کی تلاش کا نتیجه | موضو - نظم, صفحہ manch

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "manch"

نظم کے متعلقہ نتیجہ "manch"

نظم

انہیں مجھ سے شکایت ہے کہ میں ماضی میں جیتی ہوں
مرے اشعار میں آسیب ہیں گزرے زمانوں کے
وہ کہتے ہیں کی یادیں سائے کی مانند میرے ساتھ رہتی ہیں
یہ سچ ہے اس سے کب انکار ہے مجھ کو
میں اکثر جاگتے دن میں بھی آنکھیں موند لیتی ہوں
کوئی صورت کوئی آواز کوئی ذائقہ یا لمس جب جادو جگاتا ہے
تو گرد آلود مینا طور تصویریں اچانک بولنے لگتی ہیں ناٹک منچ سجتا ہے
کسی ٹوٹے ہوئے صندوق میں رکھے ہوئے
بوسیدہ مخطوطے سے کوئی داستاں تمثیل بن جاتی ہے
جی اٹھتے ہیں سب کردار ماضی کے
سپاہی بادشاہ خلعت نوادر رقص و موسیقی
کسی کے پاؤں میں پائل دھنک آنچل
کسی شمشیر کی بجلی گھنی برسات کی بدلی
کسی بارہ دری میں راگ دیپک کا
کسی صحن گلستاں میں کدم کے پیڑ پر بیٹھی ہوئی چڑیاں
اچانک جاگ جاتی ہیں
کسی گمنام قصبے میں کوئی ٹوٹی ہوئی محراب خستہ حال ڈیوڑھی کی جھلک
معدوم کر دیتی ہے ہوٹل چائے خانے بس کے اڈے ڈھیر کوڑے کے
کئی صدیاں گزر جاتی ہیں سر سے
اور کوئی گم گشتہ شہر رفتگاں بیدار ہوتا ہے
اسی منظر کا حصہ بن کے میں تصویر ہو جاتی ہوں کھو جاتی ہوں ماضی میں
میں اکثر آبنائے وقت پر کاغذ کی ناؤ ڈال دیتی ہوں
تو پانی اپنا رستہ موڑ دیتا ہے
میں جب چاہوں
سلونی سانولی نٹ کھٹ مدھر یادیں اٹھا لاؤں لڑکپن کے گھروندوں سے
میں جب چاہوں تو کالی کوٹھری میں قید
رنجیدہ پشیماں زخم خوردہ ساعتوں بیتے دنوں کو پیار سے چھو کر
دلاسہ دوں تھپک کر لوریاں دوں
خوب روؤں خوب روؤں شانت ہو جاؤں
یہ ماضی میرا ماضی ہے
فقط میرے تصرف میں ہے
میری ملکیت ہے میرا ورثہ ہے
نہ میرا حال پر بس ہے
اور آنے والا کل بھی کس نے دیکھا ہے

عذرا نقوی

نظم

آؤ زندگی زندگی کھیلیں
یہ جھوٹ ہے کہ میں تمہارے لیے چاند توڑ کے لا سکتا ہوں
پر اس خیال کی سچائی کو ہی عشق کہتے ہیں
روح جب جلتی ہے تو کندن بنتا ہے
تیری بے وفائی کی اس سے اچھی وجہ اور کیا ہو سکتی ہے
صبح سے روٹی کمانے میں لگا ہوا ہوں
اب جب شام ہو گئی ہے تو شراب پینے کا من ہوتا ہے
میرے داغ دل میں ایک چراغ ایسا بھی ہے
جو اماوس کی رات میں میری بجھتی سانسوں کو گرماہٹ دیتا ہے
آدمی کی کھدائی کا وقت کیوں نہیں آتا
دنیا مر رہی ہے کوئی اسے بچانے کیوں نہیں آتا
تیرے آنے سے وہ تمام ادھورے خواب پورے ہو گئے
جنہیں دیکھنا نا میری تقدیر میں تھا اور نا تدبیر میں
میں ایک مشہور شاعر نہیں
پر اس سے میری شاعری میں درد کم تو نہیں ہو جاتا
کورے کاغذ پر بھی کچھ شبد بستے ہیں
ہم بس انہیں پڑھ نہیں پاتے
کون کس کے خلاف گواہی دے
سب کے من میں ایک چور تو ہے ہی
میری گواہی اس کی جان لے سکتی ہے
گواہی نا دی تو میرا ضمیر مجھے مار دے گا
چند دوستوں کے افسانے اب پرائے ہو گئے ہیں
اب کھوٹے سکے جیب میں رکھنے کا من نہیں ہوتا
جب بھی کسی شمشان کے پاس سے گزرتا ہوں
اپنی اوقات پتہ لگ جاتی ہے
کل رات آئینہ دیکھ کر کیوں نہیں سویا
صبح اپنے ہی گھر میں پرایا بن گیا
ہر شہر ہر گلی میں صرف لوگوں کی چیخیں سنائی دیتیں ہیں
رام رحیم کے اس جھگڑے میں ان دونوں کے علاوہ سب ہیں

امت برج شا

نظم

تیرا کوئی دن نہیں
تیرا کوئی روپ نہیں
ابو سفیان کی ہندہ
اس رنگ منچ میں
تیری کوئی جگہ نہیں
اجداد کے انتقام میں
تو کہاں ہے
نسلوں کی خون آشام جنگ میں
تو جلتی رہی
کلیجہ چبانے سے حسین کا خون بہانے تک
زمین و آسمان تجھے ملامت کرتے رہے
بد بخت و شکست خوردہ
ہندہ بنت عتبہ
تیرا قبیلہ تیری وحشت سے پہچانا گیا
تیرا پاگل پن
تیری وجہ شہرت ہے
کسی فیصلے کسی رائے میں تیرا کوئی حوالہ نہیں
تجھے وحشی بنانے والے تیرے ادھ مرے اسلاف
تیری کوکھ زہر آلود کر کے
تجھے بے وجود کر کے
زمین پر مسلط رہے آسیب بن کر
بد بخت ہندہ
جو اتنا شعور تجھے ہوتا
تو سمجھ پاتی
جبری نظام رائج کرنے کے لئے
ہر بار کوکھ برباد کی گئی

انجلا ہمیش

نظم

ابر کے ٹکڑے نٹ کھٹ لڑکوں جیسے گھوم رہے ہیں
پانی کی بوچھاریں کھا کر پودے جھوم رہے ہیں
برکھا رانی بڑی سیانی بادل بادل ڈولے
پی ہو پی ہو پنکھ پسارے بن میں کوئل بولے
دھیرے دھیرے مینڈک اپنا ساز بجاتے نکلے
بھیگی بھیگی شانت فضا میں شور مچاتے نکلے
مینڈک راگ سنا تو جھینگر دوڑے دوڑے آئیں
رنگ منچ پر آنے سے وہ پیچھے کیوں رہ جائیں
ہر نغمے کی لے پر جھومے پیڑوں کی ہریالی
پون سہانے گیت سنائے مہکے ڈالی ڈالی
ڈالی ڈالی سندر کومل پھولوں کی مہکار
رستہ رستہ گونجے جیسے تازہ گیت بہار
جب دھرتی پر برکھا رانی چھم چھم کرتی آئے
یوں لگتا ہے ساری دھرتی نکھری نکھری جائے
جھرجھر کرتا جھرنا بولے سب کی پیاس بجھاؤ
رمتے جوگی بہتا پانی نشترؔ جی بن جاؤ

عبد الرحیم نشتر

نظم

ہر سو رام دھڑاکے سے
تاک دھنا دھن
تاکے سے
بڑھیا مر گئی
فاقے سے
کال کلوٹی
بیگن لوٹی
چھن جائے گی
سوکھی روٹی
گگری چھو چھی
بیل پیاسا
کالے میگھا
پانی دے
پانے دے او پانی دے
پانے دے او پانی دے
ہم دھرتی کے سارے بچے
اس سنسار کے انگ
بھگون
ہاہا کار کی جنگ
بچو
ایک بھینکر کال
روئے ہنسیا اور کدال

سطوت رسول

نظم

تبھی بیدار سونا منچ بے سامان و گمان
اک دور کی آواز سے گونجا
کسی گوشے سے اک نو عمر خوش الحان قاری کی صدا آئی
سنایا جا رہا تھا یوسف صدیق کا قصہ
گداز جاوداں میں
ان لکھی جاتک کتھاؤں کے
وحوش و طیر
لتائیں میگھ دوت اشجار

شفیق فاطمہ شعریٰ

نظم

مجھ سے پہلی سی محبت مری محبوب نہ مانگ
میں نے سمجھا تھا کہ تو ہے تو درخشاں ہے حیات
تیرا غم ہے تو غم دہر کا جھگڑا کیا ہے
تیری صورت سے ہے عالم میں بہاروں کو ثبات
تیری آنکھوں کے سوا دنیا میں رکھا کیا ہے
تو جو مل جائے تو تقدیر نگوں ہو جائے
یوں نہ تھا میں نے فقط چاہا تھا یوں ہو جائے
اور بھی دکھ ہیں زمانے میں محبت کے سوا
راحتیں اور بھی ہیں وصل کی راحت کے سوا

فیض احمد فیض

نظم

بجھا جو روزن زنداں تو دل یہ سمجھا ہے
کہ تیری مانگ ستاروں سے بھر گئی ہوگی
چمک اٹھے ہیں سلاسل تو ہم نے جانا ہے
کہ اب سحر ترے رخ پر بکھر گئی ہوگی
غرض تصور شام و سحر میں جیتے ہیں
گرفت سایۂ دیوار و در میں جیتے ہیں

فیض احمد فیض

نظم

جھلمل جھلمل کرنیں آئیں
مجھ کو چندن ہار پہنانے
جگ مگ جگ مگ تارے آئے
پھر سے میری مانگ سجانے

جاں نثار اختر

نظم

وہ زندگی سے کہتا تھا
کہ تجھ کو میں سجاؤں گا
تو مجھ سے چاند مانگ لے
میں چاند لے کے آؤں گا

جاوید اختر

نظم

میں نے اس سے یہ کہا
یہ جو دس کروڑ ہیں
جہل کا نچوڑ ہیں
ان کی فکر سو گئی
ہر امید کی کرن
ظلمتوں میں کھو گئی
یہ خبر درست ہے
ان کی موت ہو گئی
بے شعور لوگ ہیں
زندگی کا روگ ہیں
اور تیرے پاس ہے
ان کے درد کی دوا
میں نے اس سے یہ کہا
تو خدا کا نور ہے
عقل ہے شعور ہے
قوم تیرے ساتھ ہے
تیرے ہی وجود سے
ملک کی نجات ہے
تو ہے مہر صبح نو
تیرے بعد رات ہے
بولتے جو چند ہیں
سب یہ شر پسند ہیں
ان کی کھینچ لے زباں
ان کا گھونٹ دے گلا
میں نے اس سے یہ کہا
جن کو تھا زباں پہ ناز
چپ ہیں وہ زباں دراز
چین ہے سماج میں
بے مثال فرق ہے
کل میں اور آج میں
اپنے خرچ پر ہیں قید
لوگ تیرے راج میں
آدمی ہے وہ بڑا
در پہ جو رہے پڑا
جو پناہ مانگ لے
اس کی بخش دے خطا

حبیب جالب

نظم

زمانہ آیا ہے بے حجابی کا عام دیدار یار ہوگا
سکوت تھا پردہ دار جس کا وہ راز اب آشکار ہوگا
گزر گیا اب وہ دور ساقی کہ چھپ کے پیتے تھے پینے والے
بنے گا سارا جہان مے خانہ ہر کوئی بادہ خوار ہوگا
کبھی جو آوارۂ جنوں تھے وہ بستیوں میں پھر آ بسیں گے
برہنہ پائی وہی رہے گی مگر نیا خارزار ہوگا
سنا دیا گوش منتظر کو حجاز کی خامشی نے آخر
جو عہد صحرائیوں سے باندھا گیا تھا پھر استوار ہوگا
نکل کے صحرا سے جس نے روما کی سلطنت کو الٹ دیا تھا
سنا ہے یہ قدسیوں سے میں نے وہ شیر پھر ہوشیار ہوگا
کیا مرا تذکرہ جو ساقی نے بادہ خواروں کی انجمن میں
تو پیر مے خانہ سن کے کہنے لگا کہ منہ پھٹ ہے خوار ہوگا
دیار مغرب کے رہنے والو خدا کی بستی دکاں نہیں ہے
کھرا جسے تم سمجھ رہے ہو وہ اب زر کم عیار ہوگا
تمہاری تہذیب اپنے خنجر سے آپ ہی خودکشی کرے گی
جو شاخ نازک پہ آشیانہ بنے گا ناپائیدار ہوگا
سفینۂ برگ گل بنا لے گا قافلہ مور ناتواں کا
ہزار موجوں کی ہو کشاکش مگر یہ دریا سے پار ہوگا
چمن میں لالہ دکھاتا پھرتا ہے داغ اپنا کلی کلی کو
یہ جانتا ہے کہ اس دکھاوے سے دل جلوں میں شمار ہوگا
جو ایک تھا اے نگاہ تو نے ہزار کر کے ہمیں دکھایا
یہی اگر کیفیت ہے تیری تو پھر کسے اعتبار ہوگا
کہا جو قمری سے میں نے اک دن یہاں کے آزاد پا بہ گل ہیں
تو غنچے کہنے لگے ہمارے چمن کا یہ رازدار ہوگا
خدا کے عاشق تو ہیں ہزاروں بنوں میں پھرتے ہیں مارے مارے
میں اس کا بندہ بنوں گا جس کو خدا کے بندوں سے پیار ہوگا
یہ رسم بزم فنا ہے اے دل گناہ ہے جنبش نظر بھی
رہے گی کیا آبرو ہماری جو تو یہاں بے قرار ہوگا
میں ظلمت شب میں لے کے نکلوں گا اپنے در ماندہ کارواں کو
شرر فشاں ہوگی آہ میری نفس مرا شعلہ بار ہوگا
نہیں ہے غیر از نمود کچھ بھی جو مدعا تیری زندگی کا
تو اک نفس میں جہاں سے مٹنا تجھے مثال شرار ہوگا
نہ پوچھ اقبالؔ کا ٹھکانا ابھی وہی کیفیت ہے اس کی
کہیں سر راہ گزار بیٹھا ستم کش انتظار ہوگا

علامہ اقبال

نظم

تم مجھ کو گڑیا کہتے ہو
ٹھیک ہی کہتے ہو!
کھیلنے والے سب ہاتھوں کو میں گڑیا ہی لگتی ہوں
جو پہنا دو مجھ پہ سجے گا
میرا کوئی رنگ نہیں
جس بچے کے ہاتھ تھما دو
میری کسی سے جنگ نہیں
سوچتی جاگتی آنکھیں میری
جب چاہے بینائی لے لو
کوک بھرو اور باتیں سن لو
یا میری گویائی لے لو
مانگ بھرو سیندور لگاؤ
پیار کرو آنکھوں میں بساؤ
اور پھر جب دل بھر جائے تو
دل سے اٹھا کے طاق پہ رکھ دو
تم مجھ کو گڑیا کہتے ہو
ٹھیک ہی کہتے ہو!

پروین شاکر

نظم

مری نظروں میں
آئندہ کے افسوس کے سائے لرزاں ہیں
مجھے قید خوف سے رہا کرو
میں اپنے درد کی ننگی دھوپ سے
گھنی تسلی مانگ مانگ کے ہار گیا
اے درد مرا فیصلہ کرو
مری خالی آنکھیں
منظر منظر بھٹک رہی
لڑکھڑا رہی ہیں
دیا کرو
مجھے خوابوں کی بیساکھی دو

ساقی فاروقی

نظم

جنوری فروری مارچ میں پڑے گی سردی
اور اپریل مئی جون میں ہو گی گرمی

فیض لدھیانوی

نظم

اپنا حق مانگ مگر ان کے تعاون سے نہ مانگ
جو ترے حق کا تصور ہی فنا کر ڈالیں

ساحر لدھیانوی

نظم

وہ کیسی عورتیں تھیں
جو گیلی لکڑیوں کو پھونک کر چولہا جلاتی تھیں
جو سل پر سرخ مرچیں پیس کر سالن پکاتی تھیں
سحر سے شام تک مصروف لیکن مسکراتی تھیں
بھری دوپہر میں سر اپنا جو ڈھک کر ملنے آتی تھیں
جو پنکھے ہاتھ کے جھلتی تھیں اور بس پان کھاتی تھیں
جو دروازے پہ رک کر دیر تک رسمیں نبھاتی تھیں
پلنگوں پر نفاست سے دری چادر بچھاتی تھیں
بصد اصرار مہمانوں کو سرہانے بٹھاتی تھیں
اگر گرمی زیادہ ہو تو روح افزا پلاتی تھیں
جو اپنی بیٹیوں کو سوئیٹر بننا سکھاتی تھیں
سلائی کی مشینوں پر کڑے روزے بتاتی تھیں
بڑی پلیٹوں میں جو افطار کے حصے بناتی تھیں
جو کلمے کاڑھ کر لکڑی کے فریموں میں سجاتی تھیں
دعائیں پھونک کر بچوں کو بستر پر سلاتی تھیں
اور اپنی جا نمازیں موڑ کر تکیہ لگاتی تھیں
کوئی سائل جو دستک دے اسے کھانا کھلاتی تھیں
پڑوسن مانگ لے کچھ با خوشی دیتی دلاتی تھیں
جو رشتوں کو برتنے کے کئی نسخے بتاتی تھیں
محلے میں کوئی مر جائے تو آنسو بہاتی تھیں
کوئی بیمار پڑ جائے تو اس کے پاس جاتی تھیں
کوئی تہوار ہو تو خوب مل جل کر مناتی تھیں
وہ کیسی عورتیں تھیں
میں جب گھر اپنے جاتی ہوں تو فرصت کے زمانوں میں
انہیں ہی ڈھونڈھتی پھرتی ہوں گلیوں اور مکانوں میں
کسی میلاد میں جزدان میں تسبیح دانوں میں
کسی بر‌ آمدے کے طاق پر باورچی خانوں میں
مگر اپنا زمانہ ساتھ لے کر کھو گئی ہیں وہ
کسی اک قبر میں ساری کی ساری سو گئی ہیں وہ

اسنی بدر

نظم

ہم دسمبر میں شاید ملے تھے کہیں۔۔!!
جنوری، فروری، مارچ، اپریل۔۔۔۔
اور اب مئی آ گیا۔۔۔۔
ایک سو بیس دن۔۔۔۔
ایک سو بیس صدیاں۔۔۔۔ گزر بھی گئیں
تم بھی جیتے رہے,
میں بھی جیتی رہی۔۔۔۔
خواہشوں کی سلگتی ہوئی ریت پر
زندگانی دبے پاؤں چلتی رہی
میں جھلستی رہی۔۔۔۔
میں۔۔۔۔ جھلستی۔۔۔۔ رہی
خیر،
چھوڑو یہ سب!
تم بتاؤ تمہیں کیا ہوا؟
کیوں پریشان ہو؟؟؟؟

فریحہ نقوی

نظم

بالوں میں پروئے اتنے موتی
تاروں کا گمان ہو رہا تھا
افشاں کی لکیر مانگ میں تھی
کاجل آنکھوں میں ہنس رہا تھا
کانوں میں مچل رہی تھی بالی
بانہوں سے لپٹ رہا تھا گجرا
اور سارے بدن سے پھوٹتا تھا
اس کے لیے گیت جو لکھا تھا!

پروین شاکر

نظم

دعا دعا وہ چہرہ
حیا حیا وہ آنکھیں
صبا صبا وہ زلفیں
چلے لہو گردش میں
رہے آنکھ میں دل میں
بسے مرے خوابوں میں
جلے اکیلے پن میں
ملے ہر اک محفل میں
دعا دعا وہ چہرہ
کبھی کسی چلمن کے پیچھے
کبھی درخت کے نیچے
کبھی وہ ہاتھ پکڑتے
کبھی ہوا سے ڈرتے
کبھی وہ بارش اندر
کبھی وہ موج سمندر
کبھی وہ سورج ڈھلتے
کبھی وہ چاند نکلتے
کبھی خیال کی رو میں
کبھی چراغ کی لو میں
دعا دعا وہ چہرہ
کبھی بال سکھائے آنگن میں
کبھی مانگ نکالے درپن میں
کبھی چلے پون کے پاؤں میں
کبھی ہنسے دھوپ میں چھاؤں میں
کبھی پاگل پاگل نینوں میں
کبھی چھاگل چھاگل سینوں میں
کبھی پھولوں پھول وہ تھالی میں
کبھی دیوں بھری دیوالی میں
کبھی سجا ہوا آئینے میں
کبھی دعا بنا وہ زینے میں
کبھی اپنے آپ سے جنگوں میں
کبھی جیون موج ترنگوں میں
کبھی نغمہ نور فضاؤں میں
کبھی مولا حضور دعاؤں میں
کبھی رکے ہوئے کسی لمحے میں
کبھی دکھے ہوئے کسی چہرے میں
وہی چہرہ بولتا رہتا ہوں
وہی آنکھیں سوچتا رہتا ہوں
وہی زلفیں دیکھتا رہتا ہوں
دعا دعا وہ چہرہ
حیا حیا وہ آنکھیں
صبا صبا وہ زلفیں

عبید اللہ علیم

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے