Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "plate"

Nazm MATCHES FOR "plate"

Nazm

kabhi kabhi to zindagiyan

kabhii kabhii to zindagiyaa.n kuchh itne vaqt me.n apnii muraade.n haasil kar letii hai.n
jitne vaqt me.n luqma plate se mu.nh me.n pahu.nchtaa hai... aur
aksar aisii muraado.n kii to pahu.nch bhii luqmo.n tak hotii hai
aur jab aisii manzile.n baarvar hotii hai.n to shahr panapte hai.n aur gaa.nv phabakte hai.n… aur
tahziibo.n kii manDiyo.n me.n har jaanib qistaaso.n kii Te.Dhii DanDiyaa.n roz o shab tezii tezii se
insaano.n kii jholiyo.n me.n rizqo.n kii dha.Dyaa.n ulaTtii hai.n aur
bhare samaajo.n me.n shuddh talqiino.n kii DauDiyaa.n piiTne vaale bhii apnii apnii paGambariyo.n kii tanKHvaahe.n paate hai.n
lekin kis ko KHabar hai aisii bhii hai.n manzile.n jin tak jaane vaale raasto.n par na du.aa kaa saaya hai na qazaa kaa ga.Dhaa hai
kuchh hai bhii to bas apnii socho.n kii dhajjiyo.n me.n simTii hu.ii ik bechaargii jis kii be-sadaa
huuk me.n umre.n Duub jaatii hai.n

Majeed Amjad
Nazm

kya kahiye

chaa.e kii mez se lag kar mai.n kha.Daa thaa KHaamosh
vo samoso.n se bharii plate liye paas aa.ii
aur puuchaa bahut aahista se
''naak kii kiil ko a.ngrezii me.n kyaa kahte hai.n''
umr hogii ko.ii chaubiis baras
Dhe.Dh do saal kaa beTaa thaa bahut pyaaraa saa
jo kabhii god me.n hotaa to kabhii bhaag ke
aa.ngan me.n chalaa jaaataa thaa
naak me.n baa.e.n taraf kiil thii aa.ankho.n me.n chamak
aur chamak vo jo gunaaho.n ko chhupaa letii hai
kaale baalo.n me.n gu.ndhii shaam kii ra.anaa.ii thii
aisii ra.anaa.ii jo aadaab bhulaa detii hai
zabt aur fahm ko naa-vaqt sulaa detii hai
KHuun me.n so.ii hu.ii aag jagaa detii hai
daad denaa to bahut daur kii baat
ek bhii nazm tavajjoh se nahii us ne sunii
ham kahii.n aur rahe aur vo kahii.n aur rahii
''naak kii kiil ko a.ngrezii me.n kyaa kahte hai.n''

Harris Khalique
Nazm

KHush-KHurak

KHush hai.n aise log duniyaa me.n jo KHush-KHuuraak hai.n
aur un logo.n ke dastar-KHvaan haibatnaak hai.n
un ke dastar-KHvaan pe KHushbuu misaalii chaa.e kii
chaar anDe chhe slice das piyaalii chaa.e kii
ho ga.e jab chaa.e kii lazzat se dil-bardashta
khaa liye aadhaa kilo anguur ba.ad-az-naashta
jab kahii.n mauqa.a milaa tho.Daa saa biscuit khaa liyaa
nosh-e-jaa.n farmaa liyaa phir paan cigarette chhaaliyaa
dopahar me.n chhe chapaatii chaar anDe omelette
chaar-chhe shaamii kabaab aur ik nahaarii ke plate
kofte hasb-e-liyaaqat ek lassii kaa gilass
khaa ga.e aur pii ga.e mausuuf be-KHauf-o-hiraas
da.avato.n ke jaal phailaa.e hu.e hai.n har taraf
kah diyaa khaane se pahle hii takalluf-bar-taraf
raat ko tho.Dii sii jelly kuchh murbba aam kaa
kuchh papiitaa le liyaa phir haazme ke naam kaa
do paraaThe le liye kuchh der sustaane ke ba.ad
''ik tire aane se pahle ik tire jaane ke ba.ad''

Khalid Irfan
Nazm

ehsas

raat plate me.n dukh rakkhaa thaa
sub.h ke cup me.n be-zaarii thii
shaam chaa.e ke saath pa.Daa thaa
dil kii suurat vaalaa barfii kaa ik Tuk.Daa
aaj mire kamre me.n phir se hijr kii Table par
dil kaa piyaala yuu.n ashko.n se bharaa hu.aa thaa
andar se kuchh TuuT gayaa thaa
aur ik jag yaado.n se bharaa merii jaanib dekh rahaa thaa
ek gilaas thakan kaa KHaalii
jaise dar se ko.ii savaalii
bin paa.e hii lauT gayaa thaa
nii.nd ke takiye par sar rakkhaa
mere sirhaane kitaab tumhaarii
meraa jiivan dam saadhe chup-chaap pa.Daa thaa
mai.n ne juu.nhii haath ba.Dhaayaa
lafzo.n se ik chehra ubhraa
raat bahut hii biit chukii hai
ab so jaa.o

Almas Shabi
Nazm

chachu chalaen gaDi

yuu.n Te.Dhii tirchhii aa.Dii
jaise sa.Dak ho un kii
apnii hii khetii-baa.Dii
do dost piichhe baiThe
do cha.Dh ga.e agaa.Dii
ye phaT-phaTii hai ko.ii
yaa bhaagtii pahaa.Dii
phaT phaT phaTaak kar ke
jab ye sa.Dak pe dhaa.Dii
daa.e.n ko pahle ghuumii
phir baa.e.n samt taa.Dii
ik bas se bach ke niklii
ik cycle pachhaa.Dii
ik taxi ko rag.Daa
number plate ukhaa.Dii
footpath par jo uchhlii
Takraayaa ik kabaa.Dii
phir ro.D par utar kar
machvaa dii bhag-bhagaa.Dii
vo chauk kaa sipaahii
rokii thii jis ne gaa.Dii
lo vo bhii kuud bhaagaa
phaa.ndii ba.Dii sii jhaa.Dii
yuu.n Dagmagaa ke la.Dke
chaachuu ke saare aa.Dii
dikhlaa.e.n jaise circus
kuchh masKHare anaa.Dii

Ahmad Hatib Siddiqi
Nazm

ye kawwe kyon laDte hain

jaisaa ki kabhii vo la.Dte hai.n kitaabo.n par
copy aur ra.ngiin pencilo.n ke hisaabo.n par
ye la.Dte hai.n kabhii sur aur sa.ngiit par
khel me.n kabhii haar aur kabhii jiit par
kabhii school kaa home-work karne me.n
kabhii tasviiro.n me.n rang bharne me.n
kabhii khaane piine kii chiizo.n par
dastar-KHvaan aur khaane kii mezo.n par
ye la.Dte hai.n daal machhlii aur anDe par
kabhii garm chaa.e aur icecream ke ThanDe par
la.Dte hu.e to.D dete hai.n gilaas aur plate
aur barbaad kar dete hai.n ye saarii chokleT

Ishrat moin Seemaa
Nazm

aalu khane wale

khuu.nTii pe laTke ik lamp kii
piilii piilii raushnii me.n
thakii thakii sii shaam kii piiTh
diivaaro.n par dhu.e.n ke baadal kii parte.n
kamre me.n lak.Dii kaa TuuTaa-phuuTaa Table
aur puraanii chaar kursiyaa.n
Table par miTTii kii plate me.n uble aaluu kii KHushbuu
aaluu kii KHushbuu me.n bhiigaa komal haath
aur mirii dono.n aa.nkhe.n bhii
zaa.iqa letii hai.n aaluu kaa ra.ngo.n me.n

Jayant Parmar
Nazm

chand buDhi nazmen

1
potii se daadii ban.ne ke lambe safar me.n
aisaa ko.ii pa.Daav nahii.n aaya thaa jis par
ruk ke taaza dam hone kii
suukhii so.ndhii payaal pe pa.D ke
miiThe miiThe sapno.n me.n so jaane kii mohlat miltii
ab manzil par aa ke thak ke chuur pa.Dii vo
miiThe sapno.n me.n so jaane kii koshish
karte karte kyaa behaal hu.ii jaatii hai
khaa.ns khaa.ns ke saarii raat guzar jaatii hai
2
bhare-pure mahlo.n jaise is ghar kaa
ik ik kamra
apne apne naam se ab reserve karaa rakkhaa hai sabho.n ne
vo jo barsaatii me.n biitii yaade.n o.Dh ke leTaa
apne din gintaa hai
name plate pe ghar ke usii buu.Dhe kaa naam
likhaa hu.aa hai ba.De ba.De harfo.n me.n
3
rasta bilkul saaf hai
puKHta siidhii sa.Dak hai
niile vaale baaG ke phuulo.n se milne rozaana
jaayaa jaa saktaa hai lekin kaise
soch ke hii pairo.n me.n ai.nThan hone lagtii hai
aur dam be-dam hone lagtaa hai
4
betaabi se Dhuu.nD rahaa hai kaise paa.egaa ab
vo sab kuchh jo chho.D gayaa thaa
na.e na.e saamaano.n se ghar chhat tak aTaa pa.Daa hai
pahle jo rakkhaa thaa yahaa.n vo un me.n dab kar
TuuT ke chaknaa-chuur hu.aa yaa ko.ii kabaa.Dii
saste daamo.n le ke gayaa ye kaun bataa.e
taal pe us ke laa.e hu.e stereo music system ke
sab thirak rahe hai.n
aise shor-sharaabe me.n ab us kii kaun sunegaa
pahle ghar vaalo.n se i s D par
minto.n kaa hii raabta ik qaa.em to ho jaataa thaa

Bilqis Zafirul Hasan
Nazm

waqt ka nauha

mere ru.ii ke bistarao.n ke sulagne se
sahn me.n dhu.aa.n phailtaa jaa rahaa hai
gharo.n kii chilmano.n se us paar
baahar baiThii havaa ro rahii hai
nizaam-saqqaa pyaas kii ok ke saamne
sabiil lagaa.e hu.e al-atash baa.nTtaa hai
zamaana pyaas ke nauhe par
maatamii daf bajaa rahaa hai
w T o anaaj kii gaThriyo.n pe baiThii
bhuuko.n ko amn ke huruuf se bharii
plate de rahii hai
U N O kii aa.nkh ke kinaaro.n kii jumbihso.n se duniyaa
kapkapaa rahii hai
maa.n
maamtaa ko ha.nsii aa rahii hai
duudh kii jagah chhaatiyo.n me.n
nazariye aur falsafe ghole jaa rahe hai.n
vaqt kii Dor par jhuulte bachcho.n se
jhuulne ke auqaat chhiine jaa rahe hai.n
baaruud bam missile aur dhamaake
dhartii kii kokh me.n dhakele jaa rahe hai.n

Sarwat Zehra
Nazm

mahngi coffee ke cup mein khaulta hua din

insaanii huquuq kii plate me.n
rakhaa kaa.nTaa aur be.Diyo.n ko kaaTne
vaalii rang aaluud chhurii mal kar bhii
KHudaa ke ho.nTo.n ko zaKHmii nahii.n kar sakte

Muddassir Abbas
Nazm

nazm

ek chhoTii sii name plate
jis par meraa naam likhaa thaa
saal-bhar se mere kamre me.n
maarii maarii phir rahii thii
Table se khi.Dkii par
aur kabhii
khi.Dkii se almaarii par
dhuul se aTii
jagah badal rahii thii
us ik intizaar me.n ki jab
do kiile.n aur ek hathau.Dii yakjaa ho.n
aur kal
bil-aaKHir mai.n ne
do kiilo.n kii saliib par
apne naam ko Taa.ng diyaa
ab ye kamra be-naam nahii.n hai

Qamar-ul-Hasan Zaidii
Nazm

daraKHt-e-zard

nahii.n ma.aluum 'zaryuun' ab tumhaarii umr kyaa hogii
vo kin KHvaabo.n se jaane aashnaa naa-aashnaa hogii
tumhaare dil ke is duniyaa se kaise silsile ho.nge
tumhe.n kaise gumaa.n ho.nge tumhe.n kaise gile ho.nge
tumhaarii sub.h jaane kin KHayaalo.n se nahaatii ho
tumhaarii shaam jaane kin malaalo.n se nibhaatii ho
na jaane kaun doshiiza tumhaarii zindagii hogii
na jaane us kii kyaa baayastagii shaa.istagii hogii
use tum phone karte aur KHat likhte rahe hoge
na jaane tum ne kitnii kam Galat urdu likhii hogii
ye KHat likhnaa to daqyaanuus kii pii.Dhii kaa qissa hai
ye sinf-e-nasr ham naa-baaliGo.n ke fan kaa hissa hai
vo ha.nstii ho to shaayad tum na rah paate ho haalo.n me.n
ga.Dhaa nanhaa saa pa.D jaataa ho shaayad us ke gaalo.n me.n
gumaa.n ye hai tumhaarii bhii rasaa.ii naa-rasaa.ii ho
vo aa.ii ho tumhaare paas lekin aa na paa.ii ho
vo shaayad maa.ide kii gand biryaanii na khaatii ho
vo naan-e-be-KHamiir-e-maida kam-tar hii chabaatii ho
vo doshiiza bhii shaayad daastaano.n kii ho dil-daada
use ma.aluum hogaa 'zaal' thaa 'sohraab' kaa daadaa
tahamtan ya.anii 'rustam' thaa giraamii 'saam' kaa vaaris
giraamii 'saam' thaa sulb-e-nar-e-'maanii' kaa KHush-zaada
(ye merii ek KHvaahish hai jo mushkil hai)
vo 'najm'-aafa.ndi-e-marhuum ko to jaantii hogii
vo nauho.n ke adab kaa tarz to pahchaantii hogii
use kad hogii shaayad un sabhii se jo lapaa.Dii ho.n
na ho.nge KHvaab us kaa jo gavayye aur khilaa.Dii ho.n

Jaun Eliya
Nazm

waqt

ye vaaqiye
haadse
tasaadum
har ek Gam
aur har ik masarrat
har ik aziyyat
har ek lazzat
har ik tabassum
har ek aa.nsuu
har ek naGma
har ek KHushbuu
vo zaKHm kaa dard ho
ki vo lams kaa ho jaaduu
KHud apnii aavaaz ho ki maahaul kii sadaa.e.n
ye zehn me.n bantii aur biga.Dtii hu.ii fazaa.e.n
vo fikr me.n aa.e zalzale ho.n ki dil kii halchal
tamaam ehsaas
saare jazbe
ye jaise patte hai.n
bahte paanii kii sat.h par
jaise tairte hai.n
abhii yahaa.n hai.n
abhii vahaa.n hai.n
aur ab hai.n ojhal
dikhaa.ii detaa nahii.n hai lekin
ye kuchh to hai
jo ki bah rahaa hai
ye kaisaa dariyaa hai
kin pahaa.Do.n se aa rahaa hai
ye kis samundar ko jaa rahaa hai
ye vaqt kyaa hai

Javed Akhtar
Nazm

safar ke waqt

ye Diary hai aur is me.n pate hai.n aur number
ise KHayaal se bakse kii jeb me.n rakhnaa
hai arz ''hazrat-e-Gaa.eb-dimaaG'' bandii kii
ki apne aib kii haalat ko Gaib me.n rakhnaa

Jaun Eliya
Nazm

alaw

mai.n ne maazii se ka.ii KHushk sii shaaKHe.n kaaTii.n
tum ne bhii guzre hu.e lamho.n ke patte to.De
mai.n ne jebo.n se nikaalii.n sabhii suukhii nazme.n
tum ne bhii haatho.n se murjhaa.e hu.e KHat khole
apnii in aa.nkho.n se mai.n ne ka.ii maa.nje to.De
aur haatho.n se ka.ii baasii lakiire.n phe.nkii.n
tum ne palko.n pe namii suukh ga.ii thii so giraa dii
raat bhar jo bhii milaa ugte badan par ham ko
kaaT ke Daal diyaa jalte alaa.o me.n use

Gulzar
Nazm

banjara

vaqt ke agle shahr ke saare baashinde
sab din sab raate.n
jo tum se naa-vaaqif ho.nge
vo kab merii baat sune.nge
mujh se kahe.nge
jaa.o apnii raah lo raahii
ham ko kitne kaam pa.De hai.n
jo biitii so biit ga.ii
ab vo baate.n kyuu.n dohraate ho
ka.ndhe par ye jholii rakkhe
kyuu.n phirte ho kyaa paate ho
mai.n be-chaara
ik banjaara
aavaara phirte phirte jab thak jaa.uu.ngaa
tanhaa.ii ke Tiile par jaa kar baiThuu.ngaa
phir jaise pahchaan ke mujh ko
ik banjaara jaan ke mujh ko
vaqt ke agle shahr ke saare nanhe-munne bhole lamhe
na.nge paa.nv
dau.De dau.De bhaage bhaage aa jaa.e.nge
mujh ko gher ke baiThe.nge
aur mujh se kahe.nge
kyuu.n banjaare
tum to vaqt ke kitne shahro.n se guzre ho
un shahro.n kii ko.ii kahaanii hame.n sunaa.o
un se kahuu.ngaa
nanhe lamho!
ek thii raanii
sun ke kahaanii
saare nanhe lamhe
Gamgii.n ho kar mujh se ye puuchhe.nge
tum kyuu.n in ke shahr na aa.ii.n
lekin un ko bahlaa luu.ngaa
un se kahuu.ngaa
ye mat puuchho
aa.nkhe.n muu.ndo
aur ye socho
tum hotii.n to kaisaa hotaa
tum ye kahtii.n
tum vo kahtii.n
tum is baat pe hairaa.n hotii.n
tum us baat pe kitnii ha.nstii.n
tum hotii.n to aisaa hotaa
tum hotii.n to vaisaa hotaa

Javed Akhtar
Nazm

shishon ka masiha koi nahin

ye saaGar shiishe laal-o-gohar
saalim ho.n to qiimat paate hai.n
yuu.n Tuk.De Tuk.De ho.n to faqat
chubhte hai.n lahuu rulvaate hai.n

Faiz Ahmad Faiz
Nazm

mulaqat

ye raat us dard kaa shajar hai
jo mujh se tujh se aziim-tar hai
magar isii raat ke shajar se
ye chand lamho.n ke zard patte

Faiz Ahmad Faiz
Nazm

hallucination

mai.n apne band kamre me.n pa.Daa huu.n
aur ik diivaar par nazre.n jamaa.e
manaazir ke ajuube dekhtaa huu.n
usii diivaar me.n ko.ii KHalaa hai
mujhe jo Gaar jaisaa lag rahaa hai
vahaa.n mak.Dii ne jaal bun liyaa hai
aur ab apne hii jaal me.n pha.nsii hai
vahii.n par ek murda chhipkilii hai
ka.ii sadiyo.n se jo saakit pa.Dii hai
ab us par kaa.ii jamtii jaa rahii hai
aur us me.n ek jangal dikh rahaa hai
daraKHto.n se parinde gir rahe hai.n
kulhaa.Dii shaaKH par laTkii hu.ii hai
laka.Dhaare pe giida.D ha.ns rahe
musalsal tez baarish ho rahii hai
kisii patte se gir kar ek qatra
achaanak ek samundar ban gayaa hai
samundar naav se la.Dne lagaa hai
machheraa machhliyo.n me.n ghir gayaa hai
aur ab patvaar siine se lagaa kar
vo niile aasmaa.n ko dekhtaa hai
jo yak-dam zard pa.Dtaa jaa rahaa hai
vo kaise ret bantaa jaa rahaa hai
mujhe ab sirf sahraa dikh rahaa hai
aur us me.n dhuum kii chaadar bichhii hai
magar vo ek jagah se phaT rahii hai
vahaa.n par ek saaya naachtaa hai
jahaa.n bhii pair dhartaa hai vahaa.n par
sunahre phuul khilte jaa rahe hai
ye sahraa baaG bantaa jaa rahaa hai
aur us me.n titliyaa.n dikhtii hai.n
paro.n me.n jin ke niilii raushnii hai
vo har pal tez hotii jaa rahii hai
so merii aa.nkh me.n chubhne lagii hai
so mai.n ne haath aa.nkho.n par rakhe hai.n
aur ab u.nglii haTaa kar dekhtaa huu.n
ki apne band kamre me.n pa.Daa huu.n
aur ik diivaar ke aage kha.Daa huu.n

Ammar Iqbal
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now