Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "biga.d"

نظم کے متعلقہ نتیجہ "biga.d"

نظم

کیوں زیاں کار بنوں سود فراموش رہوں
فکر فردا نہ کروں محو غم دوش رہوں
نالے بلبل کے سنوں اور ہمہ تن گوش رہوں
ہم نوا میں بھی کوئی گل ہوں کہ خاموش رہوں
جرأت آموز مری تاب سخن ہے مجھ کو
شکوہ اللہ سے خاکم بدہن ہے مجھ کو
ہے بجا شیوۂ تسلیم میں مشہور ہیں ہم
قصۂ درد سناتے ہیں کہ مجبور ہیں ہم
ساز خاموش ہیں فریاد سے معمور ہیں ہم
نالہ آتا ہے اگر لب پہ تو معذور ہیں ہم
اے خدا شکوۂ ارباب وفا بھی سن لے
خوگر حمد سے تھوڑا سا گلہ بھی سن لے
تھی تو موجود ازل سے ہی تری ذات قدیم
پھول تھا زیب چمن پر نہ پریشاں تھی شمیم
شرط انصاف ہے اے صاحب الطاف عمیم
بوئے گل پھیلتی کس طرح جو ہوتی نہ نسیم
ہم کو جمعیت خاطر یہ پریشانی تھی
ورنہ امت ترے محبوب کی دیوانی تھی
ہم سے پہلے تھا عجب تیرے جہاں کا منظر
کہیں مسجود تھے پتھر کہیں معبود شجر
خوگر پیکر محسوس تھی انساں کی نظر
مانتا پھر کوئی ان دیکھے خدا کو کیونکر
تجھ کو معلوم ہے لیتا تھا کوئی نام ترا
قوت بازوئے مسلم نے کیا کام ترا
بس رہے تھے یہیں سلجوق بھی تورانی بھی
اہل چیں چین میں ایران میں ساسانی بھی
اسی معمورے میں آباد تھے یونانی بھی
اسی دنیا میں یہودی بھی تھے نصرانی بھی
پر ترے نام پہ تلوار اٹھائی کس نے
بات جو بگڑی ہوئی تھی وہ بنائی کس نے
تھے ہمیں ایک ترے معرکہ آراؤں میں
خشکیوں میں کبھی لڑتے کبھی دریاؤں میں
دیں اذانیں کبھی یورپ کے کلیساؤں میں
کبھی ایفریقا کے تپتے ہوئے صحراؤں میں
شان آنکھوں میں نہ جچتی تھی جہانداروں کی
کلمہ پڑھتے تھے ہمیں چھاؤں میں تلواروں کی
ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے
تھی نہ کچھ تیغ زنی اپنی حکومت کے لیے
سر بکف پھرتے تھے کیا دہر میں دولت کے لیے
قوم اپنی جو زرو و مال جہاں پر مرتی
بت فروشی کے عوض بت شکنی کیوں کرتی
ٹل نہ سکتے تھے اگر جنگ میں اڑ جاتے تھے
پاؤں شیروں کے بھی میداں سے اکھڑ جاتے تھے
تجھ سے سرکش ہوا کوئی تو بگڑ جاتے تھے
تیغ کیا چیز ہے ہم توپ سے لڑ جاتے تھے
نقش توحید کا ہر دل پہ بٹھایا ہم نے
زیر خنجر بھی یہ پیغام سنایا ہم نے
تو ہی کہہ دے کہ اکھاڑا در خیبر کس نے
شہر قیصر کا جو تھا اس کو کیا سر کس نے
توڑے مخلوق خدا وندوں کے پیکر کس نے
کاٹ کر رکھ دئیے کفار کے لشکر کس نے
کس نے ٹھنڈا کیا آتشکدۂ ایراں کو
کس نے پھر زندہ کیا تذکرۂ یزداں کو
کون سی قوم فقط تیری طلب گار ہوئی
اور تیرے لیے زحمت کش پیکار ہوئی
کس کی شمشیر جہانگیر جہاں دار ہوئی
کس کی تکبیر سے دنیا تری بیدار ہوئی
کس کی ہیبت سے صنم سہمے ہوئے رہتے تھے
منہ کے بل گر کے ہو اللہ احد کہتے تھے
آ گیا عین لڑائی میں اگر وقت نماز
قبلہ رو ہو کے زمیں بوس ہوئی ہوئی قوم حجاز
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے
محفل کون و مکاں میں سحر و شام پھرے
مئے توحید کو لے کر صفت جام پھرے
کوہ میں دشت میں لے کر ترا پیغام پھرے
اور معلوم ہے تجھ کو کبھی ناکام پھرے
دشت تو دشت ہیں دریا بھی نہ چھوڑے ہم نے
بحر ظلمات میں دوڑا دئیے گھوڑے ہم نے
صفحۂ دہر سے باطل کو مٹایا ہم نے
نوع انساں کو غلامی سے چھڑایا ہم نے
تیرے کعبے کو جبینوں سے بسایا ہم نے
تیرے قرآن کو سینوں سے لگایا ہم نے
پھر بھی ہم سے یہ گلہ ہے کہ وفادار نہیں
ہم وفادار نہیں تو بھی تو دل دار نہیں
امتیں اور بھی ہیں ان میں گنہ گار بھی ہیں
عجز والے بھی ہیں مست مئے پندار بھی ہیں
ان میں کاہل بھی ہیں غافل بھی ہیں ہشیار بھی ہیں
سیکڑوں ہیں کہ ترے نام سے بے زار بھی ہیں
رحمتیں ہیں تری اغیار کے کاشانوں پر
برق گرتی ہے تو بے چارے مسلمانوں پر
بت صنم خانوں میں کہتے ہیں مسلمان گئے
ہے خوشی ان کو کہ کعبے کے نگہبان گئے
منزل دہر سے اونٹوں کے حدی خوان گئے
اپنی بغلوں میں دبائے ہوئے قرآن گئے
خندہ زن کفر ہے احساس تجھے ہے کہ نہیں
اپنی توحید کا کچھ پاس تجھے ہے کہ نہیں
یہ شکایت نہیں ہیں ان کے خزانے معمور
نہیں محفل میں جنہیں بات بھی کرنے کا شعور
قہر تو یہ ہے کہ کافر کو ملیں حور و قصور
اور بے چارے مسلماں کو فقط وعدۂ حور
اب وہ الطاف نہیں ہم پہ عنایات نہیں
بات یہ کیا ہے کہ پہلی سی مدارات نہیں
کیوں مسلمانوں میں ہے دولت دنیا نایاب
تیری قدرت تو ہے وہ جس کی نہ حد ہے نہ حساب
تو جو چاہے تو اٹھے سینۂ صحرا سے حباب
رہرو دشت ہو سیلی زدۂ موج سراب
طعن اغیار ہے رسوائی ہے ناداری ہے
کیا ترے نام پہ مرنے کا عوض خواری ہے
بنی اغیار کی اب چاہنے والی دنیا
رہ گئی اپنے لیے ایک خیالی دنیا
ہم تو رخصت ہوئے اوروں نے سنبھالی دنیا
پھر نہ کہنا ہوئی توحید سے خالی دنیا
ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے جام رہے
تیری محفل بھی گئی چاہنے والے بھی گئے
شب کی آہیں بھی گئیں صبح کے نالے بھی گئے
دل تجھے دے بھی گئے اپنا صلہ لے بھی گئے
آ کے بیٹھے بھی نہ تھے اور نکالے بھی گئے
آئے عشاق گئے وعدۂ فردا لے کر
اب انہیں ڈھونڈ چراغ رخ زیبا لے کر
درد لیلیٰ بھی وہی قیس کا پہلو بھی وہی
نجد کے دشت و جبل میں رم آہو بھی وہی
عشق کا دل بھی وہی حسن کا جادو بھی وہی
امت احمد مرسل بھی وہی تو بھی وہی
پھر یہ آرزدگئ غیر سبب کیا معنی
اپنے شیداؤں پہ یہ چشم غضب کیا معنی
تجھ کو چھوڑا کہ رسول عربی کو چھوڑا
بت گری پیشہ کیا بت شکنی کو چھوڑا
عشق کو عشق کی آشفتہ سری کو چھوڑا
رسم سلمان و اویس قرنی کو چھوڑا
آگ تکبیر کی سینوں میں دبی رکھتے ہیں
زندگی مثل بلال حبشی رکھتے ہیں
عشق کی خیر وہ پہلی سی ادا بھی نہ سہی
جادہ پیمائی تسلیم و رضا بھی نہ سہی
مضطرب دل صفت قبلہ نما بھی نہ سہی
اور پابندی آئین وفا بھی نہ سہی
کبھی ہم سے کبھی غیروں سے شناسائی ہے
بات کہنے کی نہیں تو بھی تو ہرجائی ہے
سر فاراں پہ کیا دین کو کامل تو نے
اک اشارے میں ہزاروں کے لیے دل تو نے
آتش اندوز کیا عشق کا حاصل تو نے
پھونک دی گرمئ رخسار سے محفل تو نے
آج کیوں سینے ہمارے شرر آباد نہیں
ہم وہی سوختہ ساماں ہیں تجھے یاد نہیں
وادیٔ نجد میں وہ شور سلاسل نہ رہا
قیس دیوانۂ نظارۂ محمل نہ رہا
حوصلے وہ نہ رہے ہم نہ رہے دل نہ رہا
گھر یہ اجڑا ہے کہ تو رونق محفل نہ رہا
اے خوشا آں روز کہ آئی و بصد ناز آئی
بے حجابانہ سوئے محفل ما باز آئی
بادہ کش غیر ہیں گلشن میں لب جو بیٹھے
سنتے ہیں جام بکف نغمۂ کو کو بیٹھے
دور ہنگامۂ گلزار سے یکسو بیٹھے
تیرے دیوانے بھی ہیں منتظر ہو بیٹھے
اپنے پروانوں کو پھر ذوق خود افروزی دے
برق دیرینہ کو فرمان جگر سوزی دے
قوم آوارہ عناں تاب ہے پھر سوئے حجاز
لے اڑا بلبل بے پر کو مذاق پرواز
مضطرب باغ کے ہر غنچے میں ہے بوئے نیاز
تو ذرا چھیڑ تو دے تشنۂ مضراب ہے ساز
نغمے بیتاب ہیں تاروں سے نکلنے کے لیے
طور مضطر ہے اسی آگ میں جلنے کے لیے
مشکلیں امت مرحوم کی آساں کر دے
مور بے مایہ کو ہمدوش سلیماں کر دے
جنس نایاب محبت کو پھر ارزاں کر دے
ہند کے دیر نشینوں کو مسلماں کر دے
جوئے خوں می چکد از حسرت دیرینۂ ما
می تپد نالہ بہ نشتر کدۂ سینۂ ما
بوئے گل لے گئی بیرون چمن راز چمن
کیا قیامت ہے کہ خود پھول ہیں غماز چمن
عہد گل ختم ہوا ٹوٹ گیا ساز چمن
اڑ گئے ڈالیوں سے زمزمہ پرداز چمن
ایک بلبل ہے کہ ہے محو ترنم اب تک
اس کے سینے میں ہے نغموں کا تلاطم اب تک
قمریاں شاخ صنوبر سے گریزاں بھی ہوئیں
پتیاں پھول کی جھڑ جھڑ کے پریشاں بھی ہوئیں
وہ پرانی روشیں باغ کی ویراں بھی ہوئیں
ڈالیاں پیرہن برگ سے عریاں بھی ہوئیں
قید موسم سے طبیعت رہی آزاد اس کی
کاش گلشن میں سمجھتا کوئی فریاد اس کی
لطف مرنے میں ہے باقی نہ مزہ جینے میں
کچھ مزہ ہے تو یہی خون جگر پینے میں
کتنے بیتاب ہیں جوہر مرے آئینے میں
کس قدر جلوے تڑپتے ہیں مرے سینے میں
اس گلستاں میں مگر دیکھنے والے ہی نہیں
داغ جو سینے میں رکھتے ہوں وہ لالے ہی نہیں
چاک اس بلبل تنہا کی نوا سے دل ہوں
جاگنے والے اسی بانگ درا سے دل ہوں
یعنی پھر زندہ نئے عہد وفا سے دل ہوں
پھر اسی بادۂ دیرینہ کے پیاسے دل ہوں
عجمی خم ہے تو کیا مے تو حجازی ہے مری
نغمہ ہندی ہے تو کیا لے تو حجازی ہے مری

علامہ اقبال
نظم

آج کی شب تو بہت کچھ ہے مگر کل کے لیے
ایک اندیشۂ بے نام ہے اور کچھ بھی نہیں
دیکھنا یہ ہے کہ کل تجھ سے ملاقات کے بعد
رنگ امید کھلے گا کہ بکھر جائے گا
وقت پرواز کرے گا کہ ٹھہر جائے گا
جیت ہو جائے گی یا کھیل بگڑ جائے گا
خواب کا شہر رہے گا کہ اجڑ جائے گا

پروین شاکر
نظم

مگر یہ سطریں بڑی عجب ہیں
کہیں توازن بگڑ گیا ہے
یا کوئی سیون ادھڑ گئی ہے:
''فرار ہوں میں کئی دنوں سے
جو گھپ اندھیرے کی تیر جیسی سرنگ اک کان سے
شروع ہو کے دوسرے کان تک گئی ہے،
میں اس نلی میں چھپا ہوا ہوں،
تم آ کے تنکے سے مجھ کو باہر نکال لینا

گلزار
نظم

رخصت ہوا وہ باپ سے لے کر خدا کا نام
راہ وفا کی منزل اول ہوئی تمام
منظور تھا جو ماں کی زیارت کا انتظام
دامن سے اشک پونچھ کے دل سے کیا کلام
اظہار بے کسی سے ستم ہوگا اور بھی
دیکھا ہمیں اداس تو غم ہوگا اور بھی
دل کو سنبھالتا ہوا آخر وہ نونہال
خاموش ماں کے پاس گیا صورت خیال
دیکھا تو ایک در میں ہے بیٹھی وہ خستہ حال
سکتا سا ہو گیا ہے یہ ہے شدت ملال
تن میں لہو کا نام نہیں زرد رنگ ہے
گویا بشر نہیں کوئی تصویر سنگ ہے
کیا جانے کس خیال میں گم تھی وہ بے گناہ
نور نظر یہ دیدۂ حسرت سے کی نگاہ
جنبش ہوئی لبوں کو بھری ایک سرد آہ
لی گوشہ ہائے چشم سے اشکوں نے رخ کی راہ
چہرہ کا رنگ حالت دل کھولنے لگا
ہر موئے تن زباں کی طرح بولنے لگا
آخر اسیر یاس کا قفل دہن کھلا
افسانۂ شدائد رنج و محن کھلا
اک دفتر مظالم چرخ کہن کھلا
وا تھا دہان زخم کہ باب سخن کھلا
درد دل غریب جو صرف بیاں ہوا
خون جگر کا رنگ سخن سے عیاں ہوا
رو کر کہا خموش کھڑے کیوں ہو میری جاں
میں جانتی ہوں جس لیے آئے ہو تم یہاں
سب کی خوشی یہی ہے تو صحرا کو ہو رواں
لیکن میں اپنے منہ سے نہ ہرگز کہوں گی ہاں
کس طرح بن میں آنکھوں کے تارے کو بھیج دوں
جوگی بنا کے راج دلارے کو بھیج دوں
دنیا کا ہو گیا ہے یہ کیسا لہو سپید
اندھا کیے ہوئے ہے زر و مال کی امید
انجام کیا ہو کوئی نہیں جانتا یہ بھید
سوچے بشر تو جسم ہو لرزاں مثال بید
لکھی ہے کیا حیات ابد ان کے واسطے
پھیلا رہے ہیں جال یہ کس دن کے واسطے
لیتی کسی فقیر کے گھر میں اگر جنم
ہوتے نہ میری جان کو سامان یہ بہم
ڈستا نہ سانپ بن کے مجھے شوکت و حشم
تم میرے لال تھے مجھے کس سلطنت سے کم
میں خوش ہوں پھونک دے کوئی اس تخت و تاج کو
تم ہی نہیں تو آگ لگا دوں گی راج کو
کن کن ریاضتوں سے گزارے ہیں ماہ و سال
دیکھی تمہاری شکل جب اے میرے نونہال
پورا ہوا جو بیاہ کا ارمان تھا کمال
آفت یہ آئی مجھ پہ ہوئے جب سفید بال
چھٹتی ہوں ان سے جوگ لیا جن کے واسطے
کیا سب کیا تھا میں نے اسی دن کے واسطے
ایسے بھی نامراد بہت آئیں گے نظر
گھر جن کے بے چراغ رہے آہ عمر بھر
رہتا مرا بھی نخل تمنا جو بے ثمر
یہ جائے صبر تھی کہ دعا میں نہیں اثر
لیکن یہاں تو بن کے مقدر بگڑ گیا
پھل پھول لا کے باغ تمنا اجڑ گیا
سرزد ہوئے تھے مجھ سے خدا جانے کیا گناہ
منجدھار میں جو یوں مری کشتی ہوئی تباہ
آتی نظر نہیں کوئی امن و اماں کی راہ
اب یاں سے کوچ ہو تو عدم میں ملے پناہ
تقصیر میری خالق عالم بہل کرے
آسان مجھ غریب کی مشکل اجل کرے
سن کر زباں سے ماں کی یہ فریاد درد خیز
اس خستہ جاں کے دل پہ چلی غم کی تیغ تیز
عالم یہ تھا قریب کہ آنکھیں ہوں اشک ریز
لیکن ہزار ضبط سے رونے سے کی گریز
سوچا یہی کہ جان سے بیکس گزر نہ جائے
ناشاد ہم کو دیکھ کے ماں اور مر نہ جائے
پھر عرض کی یہ مادر ناشاد کے حضور
مایوس کیوں ہیں آپ الم کا ہے کیوں وفور
صدمہ یہ شاق عالم پیری میں ہے ضرور
لیکن نہ دل سے کیجیے صبر و قرار دور
شاید خزاں سے شکل عیاں ہو بہار کی
کچھ مصلحت اسی میں ہو پروردگار کی
یہ جعل یہ فریب یہ سازش یہ شور و شر
ہونا جو ہے سب اس کے بہانے ہیں سر بسر
اسباب ظاہری میں نہ ان پر کرو نظر
کیا جانے کیا ہے پردۂ قدرت میں جلوہ گر
خاص اس کی مصلحت کوئی پہچانتا نہیں
منظور کیا اسے ہے کوئی جانتا نہیں
راحت ہو یا کہ رنج خوشی ہو کہ انتشار
واجب ہر ایک رنگ میں ہے شکر کرد گار
تم ہی نہیں ہو کشتہ نیرنگ روزگار
ماتم کدے میں دہر کے لاکھوں ہیں سوگوار
سختی سہی نہیں کہ اٹھائی کڑی نہیں
دنیا میں کیا کسی پہ مصیبت پڑی نہیں

چکبست برج نرائن
نظم

وہ نوخیز نورا وہ اک بنت مریم
وہ مخمور آنکھیں وہ گیسوئے پر خم
وہ ارض کلیسا کی اک ماہ پارہ
وہ دیر و حرم کے لیے اک شرارہ
وہ فردوس مریم کا اک غنچۂ تر
وہ تثلیث کی دختر نیک اختر
وہ اک نرس تھی چارہ گر جس کو کہیے
مداوائے درد جگر جس کو کہیے
جوانی سے طفلی گلے مل رہی تھی
ہوا چل رہی تھی کلی کھل رہی تھی
وہ پر رعب تیور وہ شاداب چہرہ
متاع جوانی پہ فطرت کا پہرہ
مری حکمرانی ہے اہل زمیں پر
یہ تحریر تھا صاف اس کی جبیں پر
سفید اور شفاف کپڑے پہن کر
مرے پاس آتی تھی اک حور بن کر
وہ اک آسمانی فرشتہ تھی گویا
کہ انداز تھا اس میں جبریل کا سا
وہ اک مرمریں حور خلد بریں کی
وہ تعبیر آذر کے خواب حسیں کی
وہ تسکین دل تھی سکون نظر تھی
نگار شفق تھی جمال نظر تھی
وہ شعلہ وہ بجلی وہ جلوہ وہ پرتو
سلیماں کی وہ اک کنیز سبک رو
کبھی اس کی شوخی میں سنجیدگی تھی
کبھی اس کی سنجیدگی میں بھی شوخی
گھڑی چپ گھڑی کرنے لگتی تھی باتیں
سرہانے مرے کاٹ دیتی تھی راتیں
عجب چیز تھی وہ عجب راز تھی وہ
کبھی سوز تھی وہ کبھی ساز تھی وہ
نقاہت کے عالم میں جب آنکھ اٹھتی
نظر مجھ کو آتی محبت کی دیوی
وہ اس وقت اک پیکر نور ہوتی
تخیل کی پرواز سے دور ہوتی
ہنساتی تھی مجھ کو سلاتی تھی مجھ کو
دوا اپنے ہاتھوں سے مجھ کو پلاتی
اب اچھے ہو ہر روز مژدہ سناتی
سرہانے مرے ایک دن سر جھکائے
وہ بیٹھی تھی تکیے پہ کہنی ٹکائے
خیالات پیہم میں کھوئی ہوئی سی
نہ جاگی ہوئی سی نہ سوئی ہوئی سی
جھپکتی ہوئی بار بار اس کی پلکیں
جبیں پر شکن بے قرار اس کی پلکیں
وہ آنکھوں کے ساغر چھلکتے ہوئے سے
وہ عارض کے شعلے بھڑکتے ہوئے سے
لبوں میں تھا لعل و گہر کا خزانہ
نظر عارفانہ ادا راہبانہ
مہک گیسوؤں سے چلی آ رہی تھی
مرے ہر نفس میں بسی جا رہی تھی
مجھے لیٹے لیٹے شرارت کی سوجھی
جو سوجھی بھی تو کس قیامت کی سوجھی
ذرا بڑھ کے کچھ اور گردن جھکا لی
لب لعل افشاں سے اک شے چرا لی
وہ شے جس کو اب کیا کہوں کیا سمجھیے
بہشت جوانی کا تحفہ سمجھیے
شراب محبت کا اک جام رنگیں
سبو زار فطرت کا اک جام رنگیں
میں سمجھا تھا شاید بگڑ جائے گی وہ
ہواؤں سے لڑتی ہے لڑ جائے گی وہ
میں دیکھوں گا اس کے بپھرنے کا عالم
جوانی کا غصہ بکھرنے کا عالم
ادھر دل میں اک شور محشر بپا تھا
مگر اس طرف رنگ ہی دوسرا تھا
ہنسی اور ہنسی اس طرح کھلکھلا کر
کہ شمع حیا رہ گئی جھلملا کر
نہیں جانتی ہے مرا نام تک وہ
مگر بھیج دیتی ہے پیغام تک وہ
یہ پیغام آتے ہی رہتے ہیں اکثر
کہ کس روز آؤ گے بیمار ہو کر

اسرار الحق مجاز
نظم

پتیاں کتنی بھی آئیں جائیں
سوتنترتا دیوس کی ہاردک شبھ کامنائیں
دیش کا کوئی بھی گلی کوچہ رہے
ترنگا ہمیشہ سب سے اونچا رہے
ترنگے میں کیسریا سفید ہرا رنگ ہیں
ترنگے کے رنگ ہمارے دیش کے انگ ہیں
کیسریا سوریہ ہرا وکاس کا پرتیک
سفید شانتی اور دھرم نربھیک
تینوں سے مل کر ترنگا بنتا ہے
سنتلن بنائے رکھنے کے لیے سرکار جنتا ہے
بس ایک رنگ کو گر زیادہ مہتو دیں گے
تو دیش کا سنتلن بگاڑ لیں گے
جب جنتا سرکار ہی سنتلن بگاڑنے لگ جائے
تو پھر دیش کو بس جے شری رام ہی بچائے
سہی کو سہی غلط کو غلط کہنا
دیش بھکتی ذمہ داری کا ہے گہنا
یدی ہم انیتک کو انیتک نہ کہہ پائیں
تو اس سے اچھا ہے کہ ہم گونگے ہو جائیں
آئیے کوشش کریں کی ذمے دار بنیں
آئیے کوشش کریں کی ایمان دار بنیں
دیش زندہ باد ہی رہے گا گر ہم ذمے دار نہ بنیں
دیش زندہ باد ہی رہے گا گر ہم ایمان دار نہ بنیں
دیش زندہ باد ہی رہے گا گر ہم کچھ بھی نہ بنیں
گر کچھ بھی نہ کر سکیں تو بس اتنا کریں
ہم مانوتا کے وردھ کبھی ہتھیار نہ بنیں
وپتیاں کتنی بھی آئیں جائیں
سوتنترتا دیوس کی ہاردک شبھ کامنائیں

سچن دیو ورما
نظم

بن بن کر جو کھیل بگڑ جاتے ہیں ان کی بات نہیں
کوئی جنازہ بھی یہ نہیں ہے اور کوئی بارات نہیں
یہ اک ایسا دن ہے جس کے آگے پیچھے رات نہیں

میراجی
نظم

نظم کہوگے
کہہ لوگے کیا؟
دیکھو اتنا سہل نہیں ہے
بنتی بات بگڑ جاتی ہے
اکثر نظم اکڑ جاتی ہے

دانیال طریر
نظم

آج قسمت سے نظر آئی ہے برسات کی رات
کیا بگڑ جائے گا رہ جاؤ یہیں رات کی رات

اختر شیرانی
نظم

ہزار بار یہ بستی اجڑ اجڑ کے بسی
ہزار بار یہ دلی بگڑ بگڑ کے بنی

وامق جونپوری
نظم

حریم محمل میں آ گیا ہوں سلام لے لو
سلام لے لو کہ میں تمہارا امین قاصد خجل مسافر عزا کی وادی سے لوٹ آیا
میں لوٹ آیا مگر سراسیمہ اس طرح سے
کہ پچھلے قدموں پلٹ کے دیکھا نہ گزرے رستوں کے فاصلوں کو
جہاں پہ میرے نشان پا اب تھکے تھکے سے گرے پڑے تھے
حریم محمل میں وہ سفیر نوید پرور
جسے زمانے کے پست و بالا نے اتنے قصے پڑھا دئیے تھے
جو پہلے قرنوں کی تیرگی کو اجال دیتے
تمہیں خبر ہے
یہ میرا سینہ قدیم اہرام میں اکیلا وہ اک حرم تھا
عظیم رازوں کے کہنہ تابوت جس کی کڑیوں میں بس رہے تھے
انہیں ہواؤں کا ڈر نہیں تھا
نہ صحرا زادوں کے نسلی کا ہی ان کی گرد خبر کو پہنچے
حریم محمل میں وہ امانت کا پاسباں ہوں
جو چرم آہو کے نرم کاغذ پہ لکھے نامے کو لے کے نکلا
وہی کہ جس کے سوار ہونے کو تم نے بخشا جہاز صحرا
طویل راہوں میں خالی مشکوں کا بار لے کر ہزار صدیاں سفر میں گرداں
کہیں سرابوں کی بہتی چاندی کہیں چٹانوں کی سخت قاشیں
میان راہ سفر کھڑے تھے جکڑنے والے نظر کے لوبھی
مگر نہ بھٹکا بھٹکنے والا
جو دم لیا تو عزا میں جا کر
حریم محمل سنو فسانے جو سن سکو تو
میں چلتے چلتے سفر کے آخر پہ ایسی وادی میں جا کے ٹھہرا
اور اس پہ گزرے حریص لمحوں کے ان نشانوں کو دیکھ آیا
جہاں کے نقشے بگڑ گئے ہیں
جہاں کے طبقے الٹ گئے ہیں
وہاں کی فصلیں زقوم کی ہیں
ہوائیں کالی ہیں راکھ اڑ کر کھنڈر میں ایسے پھنکارتی ہے
کہ جیسے اژدر چہار جانب سے جبڑے کھولے غدر مچاتے
زمیں پہ کینہ نکالتے ہوں
کثیف زہروں کی تھیلیوں کو غضب سے باہر اچھالتے ہوں
مہیب سائے میں دیوتاؤں کا رقص جاری تھا
ٹوٹے ہاتھوں کی ہڈیوں سے وہ دہل باطل کو پیٹتے تھے
ضعیف کوؤں نے اہل قریہ کی قبریں کھودیں
تو ان کے ناخن نحیف پنجوں سے جھڑ کے ایسے بکھر رہے تھے
چکوندروں نے چبا کے پھینکے ہوں جیسے ہڈی کے خشک ریزے
حریم محمل وہی وہ منزل تھی جس کے سینے پہ میں تمہاری نظر سے پہنچا اٹھائے مہر و وفا کے نامے
وہیں پہ بیٹھا تھا سر بہ زانو تمہارا محرم
کھنڈر کے بوسیدہ پتھروں پر حزین و غمگیں
وہیں پہ بیٹھا تھا
قتل ناموں کے محضروں کو وہ پڑھ رہا تھا
جو پستیوں کے کوتاہ ہاتھوں نے اس کی قسمت میں لکھ دئیے تھے
حریم محمل میں اپنے ناقہ سے نیچے اترا تو میں نے دیکھا کہ اس کی آنکھیں خموش و ویراں
غبار صحرا مژہ پہ لرزاں تھا ریت دیدوں میں اڑ رہی تھی
مگر شرافت کی ایک لو تھی کہ اس کے چہرے پہ نرم ہالہ کیے ہوئے تھی
وہ میرے لہجے کو جانتا تھا
ہزار منزل کی دوریوں کے ستائے قاصد کے اکھڑے قدموں کی چاپ سنتے ہی اٹھ کھڑا تھا
دیار وحشت میں بس رہا تھا
پہ تیری سانسوں کے زیر و بم سے اٹھی حرارت سے آشنا تھا
وہ کہہ رہا تھا یہاں سے جاؤ کہ یاں خرابوں کے کارخانے ہیں
روز و شب کے جو سلسلے ہیں کھلے خساروں کی منڈیاں ہیں
وہ ڈر رہا تھا تمہارا قاصد کہیں خساروں میں بٹ نہ جائے
حریم محمل میں کیا بتاؤں وہیں پہ کھویا تھا میرا ناقہ
فقط خرابے کے چند لمحے ہی اس کے گودے کو کھا گئے تھے
اسی مقام طلسم گر میں وہ استخوانوں میں ڈھل گیا تھا
جہاں پہ بکھرا پڑا تھا پہلے تمہارے محرم کا اسپ تازی
اور اب وہ ناقہ کے استخواں بھی
تمہارے محرم کے اسپ تازی کے استخوانوں میں مل گئے ہیں
حریم محمل وہی وہ پتھر تھے جن پہ رکھے تھے میں نے مہر و وفا کے نامے
جہاں پہ زندہ رتوں میں باندھے تھے تم نے پیمان و عہد اپنے
مگر وہ پتھر کہ اب عجائب کی کار گہہ ہیں
تمہارے نامے کی اس عبارت کو کھا گئے ہیں
شفا کے ہاتھوں سے جس کو تم نے رقم کیا تھا
سو اب نہ ناقہ نہ کوئی نامہ نہ لے کے آیا جواب نامہ
میں نامراد و خجل مسافر
مگر تمہارا امین قاصد عزا کی وادی سے لوٹ آیا
اور اس نجیب و کریم محرم وفا کے پیکر کو دیکھ آیا
جو آنے والے دنوں کی گھڑیاں ابد کی سانسوں سے گن رہا ہے

علی اکبر ناطق
نظم

سفیر لیلیٰ یہ کیا ہوا ہے
شبوں کے چہرے بگڑ گئے ہیں
دلوں کے دھاگے اکھڑ گئے ہیں
شفیق آنسو نہیں بچے ہیں غموں کے لہجے بدل گئے ہیں
تمہی بتاؤ کہ اس کھنڈر میں جہاں پہ مکڑی کی صنعتیں ہوں
جہاں سمندر ہوں تیرگی کے
سیاہ جالوں کے بادباں ہوں
جہاں پیمبر خموش لیٹے ہوں باتیں کرتی ہوں مردہ روحیں
سفیر لیلیٰ تمہی بتاؤ جہاں اکیلا ہو داستاں گو
وہ داستاں گو جسے کہانی کے سب زمانوں پہ دسترس ہو
شب رفاقت میں طول قصہ چراغ جلنے تلک سنائے
جسے زبان ہنر کا سودا ہو زندگی کو سوال سمجھے
وہی اکیلا ہو اور خموشی ہزار صدیوں کی سانس روکے
وہ چپ لگی ہو کہ موت بام فلک پہ بیٹھی زمیں کے سائے سے کانپتی ہو
سفیر لیلیٰ تمہی بتاؤ وہ ایسے دوزخ سے کیسے نپٹے
دیار لیلیٰ سے آئے نامے کی نو عبارت کو کیسے پڑھ لے
پرانے لفظوں کے استعاروں میں گم محبت کو کیونکے سمجھے
سفیر لیلیٰ ابھی ملامت کا وقت آئے گا دیکھ لینا
اگر مصر ہو تو آؤ دیکھو
یہاں پہ بیٹھو یہ نامے رکھ دو
یہیں پہ رکھ دو انہی سلوں پر
کہ اس جگہ پر ہماری قربت کے دن ملے تھے
وہ دن یہیں پر جدا ہوئے تھے انہی سلوں پر
اور اب ذرا تم نظر اٹھاؤ مجھے بتاؤ تمہارا ناقہ کہاں گیا ہے
بلند ٹخنوں سے زرد ریتی پہ چلنے والا صبیح ناقہ
وہ سرخ ناقہ سوار ہو کر تم آئے جس پر بری سرا میں
وہی، کہ جس کی مہار باندھی تھی تم نے بوسیدہ استخواں سے
وہ اسپ تازی کے استخواں تھے
مجھے بتاؤ سفیر لیلیٰ کدھر گیا وہ
ادھر تو دیکھو وہ ہڈیوں کا ہجوم دیکھو
وہی تمہارا عزیز ساتھی سفر کا مونس
پہ اب نہیں ہے
اور اب اٹھاؤ سلوں سے نامے
پڑھو عبارت جو پڑھ سکو تو
کیا ڈر گئے ہو کہ سطح کاغذ پہ جز سیاہی کے کچھ نہیں ہے
خجل ہو اس پر کہ کیوں عبارت غبار ہو کر نظر سے بھاگی
سفیر لیلیٰ یہ سب کرشمے اسی کھنڈر نے مری جبیں پر لکھے ہوئے ہیں
یہی عجائب ہیں جن کے صدقے یہاں پرندے نہ دیکھ پاؤ گے
اور صدیوں تلک نہ اترے گی یاں سواری
نہ چوب خیمہ گڑے گی یاں پر
سفیر لیلیٰ یہ میرے دن ہیں
سفیر لیلیٰ یہ میری راتیں
اور اب بتاؤ کہ اس اذیت میں کس محبت کے خواب دیکھوں
میں کن خداؤں سے نور مانگوں
مگر یہ سب کچھ پرانے قصے پرائی بستی کے مردہ قضیے
تمہیں فسانوں سے کیا لگاؤ
تمہیں تو مطلب ہے اپنے ناقہ سے اور نامے کی اس عبارت سے
سطح کاغذ سے جو اڑی ہے
سفیر لیلیٰ تمہارا ناقہ
میں اس کے مرنے پر غم زدہ ہوں
تمہارے رنج و الم سے واقف بڑے خساروں کو دیکھتا ہوں
سو آؤ اس کی تلافی کر دوں یہ میرے شانے ہیں بیٹھ جاؤ
تمہیں خرابے کی کار گہہ سے نکال آؤں
دیار لیلیٰ کو جانے والی حبیب راہوں پہ چھوڑ آؤں

علی اکبر ناطق
نظم

پیڑ چلتے ہیں ہواؤں سے صدا آتی ہے
میری تنہائی کی خاموش فضا گاتی ہے
روشنی جاگنے لگتی ہے سیہ خانے میں
جان پڑ جاتی ہے بھولے ہوئے افسانے میں
آنے لگتی ہیں کئی اجنبی مہکاریں سی
گونجنے لگتی ہیں پازیب کی جھنکاریں سی
ہاتھ میں وقت کے ہوتا ہے مسرت کا رباب
جگمگاتے ہیں اندھیروں میں ہزاروں مہتاب
بات ہونے نہیں پاتی کہ بچھڑ جاتی ہو
میری تقدیر کی مانند بگڑ جاتی ہو
آج کی رات بھی شاید یہی عالم ہوگا!
چاند سورج کی طرح لمحے نکل آئیں گے
دیکھتے دیکھتے دن رات بدل جائیں گے
وہی پلکیں وہی زلفیں وہی صورت ہوگی
میرے گھر میں مری مہمان محبت ہوگی!

صابر دت
نظم

میں تھا ضمیر مشیت میں ایک عزم جلیل
ہنوز شوق کی کروٹ بھی لی نہ تھی میں نے
کہ دفعتاً متحرک ہوئے لب تخلیق
پکڑ لی صورت ظاہر وجود کی میں نے
وہ صبح عالم حیرت وہ جلوہ زار بہشت
ہوا چمن کی لگی آنکھ کھول دی میں نے
وہ تربیت گاہ ذوق نظر، وہ وادئ نور
جہاں سے پائی محبت کی روشنی میں نے
وہ عنفوان تمنا وہ ابتدائے جنوں
وہ اک خلش جسے سمجھا تھا زندگی میں نے
کیا سرور نے اک عالم دگر پیدا
چرا کے پی جو مۓ سرکش خودی میں نے
خودی کے نشے میں اللہ رے بے خودی میری
بدن سے چادر عصمت بھی پھینک دی میں نے
ہوا حدود نظر سے نکل کے آوارہ
ہوائے شوق میں جنت بھی چھوڑ دی میں نے
فرشتے رہ گئے حیرت سے دیکھتے مجھ کو
نہ کی قبول مشیت کی رہبری میں نے
دلیل راہ بنی اپنی گرمئ پرواز
کہ طاقت پر جبریل چھین لی میں نے
بڑھیں ستاروں کی دنیائیں میرے لینے کو
اتر کے عرش سے نیچے نظر جو کی میں نے
مگر زمیں کی کشش نے سوئے زمیں کھینچا
کیا پسند یہ زندان عنصری میں نے
جگہ ملی جو تڑپنے کی بے قراری کو
تو پھر حدود میں وسعت کی داد دی میں نے
ہوا تلاطم ہستی بہ عالم ذرات
چھڑک دی خاک بیاباں پہ زندگی میں نے
نمو کے جوش سے سودائے رنگ و بو نکلا
زمیں کے دل کی تمنا نکال دی میں نے
ہوئیں جہان عمل میں شریعتیں پیدا
خدا کے نام پہ برپا جو کی خودی میں نے
کبھی جلائی اندھیرے میں شمع علم و عمل
کبھی بجھا دی ہدایت کی روشنی میں نے
کبھی بگاڑ کے رکھ دیں ثواب کی شکلیں
کبھی بدل دی حقیقت گناہ کی میں نے
بڑھا تو رہ گیا پیچھے مرے زمانۂ حال
رکا تو وقت کی رفتہ روک دی میں نے
زمیں پہ شوق کے فتنے بچھا دیے ہر سو
فضا میں نیند کی مستی بکھیر دی میں نے
کبھی جگا دی قیامت نفس کی ٹھوکر سے
اٹھا کے صور سرافیل زندگی میں نے
جنوں کے جوش میں پردے نظر کے چاک کیے
نقاب نوچ کے فطرت کی پھینک دی میں نے
قبائے لیلئ تہذیب چاک کر ڈالی
ردائے مریم عصمت اتار لی میں نے
مزاج آتش سوزاں کو کر دیا ٹھنڈا
مچا دی بزم عناصر میں کھلبلی میں نے
لیا شہنشۂ خاور سے روشنی کا خراج
کیا اسیر طبیعت کو برق کی میں نے
بہ انقلاب طبیعت مزاج آہن کو
ہوا کی گرمیٔ پرواز بخش دی میں نے
بلندیوں کا تصور بھی رہ گیا پیچھے
پہنچ کے اتنی بلندی پہ سانس لی میں نے
ٹھٹک گئیں جو نگاہیں قریب ھجلۂ قدس
پس حجاب ادب یہ صدا سنی میں نے
کہ اے حریف مشیت بہ وعدہ گاہ ازل
ٹھہر ٹھہر تری پرواز دیکھ لی میں نے

جمیلؔ مظہری
نظم

اردو ہمارے دیش کی شیریں زبان ہے
تہذیب کی ہے وضع شرافت کی جان ہے
تعلیم و تربیت میں اہم اس کا ہے مقام
شعر و سخن کی روح ادب کی یہ جان ہے
چھوڑا ہے جب سے اس کو تلفظ بگڑ گیا
یہ ہر زباں کا جزو بیاں اور شان ہے
پیدا ہوئی یہ ہند میں پروان بھی چڑھی
پھر کس لیے کہو یہ ودیشی زبان ہے
مقبول عام بھی ہے یہ ہر دل عزیز بھی
سچ بات تو یہ ہے کہ یہ سب کی زبان ہے
ہم اس کے ذوق سے ہوئے افسوس منحرف
آزادی کی تحریک کی اردو ہی جان ہے
آزاد ہند میں نہ ملا اس کو کچھ مقام
یہ مادر وطن کے شہیدوں کی جان ہے
حالانکہ روزگار کا ذریعہ نہیں رہی
اردو پڑھو پڑھاؤ یہ اپنی زبان ہے

حبیب احمد انجم دتیاوی
نظم

جب ہوائے شوخ کی موج شریر
توڑ جاتی ہے کسی کھڑکی کے پردے کا جمود
تو بگڑ جاتا ہے کھیل
دیو قامت عکس کو بونا بنا دیتی ہے باہر کی کرن

عمیق حنفی
نظم

ماریہ صاحبا کی اک گڑیا
اور ثوبی کا ایک گڈا تھا
اور دونوں میں چائے پر کل شام
ذکر رشتے کا ایسے ہوتا تھا
ثوبی منہ بگاڑ کر بولی
ہونہہ نہ اچھی ہیں عادتیں اس کی
نہ مجھے کوئی خاص لگتی ہے
تم تو کہتی تھیں لگتی گڑیا ہنس مکھ ہے
یہ تو بالکل اداس لگتی ہے
کب سے بالوں میں کی نہیں کنگھی
چوٹیا دیکھو تو گھاس لگتی ہے
بات کرنے کا اس کو ڈھنگ نہیں ہے
یہ کہیں ایم اے پاس لگتی ہے
چائے گڈے کے کوٹ پر ڈھا دی
ایک دم بد حواس لگتی ہے
ناں جی گڑیا نہیں ہے یہ کمسن
یہ تو گڈے کی ساس لگتی ہے
اے ذرا کوک ووک منگواؤ
میرے گڈے کو پیاس لگتی ہے
ماریہ صاحبا کی گڑیا کا
کھینچا ثوبی نے ایسا جب نقشہ
ان کو آتا بھلا نہ کیوں غصہ
پر بڑے ضبط سے یہ فرمایا
اے بہن یہ خوشی کا سودا ہے
ہو گئی بات صاف اچھا ہے
میری گڑیا تو خیر جیسی ہے
لاٹ صاحب یہ خود کہاں کا ہے
بھالو جیسی تو اس کی صورت ہے
تم تو کہتی تھیں بھولا بھالا ہے
مونچھیں دیکھو تو کتنی موٹی ہیں
سر بھی پیچھے سے تھوڑا گنجا ہے
کہیں افسر تو خیر کیا ہوگا
ففتھ میں فیل ہو کے بھاگا ہے
سب پتا چل گیا مجھے بھی اب
کسی ہوٹل کا یہ تو بیرا ہے
اس کی تنخواہ بس ذرا سی ہے
ٹپ کے ملنے ہی پر گزارا ہے
ہاں اسے کوک بھی منگا دیں گے
دیکھ لو کس قدر ندیدہ ہے
اس نکھٹو کو گڑیا دینے سے
کنویں میں پھینک دینا اچھا ہے

احمد حاطب صدیقی
نظم

تمہارا ذہنی توازن بگڑ چکا ہے؟
تم انگلیوں کے بجائے
کی بورڈ چبانے والی لڑکی سے محبت کرتے ہو
جو کھانستی ہے تو
اس کے حلق سے گرنے لگتے ہیں
ایس
آئی
ڈی
آر
اور
اے کے پچکے ہوئے لیٹرز

سدرہ سحر عمران
نظم

جنگل میں ون ڈے کرکٹ کا ہوا انوکھا میچ
بندر نے کی خوب فیلڈنگ پکڑے چھ چھ کیچ
زیرو پر لنگور گیا تو ہرن تین پر آؤٹ
ایل بی ڈبلیو گینڈا بھاگا نہیں تھا کوئی ڈاؤٹ
گیدڑ نے آتے ہی جیسے لی اپنی پوزیشن
کنگارو کی گیند تھی اسپن بدل گئی سچویشن
وکٹ بچا نہ پایا گیدڑ بلا عجب گھمایا
بندر کے ہاتھوں میں سیدھے اپنا کیچ تھمایا
سینگ ہلاتے بارہ سنگھا نے اب بیٹ سنبھالا
کنگارو کی سیکنڈ بال تھی چوک گیا بیچارہ
گیند گھسی اسٹمپ بکھیرا گلی چھٹکی دور
ایک بڑا اسکور کا سپنا ہو گیا آخر چور
لوٹ چلا جب بارہ سنگھا بھالو چاچا آئے
گیند تیسری کنگارو کی وہ بھی جھیل نہ پائے
لگاتار تینوں گیندوں پر وکٹ گرے تھے تین
کنگارو کے اس اوور نے بدل دیا تھا سین
جلدی جلدی وکٹ گنوائے بگڑ گئی تھی حالت
جمے جمائے ہاتھی دادا بھیج رہے تھے لعنت
بھالو گیا زیبرا آیا اب کے بلا تھامے
نوے پر ہاتھی پہنچا تھا لگا اسے سمجھانے
بلا چمکا گیند اڑی امپائر بولا سکس
ہاتھی نے پھر فوراً ٹوکا پہلے ہولو فکس
چوکے اور چھکے کی بارش تھوڑا رک کر کرنا
میچ اگر ہے ہمیں جیتنا وکٹ بچائے رکھنا
اوور نیا لیے چیتا اب بالنگ کرنے آیا
دو گیندوں پر لگاتار ہاتھی نے سکس جمایا
بنا سینچری ہاتھی نے ارمان نئے کچھ باندھے
چیتے کی اک تیز گیند نے توڑے سبھی ارادے
ہاتھی کے آؤٹ ہوتے ہی جو آیا وہ بے بس
ناٹ آؤٹ کا تمغہ لے کر ہوا زیبرا واپس
کپتانی تھی شیر کے ذمے جیت لیا تھا میچ
بندر نے کی خوب فیلڈنگ پکڑے چھ چھ کیچ

طارق منظور
نظم

کمال کرتے ہیں عشق والے
یہ داستاں ہے قرون اولی سے پیشتر کی
جب ایک لڑکی سے دیوتا نے بروگ پایا
تو آنسوؤں کا محل بنایا
یہ عشق تھا سو
زمیں کی بنیاد ہل گئی تھی
سڑک کے تاروں سے مل گئی تھی
یہ عشق تھا سو
نہ اس نے لمحوں سے مات کھائی
نہ اس کو صدیاں بگاڑ پائیں
کٹاس اب بھی وہیں کھڑا ہے
ہر ایک پتھر گواہ بن کر وہیں پڑا ہے
یہ خاک پہلے ہی مضطرب تھی
اب اور حیران ہو گئی ہے
پجاریوں کے نفس کی اترن
ہوا مسلمان ہو گئی ہے
محبتوں سے بھرے صحیفے تو طاقچوں میں سجا دئے ہیں
عقیدتوں نے شوا کے آنسو وضو کے قابل بنا دئے ہیں
نصیب والے ہی آنسوؤں سے وضو کریں گے
قبائے گریہ رفو کریں گے
کٹاس اپنے ہی آپ میں گم
عدم سے الحاق کر رہا ہے
کئی مذاہب کی لو جلائے
صدائے الحاد کر رہا ہے
اور اس جھمیلے کے پاس بیٹھا
کوئی تمہیں یاد کر رہا ہے
عجب مسافت سے چور ہے یہ
عجیب فریاد کر رہا ہے
اسے نکالو یہ اس جگہ کا
سکون برباد کر رہا ہے
کمال کرتے ہیں عشق والے
یہ داستاں ہے قرون اولی سے پیشتر کی جب ایک لڑکی
سے دیوتا نے بروگ پایا
تو آنسوؤں کا محل بنایا

اکرام بسراء
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے