhulā.e baiThā huuñ

tumhāre ishq se kitnī mujhe sahūlat hai

main zindagi ke sabhi gham bhulae baiTha hun

tumhaare ishq se kitni mujhe sahulat hai

kis qadar mahdūd kar detā hai ġham insān ko

ḳhatm kar detā hai har ummīd har imkān ko

kis qadar mahdud kar deta hai gham insan ko

KHatm kar deta hai har ummid har imkan ko

guzar ga.ī hai magar roz yaad aatī hai

vo ek shaam jise bhūlne kī hasrat hai

guzar gai hai magar roz yaad aati hai

wo ek sham jise bhulne ki hasrat hai

khiḌkī ke raste se laayā kartā huuñ

maiñ bāhar kī duniyā ḳhālī kamre meñ

khiDki ke raste se laya karta hun

main bahar ki duniya KHali kamre mein

kitne haiñ log ḳhud ko jo kho kar udaas haiñ

aur kitne apne-āp ko pā kar bhī ḳhush nahīñ

kitne hain log KHud ko jo kho kar udas hain

aur kitne apne-ap ko pa kar bhi KHush nahin

jo hameñ pā ke bhī khone se bahut pīchhe thā

ham use kho ke bhī paane se bahut aage haiñ

jo hamein pa ke bhi khone se bahut pichhe tha

hum use kho ke bhi pane se bahut aage hain

vo dāstān mukammal kare to achchhā hai

mujhe milā hai zarā sā sirā kahānī kā

wo dastan mukammal kare to achchha hai

mujhe mila hai zara sa sira kahani ka

koī aa ke hameñ DhūñDegā to kho jā.egā

ham na.e ġham meñ purāne se bahut aage haiñ

koi aa ke hamein DhunDega to kho jaega

hum nae gham mein purane se bahut aage hain

bas ek rañg hai dil meñ kisī ke hone se

ab apne-āp ko is se bhī saada kyā karnā

bas ek rang hai dil mein kisi ke hone se

ab apne-ap ko is se bhi sada kya karna

ab to ye shāyad kisī bhī kaam aa saktā nahīñ

aap hī le jā.iye mere dil-e-nādān ko

ab to ye shayad kisi bhi kaam aa sakta nahin

aap hi le jaiye mere dil-e-nadan ko

aayā thā mere paas vo kuchh der ke liye

sūraj magar gahan meñ bahut der tak rahā

aaya tha mere pas wo kuchh der ke liye

suraj magar gahan mein bahut der tak raha

havā bahār kī aa.egī aur maiñ chūmūñgā

vo saare phuul ki jin meñ tirī shabāhat hai

hawa bahaar ki aaegi aur main chumunga

wo sare phul ki jin mein teri shabahat hai

jo vo nahīñ thā to maiñ muttafiq thā logoñ se

vo mere sāmne aayā to iḳhtilāf kiyā

jo wo nahin tha to main muttafiq tha logon se

wo mere samne aaya to iKHtilaf kiya