Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "plate"

نظم کے متعلقہ نتیجہ "plate"

نظم

کبھی کبھی تو زندگیاں کچھ اتنے وقت میں اپنی مرادیں حاصل کر لیتی ہیں
جتنے وقت میں لقمہ پلیٹ سے منہ میں پہنچتا ہے۔۔۔ اور
اکثر ایسی مرادوں کی تو پہنچ بھی لقموں تک ہوتی ہے
اور جب ایسی منزلیں بارور ہوتی ہیں تو شہر پنپتے ہیں اور گاؤں پھبکتے ہیں۔۔۔ اور
تہذیبوں کی منڈیوں میں ہر جانب قسطاسوں کی ٹیڑھی ڈنڈیاں روز و شب تیزی تیزی سے
انسانوں کی جھولیوں میں رزقوں کی دھڑیاں الٹتی ہیں اور
بھرے سماجوں میں شدھ تلقینوں کی ڈونڈیاں پیٹنے والے بھی اپنی اپنی پیغمبریوں کی تنخواہیں پاتے ہیں
لیکن کس کو خبر ہے ایسی بھی ہیں منزلیں جن تک جانے والے راستوں پر نہ دعا کا سایہ ہے نہ قضا کا گڑھا ہے
کچھ ہے بھی تو بس اپنی سوچوں کی دھجیوں میں سمٹی ہوئی اک بے چارگی جس کی بے صدا
ہوک میں عمریں ڈوب جاتی ہیں

مجید امجد
نظم

چائے کی میز سے لگ کر میں کھڑا تھا خاموش
وہ سموسوں سے بھری پلیٹ لیے پاس آئی
اور پوچھا بہت آہستہ سے
''ناک کی کیل کو انگریزی میں کیا کہتے ہیں''
عمر ہوگی کوئی چوبیس برس
ڈیڑھ دو سال کا بیٹا تھا بہت پیارا سا
جو کبھی گود میں ہوتا تو کبھی بھاگ کے
آنگن میں چلا جاتا تھا
ناک میں بائیں طرف کیل تھی آنکھوں میں چمک
اور چمک وہ جو گناہوں کو چھپا لیتی ہے
کالے بالوں میں گندھی شام کی رعنائی تھی
ایسی رعنائی جو آداب بھلا دیتی ہے
ضبط اور فہم کو نا وقت سلا دیتی ہے
خون میں سوئی ہوئی آگ جگا دیتی ہے
داد دینا تو بہت دور کی بات
ایک بھی نظم توجہ سے نہیں اس نے سنی
ہم کہیں اور رہے اور وہ کہیں اور رہی
''ناک کی کیل کو انگریزی میں کیا کہتے ہیں''

حارث خلیق
نظم

خوش ہیں ایسے لوگ دنیا میں جو خوش خوراک ہیں
اور ان لوگوں کے دسترخوان ہیبت ناک ہیں
ان کے دسترخوان پہ خوشبو مثالی چائے کی
چار انڈے چھ سلائس دس پیالی چائے کی
ہو گئے جب چائے کی لذت سے دل برداشتہ
کھا لیے آدھا کلو انگور بعد از ناشتہ
جب کہیں موقع ملا تھوڑا سا بسکٹ کھا لیا
نوش جاں فرما لیا پھر پان سگریٹ چھالیا
دوپہر میں چھ چپاتی چار انڈے آملیٹ
چار چھ شامی کباب اور اک نہاری کے پلیٹ
کوفتے حسب لیاقت ایک لسی کا گلاس
کھا گئے اور پی گئے موصوف بے خوف و ہراس
دعوتوں کے جال پھیلائے ہوئے ہیں ہر طرف
کہہ دیا کھانے سے پہلے ہی تکلف بر طرف
رات کو تھوڑی سی جیلی کچھ مربہ آم کا
کچھ پپیتا لے لیا پھر ہاضمے کے نام کا
دو پراٹھے لے لئے کچھ دیر سستانے کے بعد
''اک ترے آنے سے پہلے اک ترے جانے کے بعد''

خالد عرفان
نظم

رات پلیٹ میں دکھ رکھا تھا
صبح کے کپ میں بے زاری تھی
شام چائے کے ساتھ پڑا تھا
دل کی صورت والا برفی کا اک ٹکڑا
آج مرے کمرے میں پھر سے ہجر کی ٹیبل پر
دل کا پیالہ یوں اشکوں سے بھرا ہوا تھا
اندر سے کچھ ٹوٹ گیا تھا
اور اک جگ یادوں سے بھرا میری جانب دیکھ رہا تھا
ایک گلاس تھکن کا خالی
جیسے در سے کوئی سوالی
بن پائے ہی لوٹ گیا تھا
نیند کے تکیے پر سر رکھا
میرے سرہانے کتاب تمہاری
میرا جیون دم سادھے چپ چاپ پڑا تھا
میں نے جوں ہی ہاتھ بڑھایا
لفظوں سے اک چہرہ ابھرا
رات بہت ہی بیت چکی ہے
اب سو جاؤ

الماس شبی
نظم

یوں ٹیڑھی ترچھی آڑی
جیسے سڑک ہو ان کی
اپنی ہی کھیتی باڑی
دو دوست پیچھے بیٹھے
دو چڑھ گئے اگاڑی
یہ پھٹ پھٹی ہے کوئی
یا بھاگتی پہاڑی
پھٹ پھٹ پھٹاک کر کے
جب یہ سڑک پہ دھاڑی
دائیں کو پہلے گھومی
پھر بائیں سمت تاڑی
اک بس سے بچ کے نکلی
اک سائیکل پچھاڑی
اک ٹیکسی کو رگڑا
نمبر پلیٹ اکھاڑی
فٹ پاتھ پر جو اچھلی
ٹکرایا اک کباڑی
پھر روڑ پر اتر کر
مچوا دی بھگ بھگاڑی
وہ چوک کا سپاہی
روکی تھی جس نے گاڑی
لو وہ بھی کود بھاگا
پھاندی بڑی سی جھاڑی
یوں ڈگمگا کے لڑکے
چاچو کے سارے آڑی
دکھلائیں جیسے سرکس
کچھ مسخرے اناڑی

احمد حاطب صدیقی
نظم

جیسا کہ کبھی وہ لڑتے ہیں کتابوں پر
کاپی اور رنگین پنسلوں کے حسابوں پر
یہ لڑتے ہیں کبھی سر اور سنگیت پر
کھیل میں کبھی ہار اور کبھی جیت پر
کبھی اسکول کا ہوم ورک کرنے میں
کبھی تصویروں میں رنگ بھرنے میں
کبھی کھانے پینے کی چیزوں پر
دسترخوان اور کھانے کی میزوں پر
یہ لڑتے ہیں دال مچھلی اور انڈے پر
کبھی گرم چائے اور آئس کریم کے ٹھنڈے پر
لڑتے ہوئے توڑ دیتے ہیں گلاس اور پلیٹ
اور برباد کر دیتے ہیں یہ ساری چاکلیٹ

عشرت معین سیما
نظم

کھونٹی پہ لٹکے اک لیمپ کی
پیلی پیلی روشنی میں
تھکی تھکی سی شام کی پیٹھ
دیواروں پر دھوئیں کے بادل کی پرتیں
کمرے میں لکڑی کا ٹوٹا پھوٹا ٹیبل
اور پرانی چار کرسیاں
ٹیبل پر مٹی کی پلیٹ میں ابلے آلو کی خوشبو
آلو کی خوشبو میں بھیگا کومل ہاتھ
اور مری دونوں آنکھیں بھی
ذائقہ لیتی ہیں آلو کا رنگوں میں

جینت پرمار
نظم

۱
پوتی سے دادی بننے کے لمبے سفر میں
ایسا کوئی پڑاؤ نہیں آیا تھا جس پر
رک کے تازہ دم ہونے کی
سوکھی سوندھی پیال پہ پڑ کے
میٹھے میٹھے سپنوں میں سو جانے کی مہلت ملتی
اب منزل پر آ کے تھک کے چور پڑی وہ
میٹھے سپنوں میں سو جانے کی کوشش
کرتے کرتے کیا بے حال ہوئی جاتی ہے
کھانس کھانس کے ساری رات گزر جاتی ہے
۲
بھرے پرے محلوں جیسے اس گھر کا
اک اک کمرہ
اپنے اپنے نام سے اب ریزرو کرا رکھا ہے سبھوں نے
وہ جو برساتی میں بیتی یادیں اوڑھ کے لیٹا
اپنے دن گنتا ہے
نیم پلیٹ پہ گھر کے اسی بوڑھے کا نام
لکھا ہوا ہے بڑے بڑے حرفوں میں
۳
رستہ بالکل صاف ہے
پختہ سیدھی سڑک ہے
نیلے والے باغ کے پھولوں سے ملنے روزانہ
جایا جا سکتا ہے لیکن کیسے
سوچ کے ہی پیروں میں اینٹھن ہونے لگتی ہے
اور دم بے دم ہونے لگتا ہے
۴
بیتابی سے ڈھونڈ رہا ہے کیسے پائے گا اب
وہ سب کچھ جو چھوڑ گیا تھا
نئے نئے سامانوں سے گھر چھت تک اٹا پڑا ہے
پہلے جو رکھا تھا یہاں وہ ان میں دب کر
ٹوٹ کے چکنا چور ہوا یا کوئی کباڑی
سستے داموں لے کے گیا یہ کون بتائے
تال پہ اس کے لائے ہوئے اسٹریو میوزک سسٹم کے
سب تھرک رہے ہیں
ایسے شور شرابے میں اب اس کی کون سنے گا
پہلے گھر والوں سے آئی ایس ڈی پر
منٹوں کا ہی رابطہ اک قائم تو ہو جاتا تھا

بلقیس ظفیر الحسن
نظم

میرے روئی کے بستروں کے سلگنے سے
صحن میں دھواں پھیلتا جا رہا ہے
گھروں کی چلمنوں سے اس پار
باہر بیٹھی ہوا رو رہی ہے
نظام سقا پیاس کی اوک کے سامنے
سبیل لگائے ہوئے العطش بانٹتا ہے
زمانہ پیاس کے نوحے پر
ماتمی دف بجا رہا ہے
ڈبلیو ٹی او اناج کی گٹھریوں پہ بیٹھی
بھوکوں کو امن کے حروف سے بھری
پلیٹ دے رہی ہے
یو این او کی آنکھ کے کناروں کی جنبشوں سے دنیا
کپکپا رہی ہے
ماں
مامتا کو ہنسی آ رہی ہے
دودھ کی جگہ چھاتیوں میں
نظریے اور فلسفے گھولے جا رہے ہیں
وقت کی ڈور پر جھولتے بچوں سے
جھولنے کے اوقات چھینے جا رہے ہیں
بارود بم میزائل اور دھماکے
دھرتی کی کوکھ میں دھکیلے جا رہے ہیں

ثروت زہرا
نظم

انسانی حقوق کی پلیٹ میں
رکھا کانٹا اور بیڑیوں کو کاٹنے
والی رنگ آلود چھری مل کر بھی
خدا کے ہونٹوں کو زخمی نہیں کر سکتے

مددثر عبّاس
نظم

ایک چھوٹی سی نیم پلیٹ
جس پر میرا نام لکھا تھا
سال بھر سے میرے کمرے میں
ماری ماری پھر رہی تھی
ٹیبل سے کھڑکی پر
اور کبھی
کھڑکی سے الماری پر
دھول سے اٹی
جگہ بدل رہی تھی
اس اک انتظار میں کہ جب
دو کیلیں اور ایک ہتھوڑی یکجا ہوں
اور کل
بالآخر میں نے
دو کیلوں کی صلیب پر
اپنے نام کو ٹانگ دیا
اب یہ کمرہ بے نام نہیں ہے

قمر الحسن زیدی
نظم

نہیں معلوم زریونؔ اب تمہاری عمر کیا ہوگی
وہ کن خوابوں سے جانے آشنا نا آشنا ہوگی
تمہارے دل کے اس دنیا سے کیسے سلسلے ہوں گے
تمہیں کیسے گماں ہوں گے تمہیں کیسے گلے ہوں گے
تمہاری صبح جانے کن خیالوں سے نہاتی ہو
تمہاری شام جانے کن ملالوں سے نبھاتی ہو
نہ جانے کون دوشیزہ تمہاری زندگی ہوگی
نہ جانے اس کی کیا بایستگی شائستگی ہوگی
اسے تم فون کرتے اور خط لکھتے رہے ہو گے
نہ جانے تم نے کتنی کم غلط اردو لکھی ہوگی
یہ خط لکھنا تو دقیانوس کی پیڑھی کا قصہ ہے
یہ صنف نثر ہم نابالغوں کے فن کا حصہ ہے
وہ ہنستی ہو تو شاید تم نہ رہ پاتے ہو حالوں میں
گڑھا ننھا سا پڑ جاتا ہو شاید اس کے گالوں میں
گماں یہ ہے تمہاری بھی رسائی نارسائی ہو
وہ آئی ہو تمہارے پاس لیکن آ نہ پائی ہو
وہ شاید مائدے کی گند بریانی نہ کھاتی ہو
وہ نان بے خمیر میدہ کم تر ہی چباتی ہو
وہ دوشیزہ بھی شاید داستانوں کی ہو دل دادہ
اسے معلوم ہوگا زالؔ تھا سہرابؔ کا دادا
تہمتن یعنی رستمؔ تھا گرامی سامؔ کا وارث
گرامی سامؔ تھا صلب نر مانیؔ کا خوش زادہ
(یہ میری ایک خواہش ہے جو مشکل ہے)
وہ نجمؔ آفندی مرحوم کو تو جانتی ہوگی
وہ نوحوں کے ادب کا طرز تو پہچانتی ہوگی
اسے کد ہوگی شاید ان سبھی سے جو لپاڑی ہوں
نہ ہوں گے خواب اس کا جو گویے اور کھلاڑی ہوں

جون ایلیا
نظم

یہ واقعے
حادثے
تصادم
ہر ایک غم
اور ہر اک مسرت
ہر اک اذیت
ہر ایک لذت
ہر اک تبسم
ہر ایک آنسو
ہر ایک نغمہ
ہر ایک خوشبو
وہ زخم کا درد ہو
کہ وہ لمس کا ہو جادو
خود اپنی آواز ہو کہ ماحول کی صدائیں
یہ ذہن میں بنتی اور بگڑتی ہوئی فضائیں
وہ فکر میں آئے زلزلے ہوں کہ دل کی ہلچل
تمام احساس
سارے جذبے
یہ جیسے پتے ہیں
بہتے پانی کی سطح پر
جیسے تیرتے ہیں
ابھی یہاں ہیں
ابھی وہاں ہیں
اور اب ہیں اوجھل
دکھائی دیتا نہیں ہے لیکن
یہ کچھ تو ہے
جو کہ بہہ رہا ہے
یہ کیسا دریا ہے
کن پہاڑوں سے آ رہا ہے
یہ کس سمندر کو جا رہا ہے
یہ وقت کیا ہے

جاوید اختر
نظم

یہ ڈائری ہے اور اس میں پتے ہیں اور نمبر
اسے خیال سے بکسے کی جیب میں رکھنا
ہے عرض ''حضرت غائب دماغ'' بندی کی
کہ اپنے عیب کی حالت کو غیب میں رکھنا

جون ایلیا
نظم

میں نے ماضی سے کئی خشک سی شاخیں کاٹیں
تم نے بھی گزرے ہوئے لمحوں کے پتے توڑے
میں نے جیبوں سے نکالیں سبھی سوکھی نظمیں
تم نے بھی ہاتھوں سے مرجھائے ہوئے خط کھولے
اپنی ان آنکھوں سے میں نے کئی مانجے توڑے
اور ہاتھوں سے کئی باسی لکیریں پھینکیں
تم نے پلکوں پہ نمی سوکھ گئی تھی سو گرا دی
رات بھر جو بھی ملا اگتے بدن پر ہم کو
کاٹ کے ڈال دیا جلتے الاؤ میں اسے

گلزار
نظم

وقت کے اگلے شہر کے سارے باشندے
سب دن سب راتیں
جو تم سے ناواقف ہوں گے
وہ کب میری بات سنیں گے
مجھ سے کہیں گے
جاؤ اپنی راہ لو راہی
ہم کو کتنے کام پڑے ہیں
جو بیتی سو بیت گئی
اب وہ باتیں کیوں دہراتے ہو
کندھے پر یہ جھولی رکھے
کیوں پھرتے ہو کیا پاتے ہو
میں بے چارہ
اک بنجارہ
آوارہ پھرتے پھرتے جب تھک جاؤں گا
تنہائی کے ٹیلے پر جا کر بیٹھوں گا
پھر جیسے پہچان کے مجھ کو
اک بنجارہ جان کے مجھ کو
وقت کے اگلے شہر کے سارے ننھے منے بھولے لمحے
ننگے پاؤں
دوڑے دوڑے بھاگے بھاگے آ جائیں گے
مجھ کو گھیر کے بیٹھیں گے
اور مجھ سے کہیں گے
کیوں بنجارے
تم تو وقت کے کتنے شہروں سے گزرے ہو
ان شہروں کی کوئی کہانی ہمیں سناؤ
ان سے کہوں گا
ننھے لمحو!
ایک تھی رانی
سن کے کہانی
سارے ننھے لمحے
غمگیں ہو کر مجھ سے یہ پوچھیں گے
تم کیوں ان کے شہر نہ آئیں
لیکن ان کو بہلا لوں گا
ان سے کہوں گا
یہ مت پوچھو
آنکھیں موندو
اور یہ سوچو
تم ہوتیں تو کیسا ہوتا
تم یہ کہتیں
تم وہ کہتیں
تم اس بات پہ حیراں ہوتیں
تم اس بات پہ کتنی ہنستیں
تم ہوتیں تو ایسا ہوتا
تم ہوتیں تو ویسا ہوتا

جاوید اختر
نظم

یہ ساغر شیشے لعل و گہر
سالم ہوں تو قیمت پاتے ہیں
یوں ٹکڑے ٹکڑے ہوں تو فقط
چبھتے ہیں لہو رلواتے ہیں

فیض احمد فیض
نظم

یہ رات اس درد کا شجر ہے
جو مجھ سے تجھ سے عظیم تر ہے
مگر اسی رات کے شجر سے
یہ چند لمحوں کے زرد پتے

فیض احمد فیض
نظم

میں اپنے بند کمرے میں پڑا ہوں
اور اک دیوار پر نظریں جمائے
مناظر کے عجوبے دیکھتا ہوں
اسی دیوار میں کوئی خلا ہے
مجھے جو غار جیسا لگ رہا ہے
وہاں مکڑی نے جال بن لیا ہے
اور اب اپنے ہی جال میں پھنسی ہے
وہیں پر ایک مردہ چھپکلی ہے
کئی صدیوں سے جو ساکت پڑی ہے
اب اس پر کائی جمتی جا رہی ہے
اور اس میں ایک جنگل دکھ رہا ہے
درختوں سے پرندے گر رہے ہیں
کلہاڑی شاخ پر لٹکی ہوئی ہے
لکڑہارے پہ گیدڑ ہنس رہے
مسلسل تیز بارش ہو رہی ہے
کسی پتے سے گر کر ایک قطرہ
اچانک ایک سمندر بن گیا ہے
سمندر ناؤ سے لڑنے لگا ہے
مچھیرا مچھلیوں میں گھر گیا ہے
اور اب پتوار سینہ سے لگا کر
وو نیلے آسماں کو دیکھتا ہے
جو یک دم زرد پڑتا جا رہا ہے
وو کیسے ریت بنتا جا رہا ہے
مجھے اب صرف صحرا دکھ رہا ہے
اور اس میں دھوم کی چادر بچھی ہے
مگر وو ایک جگہ سے پھٹ رہی ہے
وہاں پر ایک سایہ ناچتا ہے
جہاں بھی پیر دھرتا ہے وہاں پر
سنہرے پھول کھلتے جا رہے ہے
یے صحرا باغ بنتا جا رہا ہے
اور اس میں تتلیاں دکھتی ہیں
پروں میں جن کے نیلی روشنی ہے
وہ ہر پل تیز ہوتی جا رہی ہے
سو میری آنکھ میں چبھنے لگی ہے
سو میں نے ہاتھ آنکھوں پر رکھے ہیں
اور اب انگلی ہٹا کر دیکھتا ہوں
کہ اپنے بند کمرے میں پڑا ہوں
اور اک دیوار کے آگے کھڑا ہوں

عمار اقبال
نظم

جب آدمی کے حال پہ آتی ہے مفلسی
کس کس طرح سے اس کو ستاتی ہے مفلسی
پیاسا تمام روز بٹھاتی ہے مفلسی
بھوکا تمام رات سلاتی ہے مفلسی
یہ دکھ وہ جانے جس پہ کہ آتی ہے مفلسی
کہیے تو اب حکیم کی سب سے بڑی ہے شاں
تعظیم جس کی کرتے ہیں تو اب اور خاں
مفلس ہوئے تو حضرت لقماں کیا ہے یاں
عیسیٰ بھی ہو تو کوئی نہیں پوچھتا میاں
حکمت حکیم کی بھی ڈوباتی ہے مفلسی
جو اہل فضل عالم و فاضل کہاتے ہیں
مفلس ہوئے تو کلمہ تلک بھول جاتے ہیں
وہ جو غریب غربا کے لڑکے پڑھاتے ہیں
ان کی تو عمر بھر نہیں جاتی ہے مفلسی
مفلس کرے جو آن کے محفل کے بیچ حال
سب جانیں روٹیوں کا یہ ڈالا ہے اس نے جال
گر گر پڑے تو کوئی نہ لیے اسے سنبھال
مفلس میں ہوویں لاکھ اگر علم اور کمال
سب خاک بیچ آ کے ملاتی ہے مفلسی
جب روٹیوں کے بٹنے کا آ کر پڑے شمار
مفلس کو دیویں ایک تونگر کو چار چار
گر اور مانگے وہ تو اسے جھڑکیں بار بار
مفلس کا حال آہ بیاں کیا کروں میں یار
مفلس کو اس جگہ بھی چباتی ہے مفلسی
مفلس کی کچھ نظر نہیں رہتی ہے آن پر
دیتا ہے اپنی جان وہ ایک ایک نان پر
ہر آن ٹوٹ پڑتا ہے روٹی کے خوان پر
جس طرح کتے لڑتے ہیں اک استخوان پر
ویسا ہی مفلسوں کو لڑاتی ہے مفلسی
کرتا نہیں حیا سے جو کوئی وہ کام آہ
مفلس کرے ہے اس کے تئیں انصرام آہ
سمجھے نہ کچھ حلال نہ جانے حرام آہ
کہتے ہیں جس کو شرم و حیا ننگ و نام آہ
وہ سب حیا و شرم اڑاتی ہے مفلسی
یہ مفلسی وہ شے ہے کہ جس گھر میں بھر گئی
پھر جتنے گھر تھے سب میں اسی گھر کے در گئی
زن بچے روتے ہیں گویا نانی گزر گئی
ہم سایہ پوچھتے ہیں کہ کیا دادی مر گئی
بن مردے گھر میں شور مچاتی ہے مفلسی
لازم ہے گر غمی میں کوئی شور غل مچائے
مفلس بغیر غم کے ہی کرتا ہے ہائے ہائے
مر جاوے گر کوئی تو کہاں سے اسے اٹھائے
اس مفلسی کی خواریاں کیا کیا کہوں میں ہائے
مردے کو بے کفن کے گڑاتی ہے مفلسی
کیا کیا مفلسی کی کہوں خواری پھکڑیاں
جھاڑو بغیر گھر میں بکھرتی ہیں جھکڑیاں
کونے میں جالے لپٹے ہیں چھپر میں مکڑیاں
پیسا نہ ہووے جن کے جلانے کو لکڑیاں
دریا میں ان کے مردے بہاتی ہے مفلسی
بی بی کی نتھ نہ لڑکوں کے ہاتھوں کڑے رہے
کپڑے میاں کے بنیے کے گھر میں پڑے رہے
جب کڑیاں بک گئیں تو کھنڈر میں پڑے رہے
زنجیر نے کواڑ نہ پتھر گڑے رہے
آخر کو اینٹ اینٹ کھداتی ہے مفلسی
نقاش پر بھی زور جب آ مفلسی کرے
سب رنگ دم میں کر دے مصور کے کرکرے
صورت بھی اس کی دیکھ کے منہ کھنچ رہے پرے
تصویر اور نقش میں کیا رنگ وہ بھرے
اس کے تو منہ کا رنگ اڑاتی ہے مفلسی
جب خوب رو پہ آن کے پڑتا ہے دن سیاہ
پھرتا ہے بوسے دیتا ہے ہر اک کو خواہ مخواہ
ہرگز کسی کے دل کو نہیں ہوتی اس کی چاہ
گر حسن ہو ہزار روپے کا تو اس کو آہ
کیا کوڑیوں کے مول بکاتی ہے مفلسی
اس خوب رو کو کون دے اب دام اور درم
جو کوڑی کوڑی بوسہ کو راضی ہو دم بہ دم
ٹوپی پرانی دو تو وہ جانے کلاہ جسم
کیوں کر نہ جی کو اس چمن حسن کے ہو غم
جس کی بہار مفت لٹاتی ہے مفلسی
عاشق کے حال پر بھی جب آ مفلسی پڑے
معشوق اپنے پاس نہ دے اس کو بیٹھنے
آوے جو رات کو تو نکالے وہیں اسے
اس ڈر سے یعنی رات و دھنا کہیں نہ دے
تہمت یہ عاشقوں کو لگاتی ہے مفلسی
کیسے ہی دھوم دھام کی رنڈی ہو خوش جمال
جب مفلسی ہو کان پڑے سر پہ اس کے جال
دیتے ہیں اس کے ناچ کو ٹھٹھے کے بیچ ڈال
ناچے ہے وہ تو فرش کے اوپر قدم سنبھال
اور اس کو انگلیوں پہ نچاتی ہے مفلسی
اس کا تو دل ٹھکانے نہیں بھاؤ کیا بتائے
جب ہو پھٹا دوپٹہ تو کاہے سے منہ چھپائے
لے شام سے وہ صبح تلک گو کہ ناچے گائے
اوروں کو آٹھ سات تو وہ دو ٹکے ہی پائے
اس لاج سے اسے بھی لجاتی ہے مفلسی
جس کسبی رنڈی کا ہو ہلاکت سے دل حزیں
رکھتا ہے اس کو جب کوئی آ کر تماش بیں
اک پون پیسے تک بھی وہ کرتی نہیں نہیں
یہ دکھ اسی سے پوچھئے اب آہ جس کے تئیں
صحبت میں ساری رات جگاتی ہے مفلسی
وہ تو یہ سمجھے دل میں کہ ڈھیلا جو پاؤں گی
دمڑی کے پان دمڑی کے مسی منگاؤں گی
باقی رہی چھدام سو پانی بھراؤں گی
پھر دل میں سوچتی ہے کہ کیا خاک کھاؤں گی
آخر چبینا اس کا بھناتی ہے مفلسی
جب مفلسی سے ہووے کلاونت کا دل اداس
پھرتا ہے لے طنبورے کو ہر گھر کے آس پاس
اک پاؤ سیر آنے کی دل میں لگا کے آس
گوری کا وقت ہووے تو گاتا ہے وہ ببھاس
یاں تک حواس اس کے اڑاتی ہے مفلسی
مفلس بیاہ بیٹی کا کرتا ہے بول بول
پیسا کہاں جو جا کے وہ لاوے جہیز مول
جورو کا وہ گلا کہ پھوٹا ہو جیسے ڈھول
گھر کی حلال خوری تلک کرتی ہے ٹھٹھول
ہیبت تمام اس کی اٹھاتی ہے مفلسی
بیٹے کا بیاہ ہو تو نہ بیاہی نہ ساتھی ہے
نے روشنی نہ باجے کی آواز آتی ہے
ماں پیچھے ایک میلی چدر اوڑھے جاتی ہے
بیٹا بنا ہے دولہا تو باوا براتی ہے
مفلس کی یہ برات چڑھاتی ہے مفلسی
گر بیاہ کر چلا ہے سحر کو تو یہ بلا
شہدار نانا ہیجڑا اور بھاٹ منڈ چڑھا
کھینچے ہوئے اسے چلے جاتے ہیں جا بہ جا
وہ آگے آگے لڑتا ہوا جاتا ہے چلا
اور پیچھے تھپڑیوں کو بجاتی ہے مفلسی
دروازے پر زنانے بجاتے ہیں تالیاں
اور گھر میں بیٹھی ڈومنی دیتی ہیں گالیاں
مالن گلے کی ہار ہو دوڑی لے ڈالیاں
سقا کھڑا سناتا ہے باتیں رزالیاں
یہ خواری یہ خرابی دکھاتی ہے مفلسی
کوئی شوم بے حیا کوئی بولا نکھٹو ہے
بیٹی نے جانا باپ تو میرا نکھٹو ہے
بیٹے پکارتے ہیں کہ بابا نکھٹو ہے
بی بی یہ دل میں کہتی ہے اچھا نکھٹو ہے
آخر نکھٹو نام دھراتی ہے مفلسی
مفلس کا درد دل میں کوئی ٹھانتا نہیں
مفلس کی بات کو بھی کوئی مانتا نہیں
ذات اور حسب نسب کو کوئی جانتا نہیں
صورت بھی اس کی پھر کوئی پہچانتا نہیں
یاں تک نظر سے اس کو گراتی ہے مفلسی
جس وقت مفلسی سے یہ آ کر ہوا تباہ
پھر کوئی اس کے حال پہ کرتا نہیں نگاہ
دالیدری کہے کوئی ٹھہرا دے رو سیاہ
جو باتیں عمر بھر نہ سنی ہوویں اس نے آہ
وہ باتیں اس کو آ کے سناتی ہیں مفلسی
چولہا توانا پانی کے مٹکے میں آبی ہے
پینے کو کچھ نہ کھانے کو اور نے رکابی ہے
مفلس کے ساتھ سب کے تئیں بے حجابی ہے
مفلس کی جورو سچ ہے کہ یاں سب کی بھابی ہے
عزت سب اس کے دل کی گنواتی ہے مفلسی
کیسا ہی آدمی ہو پر افلاس کے طفیل
کوئی گدھا کہے اسے ٹھہرا دے کوئی بیل
کپڑے پھٹے تمام بڑھے بال پھیل پھیل
منہ خشک دانت زرد بدن پر جما ہے میل
سب شکل قیدیوں کی بناتی ہے مفلسی
ہر آن دوستوں کی محبت گھٹاتی ہے
جو آشنا ہیں ان کی تو الفت گھٹاتی ہے
اپنے کی مہر غیر کی چاہت گھٹاتی ہے
شرم و حیا و عزت و حرمت گھٹاتی ہے
ہاں ناخن اور بال بڑھاتی ہے مفلسی
جب مفلسی ہوئی تو شرافت کہاں رہی
وہ قدر ذات کی وہ نجابت کہاں رہی
کپڑے پھٹے تو لوگوں میں عزت کہاں رہی
تعظیم اور تواضع کی بابت کہاں رہی
مجلس کی جوتیوں پہ بٹھاتی ہے مفلسی
مفلس کسی کا لڑکا جو لے پیار سے اٹھا
باپ اس کا دیکھے ہاتھ کا اور پاؤں کا کڑا
کہتا ہے کوئی جوتی نہ لیوے کہیں چرا
نٹ کھٹ اچکا چور دغاباز گٹھ کٹا
سو سو طرح کے عیب لگاتی ہے مفلسی
رکھتی نہیں کسی کی یہ غیرت کی آن کو
سب خاک میں ملاتی ہے حرمت کی شان کو
سو محنتوں میں اس کی کھپاتی ہے جان کو
چوری پہ آ کے ڈالے ہی مفلس کے دھیان کو
آخر ندان بھیک منگاتی ہے مفلسی
دنیا میں لے کے شاہ سے اے یار تا فقیر
خالق نہ مفلسی میں کسی کو کرے اسیر
اشراف کو بناتی ہے اک آن میں فقیر
کیا کیا میں مفلسی کی خرابی کہوں نظیرؔ
وہ جانے جس کے دل کو جلاتی ہے مفلسی

نظیر اکبرآبادی
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے