کی تلاش کا نتیجه | موضو - نظم, صفحہ ruudaad

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "ruudaad"

نظم کے متعلقہ نتیجہ "ruudaad"

نظم

تم روٹھ چکے دل ٹوٹ چکا اب یاد نہ آؤ رہنے دو
اس محفل غم میں آنے کی زحمت نہ اٹھاؤ رہنے دو
یہ سچ کہ سہانے ماضی کے لمحوں کو بھلانا کھیل نہیں
یہ سچ کہ بھڑکتے شعلوں سے دامن کو بچانا کھیل نہیں
رستے ہوئے دل کے زخموں کو دنیا سے چھپانا کھیل نہیں
اوراق نظر سے جلووں کی تحریر مٹانا کھیل نہیں
لیکن یہ محبت کے نغمے اس وقت نہ گاؤ رہنے دو
جو آگ دبی ہے سینے میں ہونٹوں پہ نہ لاؤ رہنے دو
جاری ہیں وطن کی راہوں میں ہر سمت لہو کے فوارے
دکھ درد کی چوٹیں کھا کھا کر لرزاں ہیں دلوں کے گہوارے
انگشت بہ لب ہیں شمس و قمر حیران و پریشاں ہیں تارے
ہیں باد سحر کے جھونکے بھی طوفان مسلسل کے دھارے
اب فرصت ناؤ نوش کہاں اب یاد نہ آؤ رہنے دو
طوفان میں رہنے والوں کو غافل نہ بناؤ رہنے دو
مانا کہ محبت کی خاطر ہم تم نے قسم بھی کھائی تھی
یہ امن و سکوں سے دور فضا پیغام سکوں بھی لائی تھی
وہ دور بھی تھا جب دنیا کی ہر شے پہ جوانی چھائی تھی
خوابوں کی نشیلی بد مستی معصوم دلوں پر چھائی تھی
لیکن وہ زمانہ دور گیا اب یاد نہ آؤ رہنے دو
جس راہ پہ جانا لازم ہے اس سے نہ ہٹاؤ رہنے دو
اب وقت نہیں ان نغموں کا جو خوابوں کو بیدار کریں
اب وقت ہے ایسے نعروں کا جو سوتوں کو ہشیار کریں
دنیا کو ضرورت ہے ان کی جو تلواروں کو پیار کریں
جو قوم و وطن کے قدموں پر قربانی دیں ایثار کریں
روداد محبت پھر کہنا اب مان بھی جاؤ رہنے دو
جادو نہ جگاؤ رہنے دو فتنے نہ اٹھاؤ رہنے دو
میں زہر حقیقت کی تلخی خوابوں میں چھپاؤں گا کب تک
غربت کے دہکتے شعلوں سے دامن کو بچاؤں گا کب تک
آشوب جہاں کی دیوی سے یوں آنکھ چراؤں گا کب تک
جس فرض کو پورا کرنا ہے وہ فرض بھلاؤں گا کب تک
اب تاب نہیں نظارے کی جلوے نہ دکھاؤ رہنے دو
خورشید محبت کے رخ سے پردے نہ اٹھاؤ رہنے دو
ممکن ہے زمانہ رخ بدلے یہ دور ہلاکت مٹ جائے
یہ ظلم کی دنیا کروٹ لے یہ عہد ضلالت مٹ جائے
دولت کے فریبی بندوں کا یہ کبر اور نخوت مٹ جائے
برباد وطن کے محلوں سے غیروں کی حکومت مٹ جائے
اس وقت بہ نام عہد وفا میں خود بھی تمہیں یاد آؤں گا
منہ موڑ کے ساری دنیا سے الفت کا سبق دہراؤں گا

عامر عثمانی

نظم

لو وہ چاہ شب سے نکلا پچھلے پہر پیلا مہتاب
ذہن نے کھولی رکتے رکتے ماضی کی پارینہ کتاب
یادوں کے بے معنی دفتر خوابوں کے افسردہ شہاب
سب کے سب خاموش زباں سے کہتے ہیں اے خانہ خراب
گزری بات صدی یا پل ہو گزری بات ہے نقش بر آب
یہ روداد ہے اپنے سفر کی اس آباد خرابے میں
دیکھو ہم نے کیسے بسر کی اس آباد خرابے میں

اختر الایمان

نظم

جان
تم کو خبر تک نہیں
لوگ اکثر برا مانتے ہیں
کہ میری کہانی کسی موڑ پر بھی
اندھیری گلی سے گزرتی نہیں
کہ تم نے شعاعوں سے ہر رنگ لے کر
مرے ہر نشان قدم کو دھنک سونپ دی
نہ گم گشتہ خوابوں کی پرچھائیاں ہیں
نہ بے آس لمحوں کی سرگوشیاں ہیں
کہ نازک ہری بیل کو
اک توانا شجر ان گنت اپنے ہاتھوں میں
تھامے ہوئے ہے
کوئی نارسائی کا آسیب اس رہ گزر میں نہیں
یہ کیسا سفر ہے کہ روداد جس کی
غبار سفر میں نہیں

ادا جعفری

نظم

اسلام تو مہر اور محبت کا بیاں ہے
اخلاص کی روداد مروت کا بیاں ہے
ہر شعبۂ ہستی میں صداقت کا بیاں ہے
ایک زندہ و پائندہ حقیقت کا بیاں ہے

جگن ناتھ آزاد

نظم

مری شاعری انتظاروں کی دنیا
کبھی میں بھی ہو جاؤں آزاد شاید
اسیری کی گھٹ جائے میعاد شاید
سنی جائے اک روز فریاد شاید
وہ بھولے سے کر لے مجھے یاد شاید
وہاں کام آئے یہ روداد شاید
مری شاعری انتظاروں کی دنیا

حفیظ جالندھری

نظم

غیر کی ہو کے بھی تم میری محبت چاہو
اس گھٹا ٹوپ اندھیرے میں یہ تارے کیسے
فرش پر جس کو ابھی تک نہ ملی جائے پناہ
عرش سے چاند کا ایوان اتارے کیسے
جس کی راہوں پہ بھٹکتے ہوئے جگ بیتے ہیں
پھر اسی دشت کو بد بخت سدھارے کیسے
قافلے آئے گئے گرد اٹھی بیٹھ گئی
اب مسافر کو افق پر سے اشارے کیسے
جن کی تقدیر میں تھا دامن گلچیں کا مزار
وہ شگوفے تو پرائے ہیں ہمارے کیسے
پیش کر سکتا ہوں لیکن تجھے بہلانے کو
چاندنی رات میں مچلے ہوئے رومان کی یاد
بید مجنوں کے طلسمات سے پل پل چھنتی
آسمانوں کو لپکتی ہوئی اک تان کی یاد
میری وارفتگئ شوق کی سن کر روداد
تری آنکھوں میں دمکتے ہوئے ارمان کی یاد
دونوں چہروں پہ شفق دونوں جبینوں پہ عرق
دونوں سینوں میں دھڑکتے ہوئے ہیجان کی یاد
کون ہیں آپ مری زیست کی تنہائی ساتھی
پہلی پہچان کی یاد آخری پیمان کی یاد

احمد ندیم قاسمی

نظم

لائل پور اک شہر ہے جس میں دل ہے مرا آباد
دھڑکن دھڑکن ساتھ رہے گی اس بستی کی یاد
میٹھے بولوں کی وہ نگری گیتوں کا سنسار
ہنستے بستے ہائے وہ رستے نغمہ ریز دیار
وہ گلیاں وہ پھول وہ کلیاں رنگ بھرے بازار
میں نے ان گلیوں پھولوں کلیوں سے کیا ہے پیار
برگ آوارہ میں بکھری ہے جس کی روداد
لائل پور اک شہر ہے جس میں دل ہے مرا آباد
کوئی نہیں تھا کام مجھے پھر بھی تھا کتنا کام
ان گلیوں میں پھرتے رہنا دن کو کرنا شام
گھر گھر میرے شعر کے چرچے گھر گھر میں بد نام
راتوں کو دہلیزوں پہ ہی کر لینا آرام
دکھ سہنے میں چپ رہنے میں دل تھا کتنا شاد
لائل پور اک شہر ہے جس میں دل ہے مرا آباد
میں نے اس نگری رہ کر کیا کیا گیت لکھے
جن کے کارن لوگوں کے من میں ہے میری پریت
ایک لگن کی بات ہے جیون کیسی ہار اور جیت
سب سے مجھ کو پیار ہے جالبؔ سب ہیں میرے میت
داد تو ان کی یاد ہے مجھ کو بھول گیا بے داد
لائل پور اک شہر ہے جس میں دل ہے مرا آباد

حبیب جالب

نظم

کچھ دور تلک
کچھ دور تلک
وہ لمحہ اس کے ساتھ چلا
جب اس نے دل میں یہ سوچا
یہ گرتی دیواریں
یہ دھواں
یہ کالی چھتیں
یہ اندھے دیئے
سنولاتے ہوئے سارے چہرے
اب اس کی نگاہوں سے اوجھل ہو جائیں گے
جب نگر نگر کی سیاہی
ان ٹیڑھی میڑھی سڑکوں کی
آوارہ گردی
ہنستے جسم
کھنکتے پیالوں
کی موسیقی
اس کو راس نہ آئی
اس نے کہا
اب آؤ لوٹ چلیں
اک شام وہ اپنے گھر پہنچا
اور اس سے ملنے کو آئے
سب ساتھی اس کے بچپن کے
سب کہنے لگے
ان جگ مگ کرتے شہروں کا
کچھ حال بتاؤ
اپنے سفر کی
کچھ روداد کہو
وہ خاموش رہا
وہ دیکھ رہا تھا اس میلے سے طاق کو
جس پر
اب بھی ایک گھڑی رکھی تھی
اور وہ بند پڑی تھی

خلیل الرحمن اعظمی

نظم

تم جو کہتے ہو مجھ سے اکثر
کے نام تیرے پہ نظم کہہ دوں
سنو پھر تم میں چاہتی ہوں
سرد رتوں کی اداس شامیں
میں سنگ تیرے یوں بتاؤں
کلائیاں سونی پڑی ہیں کب سے
میں نام تیرے کنگن پہنوں
گلاب گجروں سے خوب مہکوں
خواب آنکھوں سے خود جو دیکھوں
تمہیں دکھاؤں
گہری نیندوں سے فجر کے لئے
خود جاگوں تمہیں جگاؤں
حدیث کسا روز جمعہ
سنوں تم سے تمہیں سناؤں
تمہاری گودی میں سر رکھے
ڈھلی دوپہر سو جاؤں
میرے جیون کی بہار تم ہو
میرا یہ جوبن سنگار تم ہو
مرے بخت کا راج تم ہو
میرے سر کا تاج تم ہو
تمہیں خبر ہے میرے مزاج میں
رومان کم ہے محبت کا اظہار کم ہے
تمہی ہو جان جاں جاناں
میں کیسے تم کو یہ جتاؤں
میری آنکھوں کی روداد پڑھ لو
یا دھڑکنوں کی زباں سناؤں
میرے ہونے کی تمثیل تم ہو
میں ادھوری ہوں تکمیل تم ہو

زہرا علوی

نظم

میں اردو ہوں
مجھے غیروں سے کیا خطرہ
کبھی دشمن سے ہوتا ہی نہیں خطرہ کسی کو بھی
سبب تم بھی سمجھتے ہو
کہ دشمن ہر گھڑی ہر پل
مقابل ہی رہا کرتا ہے دشمن کے
مقابل سے تو میدانوں میں اکثر جنگ ہوتی ہے
نتیجہ جنگ کا تم بھی سمجھتے ہو
محاذ جنگ پر خطر ہے نہیں ہوتا
شکست و فتح ہوتی ہے
تو پھر خطرہ کہاں سے ہے
سنو روداد غم
دل تھام کر سننا ذرا لوگو
مجھے خطرہ ہے اپنوں سے
مجھے خطرہ ہے شاعر اور دانشور ادیبوں سے
مجھے نقاد سے خطرہ محقق سے مجھے خطرہ
یہ سارے لوگ وہ ہیں جو تعلق سے مرے اب تک
زمیں سے عرش تک
دعوے تو کرتے ہیں بلندی کے
محافظ خود کو اردو کا کہا کرتے ہیں یہ اکثر
یہ دعویٰ سب بجا لیکن
کوئی پوچھے ذرا ان سے
تمہارے پیارے بچوں میں کوئی ایسا بھی بچہ ہے
کہ جس کو آپ نے اردو سے بہرہ ور کیا اب تک
اگر کوئی یہ پوچھے گا
شکن ماتھے پہ آئے گی نفی میں سر جھکائیں گے
یہی قاتل تو ہیں میرے
یہی تو میرے اپنے ہیں
انہیں سے مجھ کو خطرہ ہے
انہیں پہچان لو لوگو
انہیں پہچان لو لوگو

شمس رمزی

نظم

ایک جسم ناتواں اتنی دباؤں کا ہجوم
اک چراغ صبح اور اتنی ہواؤں کا ہجوم
منزلیں گم اور اتنے رہنماؤں کا ہجوم
اعتقاد خام اور اتنے خداؤں کا ہجوم
کشمکش میں اپنے ہی معبد سے کتراتا ہوا
آدمی پھرتا تھا در در ٹھوکریں کھاتا ہوا
حق کو ہوتی تھی ہر اک میداں میں باطل سے شکست
سرنگوں سر در گریباں سربسر تھے زیردست
فن تھا اک مطلب براری لوگ تھے مطلب پرست
اسقدر بگڑا ہوا تھا زندگی کا بندوبست
حامی جور و ستم ہر طرح مالا مال تھا
جس کی لاٹھی تھی اسی کی بھینس تھی یہ حال تھا
کیا خدا کا خوف کیسا جذبۂ حب وطن
برسر پیکار تھے آپس میں شیخ و برہمن
باغباں جو تھے وہ خود تھے محو تخریب چمن
الغرض بگڑی ہوئی تھی انجمن کی انجمن
مذہب انسانیت کا پاسباں کوئی نہ تھا
کارواں لاکھوں تھے میر کارواں کوئی نہ تھا
روح انساں نے خدا کے سامنے فریاد کی
جو زمیں پر ہو رہا تھا سب بیاں روداد کی
اور کہا حد ہو چکی ہے کفر کی الحاد کی
ایک دنیا منتظر ہے آپ کے ارشاد کی
تب یہ فرمایا خدا نے سب کو سمجھاؤں گا میں
آدمی کا روپ دھارن کر کے خود آؤں گا میں
اس طرح آخر ہوا دنیا میں نانک کا ظہور
فرش تلونڈی پہ اترا عرش سے رب غفور
اٹھ گیا ظلمات کا ڈیرا بڑھا ہر سمت نور
منبع انوار سے پھیلیں شعاعیں دور دور
مہر تاباں نے دو عالم میں اجالا کر دیا
آدمی نے آدمی کا بول بالا کر دیا

کنور مہیندر سنگھ بیدی سحر

نظم

کہیں افسانۂ عشق و محبت
کہیں روداد سوز و ساز بھی ہے
یہی تقدیس مریم ضبط سیتا
یہی عیار و شاہد باز بھی ہے

شوکت پردیسی

نظم

بس اتنی روداد ہے میری
عشق میں خانہ خراب ہوا میں
ان کی آنکھوں کا تھا اشارہ
وقف جام و شراب ہوا میں

عزیز قیسی

نظم

یہ قفل زنگ آلودہ یہ گھر کے بند دروازے
ترے ترک وطن کا دکھ بھرا افسانہ کہتے ہیں
منڈیروں پر یہ لہراتے ہوئے پر ہول سناٹے
شکست خواب کی روداد غم دہراتے رہتے ہیں
یہاں ہر شام محرابوں میں اڑتی ہیں ابابیلیں
یہاں پچھلے پہر شبنم کے آنسو روز بہتے ہیں

قیصر الجعفری

نظم

جیسے اک اندھی کنواری کا ادھورا بانکپن
جیسے مرجھائی ہوئی کلیوں میں روداد چمن

میکش اکبرآبادی

نظم

سراسر اتفاقی موت تھی
اس نے کہا تھا مجھ کو جانا ہے
سو وہ ایسے گیا جیسے زمیں سے گھاس جاتی ہے
سراسر اتفاقاً
پاؤں چلنے کے لیے ہوتے ہیں
اتنا تو سبھی تسلیم کرتے ہیں
تو ایسے میں اگر مٹی کی عریانی شکایت گر بھی ہو جائے
تو اس پر اور مٹی ڈال دیتے ہیں
سو ہم نے ڈال دی مٹی پہ مٹی
اتفاقاً
یہ تو ہوتا ہے

محمد انور خالد

نظم

یہاں ہر طرف ہیں اداکار چہرے
میں روداد دل کی کسے کیا بتاؤں
جو خواب مسلسل ہی ارماں ہے مرا
وہی خواب ٹوٹا وہی پیار روٹھا
مناظر نے رنگ اپنے سب کھو دئے ہیں
وہ جب سے خفا ہے کسے کیا بتاؤں
زباں چپ ہے لیکن سراپا بیاں ہوں
یہ دل کی لگی ہے کسے کیا بتاؤں

سبیلہ انعام صدیقی

نظم

گواہی حشر کے دن
تمام اعضا کے ساتھ
ہم انسانوں کی خالی جیب کی بھی مان لی جائے
تو ممکن ہے کہ بیڑا پار ہو جائے
رضا اور صبر کی تاکید پر
وہ صرف اور صرف خالی جیب ہے انسان کی جو
بہت کھل کر خدا سے بات کر سکتی ہے شاید
وہی ہے جو فرشتوں کی لکھی سیدھی سپاٹ اعمال کی روداد میں بھی
نئے کچھ رنگ بھر سکتی ہے شاید
مگر ٹھہرو
بہت خوش فہم مت ہو
سنا یہ ہے خدا کی جیب اوپر تک بھری رہتی ہے ہر دم
اور کبھی خالی نہیں ہوتی
اسے تو دونوں ہاتھوں سے لٹانا بانٹنا آتا ہے بس
ایسی روایت ہے
یہی تو پینچ ہے
وہ خود جس تجربے سے دور ہے
اس کو نظر میں رکھ کے کوئی فیصلہ کرنا
اسے منظور ہوگا کیا؟
ابھی کچھ دیر پہلے لگ رہا تھا
اب ہمیں ایسا نہیں لگتا
کہ خالی جیب اور اس کے دلائل کا کوئی اس پر اثر ہوگا
تو مطلب یہ ہوا
ہم لوگ اب بھی دور ہیں اتنا ہی جنت سے
کہ جتنا یہ خیال آنے سے پہلے تھے

شارق کیفی

نظم

اے نکتہ وران سخن آرا و سخن سنج
اے نغمہ گران چمنستان معافی
مانا کہ دل افروز ہے افسانۂ عذرا
مانا کہ دل آویز ہے سلمیٰ کی کہانی
مانا کہ اگر چھیڑ حسینوں سے چلی جائے
کٹ جائے گا اس مشغلے میں عہد جوانی
گرمائے گا یہ ہمہمہ افسردہ دلوں کو
بڑھ جائے گی دریائے طبیعت کی روانی
مانا کہ ہیں آپ اپنے زمانے کے نظیریؔ
مانا کہ ہر اک آپ میں ہے عرفی ثانی
مانا کی حدیث خط و رخسار کے آگے
بے کار ہے مشائیوں کی فلسفہ دانی
مانا کہ یہی زلف و خط و خال کی روداد
ہے مایۂ گل کاریٔ ایوان معافی
لیکن کبھی اس بات کو بھی آپ نے سوچا
یہ آپ کی تقویم ہے صدیوں کی پرانی
معشوق نئے بزم نئی رنگ نیا ہے
پیدا نئے خامے ہوئے ہیں اور نئے مانیؔ
مژگاں کی سناں کے عوض اب سنتی ہے محفل
کانٹوں کی کتھا برہنہ پائی کی زبانی
لذت وہ کہاں لعل لب یار میں ہے آج
جو دے رہی ہے پیٹ کے بھوکوں کی کہانی
بدلا ہے زمانہ تو بدلیے روش اپنی
جو قوم ہے بے دار یہ ہے اس کی نشانی
اے ہم نفسو یاد رہے خوب یہ تم کو
بستی نئی مشرق میں ہمیں کو ہے بسانی

ظفر علی خاں

نظم

ساز دروں سے جل نہ اٹھیں جسم و جاں کہیں
رگ رگ نہ میری پھونک دے قلب تپاں کہیں
گم صم ہوں اور ششدر و حیراں کچھ اس طرح
جیسے کہ کھو چکا ہوں میں روح رواں کہیں
اس ناؤ کی طرح ہوں میں موجوں کے رحم پر
لنگر ہو جس کے ٹوٹے کہیں بادباں کہیں
یا مست ناز سرو سا کوئی نہال سبز
آ جائے ضد میں برق کی جو ناگہاں کہیں
یا جس طرح بہار میں مرغ شکستہ پر
حسرت سے دیکھتا ہوں سوئے آسماں کہیں
مغلوب اس قدر ہوں میں احساس غم سے آج
کھو جائے سسکیوں میں نہ یہ داستاں کہیں
بیتے دنوں کے خواب ہیں آنکھوں کے سامنے
فردا کا ایک خوف ہے دل میں نہاں کہیں
نکلے تھے جب وطن سے ہم اپنے بہ حال زار
منزل کا تھا خیال نہ نام و نشاں کہیں
کچھ ایسی منتشر سی ہوئی دوستی کی بزم
پتے بکھیر دیتی ہے جیسے خزاں کہیں
زندہ ہے یار صحبتیں باقی مگر کہاں
دیوار کھنچ گئی ہے نئی درمیاں کہیں
فردا پہ کیا یقین ہو نالاں ہوں حال پر
ماضی کی سمت لے چلے عمر رواں کہیں
باد صبا کے شانوں پہ امواج نور پر
لے جاؤ مجھ کو دوستوں کے درمیاں کہیں
یا شمع میری یادوں کی گل کر دو ایک ایک
تاریک دل کا گوشہ نہ ہو ضو فشاں کہیں
روداد غم سناتے ہی یوں آئی ان کی یاد
میں ہوں کہیں خیال کہیں داستاں کہیں
اوجھل ہیں گو نگاہ سے دل سے کہیں ہیں دور
ذکر حبیب اب بھی ہے ورد زباں کہیں

جے کرشن چودھری حبیب

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے