کی تلاش کا نتیجه | موضو - نظم, صفحہ itraa

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "itraa"

نظم کے متعلقہ نتیجہ "itraa"

نظم

سارے جہاں سے اچھا ہندوستاں ہمارا
ہم بلبلیں ہیں اس کی یہ گلستاں ہمارا
غربت میں ہوں اگر ہم رہتا ہے دل وطن میں
سمجھو وہیں ہمیں بھی دل ہو جہاں ہمارا
پربت وہ سب سے اونچا ہم سایہ آسماں کا
وہ سنتری ہمارا وہ پاسباں ہمارا
گودی میں کھیلتی ہیں اس کی ہزاروں ندیاں
گلشن ہے جن کے دم سے رشک جناں ہمارا
اے آب رود گنگا وہ دن ہے یاد تجھ کو
اترا ترے کنارے جب کارواں ہمارا
مذہب نہیں سکھاتا آپس میں بیر رکھنا
ہندی ہیں ہم وطن ہے ہندوستاں ہمارا
یونان و مصر و روما سب مٹ گئے جہاں سے
اب تک مگر ہے باقی نام و نشاں ہمارا
کچھ بات ہے کہ ہستی مٹتی نہیں ہماری
صدیوں رہا ہے دشمن دور زماں ہمارا
اقبالؔ کوئی محرم اپنا نہیں جہاں میں
معلوم کیا کسی کو درد نہاں ہمارا

علامہ اقبال

نظم

شاید کہ انہیں ٹکڑوں میں کہیں
وہ ساغر دل ہے جس میں کبھی
صد ناز سے اترا کرتی تھی
صہبائے غم جاناں کی پری

فیض احمد فیض

نظم

مری بستی سے پرے بھی مرے دشمن ہوں گے
پر یہاں کب کوئی اغیار کا لشکر اترا
آشنا ہاتھ ہی اکثر مری جانب لپکے
میرے سینے میں سدا اپنا ہی خنجر اترا

احمد فراز

نظم

اس قدر بھی نہیں مجھے معلوم
کس محلے میں ہے مکاں تیرا
کون سی شاخ گل پہ رقصاں ہے
رشک فردوس آشیاں تیرا
جانے کن وادیوں میں اترا ہے
غیرت حسن کارواں تیرا
کس سے پوچھوں گا میں خبر تیری
کون بتلائے گا نشاں تیرا
تیری رسوائیوں سے ڈرتا ہوں
جب ترے شہر سے گزرتا ہوں
حال دل بھی نہ کہہ سکا گرچہ
تو رہی مدتوں قریب مرے
کچھ تری عظمتوں کا ڈر بھی تھا
کچھ خیالات تھے عجیب مرے
آخر کار وہ گھڑی آئی
بار ور ہو گئے رقیب مرے
تو مجھے چھوڑ کر چلی بھی گئی
خیر قسمت مری نصیب مرے
اب میں کیوں تجھ کو یاد کرتا ہوں
جب ترے شہر سے گزرتا ہوں
گو زمانہ تری محبت کا
ایک بھولی ہوئی کہانی ہے
تیرے کوچے میں عمر بھر نہ گئے
ساری دنیا کی خاک چھانی ہے
لذت وصل ہو کہ زخم فراق
جو بھی ہو تیری مہربانی ہے
کس تمنا سے تجھ کو چاہا تھا
کس محبت سے ہار مانی ہے
اپنی قسمت پہ ناز کرتا ہوں
جب ترے شہر سے گزرتا ہوں
اشک پلکوں پہ آ نہیں سکتے
دل میں ہے تیری آبرو اب بھی
تجھ سے روشن ہے کائنات مری
تیرے جلوے ہیں چار سو اب بھی
اپنے غم خانۂ تخیل میں
تجھ سے ہوتی ہے گفتگو اب بھی
تجھ کو ویرانۂ تصور میں
دیکھ لیتا ہوں روبرو اب بھی
اب بھی میں تجھ کو پیار کرتا ہوں
جب ترے شہر سے گزرتا ہوں
آج بھی کارزار ہستی میں
تو اگر ایک بار مل جائے
کسی محفل میں سامنا ہو جائے
یا سر رہ گزار مل جائے
اک نظر دیکھ لے محبت سے
ایک لمحے کا پیار مل جائے
آرزوؤں کو چین آ جائے
حسرتوں کو قرار مل جائے
جانے کیا کیا خیال کرتا ہوں
جب ترے شہر سے گزرتا ہوں
آج میں ایسے مقام پر ہوں جہاں
رسن و دار کی بلندی ہے
میرے اشعار کی لطافت میں
تیرے کردار کی بلندی ہے
تیری مجبوریوں کی عظمت ہے
میرے ایثار کی بلندی ہے
سب ترے درد کی عنایت ہے
سب ترے پیار کی بلندی ہے
تیرے غم سے نباہ کرتا ہے
جب ترے شہر سے گزرتا ہوں
تجھ سے کوئی گلہ نہیں مجھ کو
میں تجھے بے وفا نہیں کہتا
تیرا ملنا خیال و خواب ہوا
پھر بھی نا آشنا نہیں کہتا
وہ جو کہتا تھا مجھ کو آوارہ
میں اسے بھی برا نہیں کہتا
ورنہ اک بے نوا محبت میں
دل کے لٹنے پہ کیا نہیں کہتا
میں تو مشکل سے آہ بھرتا ہوں
جب ترے شہر سے گزرتا ہوں
کوئی پرسان حال ہو تو کہوں
کیسی آندھی چلی ہے تیرے بعد
دن گزارا ہے کس طرح میں نے
رات کیسے ڈھلی ہے تیرے بعد
شمع امید صرصر غم میں
کس بہانے جلی ہے تیرے بعد
جس میں کوئی مکیں نہ رہتا ہو
دل وہ سونی گلی ہے تیرے بعد
روز جیتا ہوں روز مرتا ہوں
جب ترے شہر سے گزرتا ہوں
لیکن اے ساکن حریم خیال
یاد ہے دور کیف و کم کہ نہیں
کیا کبھی تیرے دل پہ گزرا ہے
میری محرومیوں کا غم کہ نہیں
میری بربادیوں کا سن کر حال
آنکھ تیری ہوئی ہے نم کہ نہیں
اور اس کارزار ہستی میں
پھر کبھی مل سکیں گے ہم کہ نہیں
ڈرتے ڈرتے سوال کرتا ہوں
جب ترے شہر سے گزرتا ہوں

سیف الدین سیف

نظم

۱
شام سمے اک اونچی سیڑھیوں والے گھر کے آنگن میں
چاند کو اترے دیکھا ہم نے چاند بھی کیسا پورا چاند

ابن انشا

نظم

اک دن کسی مکھی سے یہ کہنے لگا مکڑا
اس راہ سے ہوتا ہے گزر روز تمہارا
لیکن مری کٹیا کی نہ جاگی کبھی قسمت
بھولے سے کبھی تم نے یہاں پاؤں نہ رکھا
غیروں سے نہ ملیے تو کوئی بات نہیں ہے
اپنوں سے مگر چاہیے یوں کھنچ کے نہ رہنا
آؤ جو مرے گھر میں تو عزت ہے یہ میری
وہ سامنے سیڑھی ہے جو منظور ہو آنا
مکھی نے سنی بات جو مکڑے کی تو بولی
حضرت کسی نادان کو دیجے گا یہ دھوکا
اس جال میں مکھی کبھی آنے کی نہیں ہے
جو آپ کی سیڑھی پہ چڑھا پھر نہیں اترا

علامہ اقبال

نظم

آنکھ بوجھل ہے
مگر نیند نہیں آتی ہے
میری گردن میں حمائل تری بانہیں جو نہیں
کسی کروٹ بھی مجھے چین نہیں پڑتا ہے
سرد پڑتی ہوئی رات
مانگنے آئی ہے پھر مجھ سے
ترے نرم بدن کی گرمی
اور دریچوں سے جھجکتی ہوئی آہستہ ہوا
کھوجتی ہے مرے غم خانے میں
تیری سانسوں کی گلابی خوشبو!
میرا بستر ہی نہیں
دل بھی بہت خالی ہے
اک خلا ہے کہ مری روح میں دہشت کی طرح اترا ہے
تیرا ننھا سا وجود
کیسے اس نے مجھے بھر رکھا تھا
ترے ہوتے ہوئے دنیا سے تعلق کی ضرورت ہی نہ تھی
ساری وابستگیاں تجھ سے تھیں
تو مری سوچ بھی، تصویر بھی اور بولی بھی
میں تری ماں بھی، تری دوست بھی ہمجولی بھی
تیرے جانے پہ کھلا
لفظ ہی کوئی مجھے یاد نہیں
بات کرنا ہی مجھے بھول گیا!
تو مری روح کا حصہ تھا
مرے چاروں طرف
چاند کی طرح سے رقصاں تھا مگر
کس قدر جلد تری ہستی نے
مرے اطراف میں سورج کی جگہ لے لی ہے
اب ترے گرد میں رقصندہ ہوں!
وقت کا فیصلہ تھا
ترے فردا کی رفاقت کے لیے
میرا امروز اکیلا رہ جائے
مرے بچے، مرے لال
فرض تو مجھ کو نبھانا ہے مگر
دیکھ کہ کتنی اکیلی ہوں میں!

پروین شاکر

نظم

ساز دولت کو عطا کرتی ہے نغمے جس کی آہ
مانگتا ہے بھیک تابانی کی جس سے روئے شاہ

جوش ملیح آبادی

نظم

جہاں زاد کیسے ہزاروں برس بعد
اک شہر مدفون کی ہر گلی میں
مرے جام و مینا و گل داں کے ریزے ملے ہیں
کہ جیسے وہ اس شہر برباد کا حافظہ ہوں
حسن نام کا اک جواں کوزہ گر اک نئے شہر میں
اپنے کوزے بناتا ہوا عشق کرتا ہوا
اپنے ماضی کے تاروں میں ہم سے پرویا گیا ہے
ہمیں میں کہ جیسے ہمیں ہوں سمویا گیا ہے
کہ ہم تم وہ بارش کے قطرے تھے جو رات بھر سے
ہزاروں برس رینگتی رات بھر
اک دریچے کے شیشوں پہ گرتے ہوئے سانپ لہریں
بناتے رہے ہیں
اور اب اس جگہ وقت کی صبح ہونے سے پہلے
یہ ہم اور یہ نوجواں کوزہ گر
ایک رویا میں پھر سے پروئے گئے ہیں
جہاں زاد
یہ کیسا کہنہ پرستوں کا انبوہ
کوزوں کی لاشوں میں اترا ہے
دیکھو
یہ وہ لوگ ہیں جن کی آنکھیں
کبھی جام و مینا کی لم تک نہ پہنچیں
یہی آج اس رنگ و روغن کی مخلوق بے جاں
کو پھر سے الٹنے پلٹنے لگے ہیں
یہ ان کے تلے غم کی چنگاریاں پا سکیں گے
جو تاریخ کو کھا گئی تھیں
وہ طوفان وہ آندھیاں پا سکیں گے
جو ہر چیخ کو کھا گئی تھیں
انہیں کیا خبر کس دھنک سے مرے رنگ آئے
مرے اور اس نوجواں کوزہ گر کے
انہیں کیا خبر کون سی تتلیوں کے پروں سے
انہیں کیا خبر کون سے حسن سے
کون سی ذات سے کس خد و خال سے
میں نے کوزوں کے چہرے اتارے
یہ سب لوگ اپنے اسیروں میں ہیں
زمانہ جہاں زاد افسوں زدہ برج ہے
اور یہ لوگ اس کے اسیروں میں ہیں
جواں کوزہ گر ہنس رہا ہے!
یہ معصوم وحشی کہ اپنے ہی قامت سے ژولیدہ دامن
ہیں جویا کسی عظمت نارسا کے
انہیں کیا خبر کیسا آسیب مبرم مرے غار سینے پہ تھا
جس نے مجھ سے اور اس کوزہ گر سے کہا
اے حسن کوزہ گر جاگ
درد رسالت کا روز بشارت ترے جام و مینا
کی تشنہ لبی تک پہنچنے لگا ہے
یہی وہ ندا کے پیچھے حسن نام کا
یہ جواں کوزہ گر بھی
پیاپے رواں ہے زماں سے زماں تک
خزاں سے خزاں تک

ن م راشد

نظم

سر پٹکنے لگا رہ رہ کے دریچہ کوئی
گویا پھر خواب سے بیدار ہوئے دشمن جاں
سنگ و فولاد سے ڈھالے ہوئے جنات گراں
جن کے چنگل میں شب و روز ہیں فریاد کناں
میرے بے کار شب و روز کی نازک پریاں
اپنے شہپور کی رہ دیکھ رہی ہیں یہ اسیر
جس کے ترکش میں ہیں امید کے جلتے ہوئے تیر

فیض احمد فیض

نظم

تم یہ کہتے ہو وہ جنگ ہو بھی چکی!
جس میں رکھا نہیں ہے کسی نے قدم
کوئی اترا نہ میداں میں دشمن نہ ہم
کوئی صف بن نہ پائی، نہ کوئی علم
منتشر دوستوں کو صدا دے سکا
اجنبی دشمنوں کا پتا دے سکا
تم یہ کہتے ہو وہ جنگ ہو بھی چکی!
جس میں رکھا نہیں ہم نے اب تک قدم
تم یہ کہتے ہو اب کوئی چارا نہیں
جسم خستہ ہے، ہاتھوں میں یارا نہیں

فیض احمد فیض

نظم

صبح سے شام ہوئی اور ہرن مجھ کو چھلاوے دیتا
سارے جنگل میں پریشان کیے گھوم رہا ہے اب تک
اس کی گردن کے بہت پاس سے گزرے ہیں کئی تیر مرے
وہ بھی اب اتنا ہی ہشیار ہے جتنا میں ہوں
اک جھلک دے کے جو گم ہوتا ہے وہ پیڑوں میں
میں وہاں پہنچوں تو ٹیلے پہ کبھی چشمے کے اس پار نظر آتا ہے
وہ نظر رکھتا ہے مجھ پر
میں اسے آنکھ سے اوجھل نہیں ہونے دیتا

گلزار

نظم

تجھ سے پہلے مری نگاہوں میں
کوئی روپ اس طرح نہ اترا تھا
تجھ سے آباد ہے خرابۂ دل
ورنہ میں کس قدر اکیلا تھا

مصطفی زیدی

نظم

میرے اجداد کا وطن یہ شہر
میری تعلیم کا جہاں یہ مقام
میرے بچپن کی دوست یہ گلیاں
جن میں رسوا ہوا شباب کا نام
یاد آتے ہیں ان فضاؤں میں
کتنے نزدیک اور دور کے نام
کتنے خوابوں کے ملگجے چہرے
کتنی یادوں کے مرمریں اجسام
کتنے ہنگامے کتنی تحریکیں
کتنے نعرے جو تھے زباں زد عام
میں یہاں جب شعور کو پہنچا
اجنبی قوم کی تھی قوم غلام
یونین جیک درس گاہ پہ تھا
اور وطن میں تھا سامراجی نظام
اسی مٹی کو ہاتھ میں لے کر
ہم بنے تھے بغاوتوں کے امام
یہیں جانچے تھے دھرم کے وشواس
یہیں پرکھے تھے دین کے اوہام
ہیں منکر بنے روایت کے
یہیں توڑے رواج کے اصنام
یہیں نکھرا تھا ذوق نغمہ گری
یہیں اترا تھا شعر کا الہام
میں جہاں بھی رہا یہیں کا رہا
مجھ کو بھولے نہیں ہیں یہ در و بام
نام میرا جہاں جہاں پہنچا
ساتھ پہنچا ہے اس دیار کا نام
میں یہاں میزباں بھی مہماں بھی
آپ جو چاہیں دیجیے مجھے نام
نذر کرتا ہوں ان فضاؤں کی
اپنا دل اپنی روح اپنا کلام
اور فیضان علم جاری ہو
اور اونچا ہو اس دیار کا نام
اور شاداب ہو یہ ارض حسیں
اور مہکے یہ وادئ گلفام
اور ابھریں صنم گری کے نقوش
اور چھلکیں مے سخن کے جام
اور نکلیں وہ بے نوا جن کو
اپنا سب کچھ کہیں وطن کے عوام
قافلے آتے جاتے رہتے ہیں
کب ہوا ہے یہاں کسی کا قیام
نسل در نسل کام جاری ہے
کار دنیا کبھی ہوا نہ تمام
کل جہاں میں تھا آج تو ہے وہاں
اے نئی نسل تجھ کو میرا سلام

ساحر لدھیانوی

نظم

کنارے پر کوئی آیا تھا جس کا خالی بجرا ڈولتا رہتا ہے پانی پر
کوئی اترا تھا بجرے سے
وہ مانجھی ہوگا جس کے پاؤں کے مدھم نشاں اب تک دکھائی دے رہے ہیں گیلے ساحل پر
گیا تھا کہکشاں کے پار یہ کہہ کر
ابھی آتا ہوں ٹھہرو اس کنارے پر ذرا میں دیکھ لوں کیا ہے
یہ بجرا ڈولتا رہتا ہے اس ٹھہرے ہوئے دریا کے پانی پر
وہ لوٹے گا یا میں جاؤں
مجھے اس پار جانا ہے

گلزار

نظم

کہنے لگی کہ تو کیا لے گا: سونا، چاندی، ہار
میں نے کہا کہ رانی، تیرے مکھڑے کی تلوار
پھر دل کے آنگن میں اترا اس کا سارا روپ
اس چہرے کی شیتل کرنیں، اس مکھڑے کی دھوپ

مصطفی زیدی

نظم

ننھی سے یہ بولیں نانی
میری پیاری گڑیا رانی
آ جا میری گود میں آ جا
سن لے مجھ سے ایک کہانی
یہ جو اپنی گول زمیں ہے
پہلے پہل تھی پانی پانی
سب دنیا تھی ایک سمندر
جس کی لہریں تھیں طوفانی
رفتہ رفتہ ابھری خشکی
ہولے ہولے اترا پانی
پیڑ پہاڑ چٹانیں صحرا
جنگل کا جنگل حیوانی
ساری چیزیں ہو گئیں پیدا
تب آئی وہ صبح سہانی
جب اللہ نے حکم سے اپنے
دکھلانے کو اپنی نشانی
دنیا میں انسان کو بھیجا
خوب بڑھی نسل انسانی
تم کو سن کر حیرت ہوگی
میری پیاری گڑیا رانی
حصے چار زمیں کے ہوں تو
ایک ہے خشکی تین ہے پانی
لیکن استعمال کے قابل
زیادہ پانی نہیں ہے جانی
تھوڑا تھوڑا خرچ کریں ہم
شروع نہ کر دیں نہر بہانی

احمد حاطب صدیقی

نظم

نہیں مجھے اس طرح نہ دیکھو
کہ جیسے نظروں میں روح تک امڈی آ رہی ہو
یہ ہاتھ کچھ دیر اور رہنے دو میرے ہاتھوں میں
کچھ نہ بولو
کہ میں یہ نایاب لمحے آنکھوں میں جذب کر لوں
یہ ثانیے روح میں چھپا لوں
ہر ایک لمحہ اک ارمغاں ہے
تمہاری چاہت کا ارمغاں ہے
یہ ثانیے ایسے پھول ہیں
جو کہ کھلتے رہتے ہیں دل ہی دل میں
شگفتہ رہتے ہیں رہتے دم تک
یہ چند لمحے کسی کسی کے نصیب میں ہیں
وگرنہ عمریں
غموں کے کانٹے نکالنے میں گزر گئی ہیں
۳
وہ شام ہوٹل میں اس طرح آئی
جیسے دشمن کی فوج اترے
جگہ جگہ جست اور کانسی کے چہرے
جھم جھم کھنک رہے تھے
تمام ہوٹل جگر جگر جگمگا رہا تھا
میں کنج تنہائی میں تحیر سے دیکھتا تھا
کہ کیسے خوش باش ہیں جنہیں یہ خبر نہیں ہے
کہ ان کی بنیاد اکھڑ چکی ہے

ضیا جالندھری

نظم

نور سے کچھ اس طرح ہے چشم تیری تر بہ تر
چاندنی کا عکس جوں اترا ہو سطح آب پر
پتلیاں دونوں تری آنکھوں میں دو نیلم لگے
اور تری آنکھوں کا پانی مجھ کو جام جم لگے
وقت صبح یہ عالم سیماب ہے چہرہ ترا
کیا کہوں بس منظر نایاب ہے چہرہ ترا

جے راج سنگھ جھالا

نظم

ہم جنوں ذات ترے حکم پہ نکلے جاناں
ایسے نکلے ہیں کہ شاید ہی پلٹ کر آئیں
دل نے اک خواب جو دیکھا تو پکارا اٹھ کے
حکم اترا ہے کہ گھر بار کو تنہا چھوڑیں
اپنی وادی سے کسی دشت کو ہجرت پکڑیں
اپنے باغات و چمن زار کو تنہا چھوڑیں
اس سے پہلے کہ رگ و پے میں سیاہی پھیلے
اپنے دربار طرب زار سے باہر نکلیں
اس سے پہلے کہ شب زیست کا پہلو بدلے
راحتیں ترک کریں اور سفر پر نکلیں
اور جب راہ تلاشیں تو سفر میں ایسے
کہ قدم درد کے ماروں کے حوالے کر دیں
اپنے ہاتھوں کو یتیموں کے سروں پر رکھ دیں
اپنی آنکھوں کو بچاروں کے حوالے کر دیں
اتنا سننا تھا کہ بس رخت محبت باندھا
اپنے اندر کی کدورت کے دروں کو توڑا
اپنی خواہش زدہ عادات پہ تالے ڈالے
اپنی خود غرض تمناؤں کو پیچھے چھوڑا
اور ہم راہ ترے پیار پرندے لے کر
اپنے ہاتھوں میں تری چاہ کی شمعیں تھامے
اپنے ہونٹوں پہ ترے درد کے نغمے لے کر
اپنے ماتھے پہ ترے شوق کا صحرا باندھے
ہم جنوں ذات ترے حکم پہ خود سے نکلے
ایسے نکلے ہیں کہ شاید ہی پلٹ کر آئیں

ارسلان عباس

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے