Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "zohra"

نظم کے متعلقہ نتیجہ "zohra"

نظم

اے عشق خدارا دیکھ کہیں وہ شوخ حزیں بد نام نہ ہو
وہ ماہ لقا بد نام نہ ہو وہ زہرہ جبیں بد نام نہ ہو
ناموس کا اس کے پاس رہے وہ پردہ نشیں بد نام نہ ہو

اختر شیرانی
نظم

وہ میرے آسماں پر اختر صبح قیامت ہے
ثریا بخت ہے زہرہ جبیں ہے ماہ طلعت ہے
مرا ایماں ہے میری زندگی ہے میری جنت ہے
میری آنکھوں کو خیرہ کر گئیں تابانیاں اس کی

اسرار الحق مجاز
نظم

اے زہرہ جبیں لے چل!
اے عشق کہیں لے چل!

اختر شیرانی
نظم

ہال میں چمکیں آ کے یکا یک
زریں تھی پوشاک جھکا جھک
محو تھا ان کا اوج سما تک
چرخ پہ زہرہ ان کی تھی گاہک

اکبر الہ آبادی
نظم

زیست خدا جانے ہے کیا شے بھوک تجسس اشک فرار
پھول سے بچے زہرہ جبینیں مرد مجسم باغ و بہار
مرجھا جاتے ہیں اکثر کیوں کون ہے وہ جس نے بیمار
کیا ہے روح ارض کو آخر اور یہ زہریلے افکار
کس مٹی سے اگتے ہیں سب جینا کیوں ہے اک بیگار
ان باتوں سے قطع نظر کی اس آباد خرابے میں
دیکھو ہم نے کیسے بسر کی آباد خرابے میں

اختر الایمان
نظم

آج تنہائی نے تھوڑا سا دلاسہ جو دیا
کتنے روٹھے ہوئے ساتھی مجھے یاد آئے ہیں
موسم وصل کی کرنوں کا وہ انبوہ رواں
جس کے ہم راہ کسی زہرہ جبیں کی ڈولی
ایسے اتری تھی کہ جیسے کوئی آیت اترے
ہجر کی شام کے بکھرے ہوئے کاجل کی لکیر
جس نے آنکھوں کے گلابوں پہ شفق چھڑکی تھی
جیسے خوشبو کسی جنگل میں برہنہ ٹھہرے
خلقت شہر کی جانب سے ملامت کا عذاب
جس نے اکثر مجھے ہونے کا یقیں بخشا تھا
دست اعدائیں وہ کھنچتی ہوئی تہمت کی کماں
بارش سنگ میں کھلتی ہوئی تیروں کی دکاں
مہرباں دوست رفاقت کا بھرم رکھتے ہوئے
اجنبی لوگ دل و جاں میں قدم رکھتے ہوئے
آج تنہائی نے تھوڑا سا دلاسہ جو دیا
کتنے روٹھے ہوئے ساتھی مجھے یاد آئے ہیں
اب نہ پندار وفا ہے نہ محبت کی جزا
دست اعداء کی کشش ہے نہ رفیقوں کی سزا
تختۂ دار نہ منصب نہ عدالت کی خلش
اب تو اک چیخ سی ہونٹوں میں دبی رہتی ہے
راس آئے گا کسے دشت بلا میرے بعد
کون مانگے گا اجڑنے کی دعا میرے بعد
آج تنہائی نے تھوڑا سا دلاسہ جو دیا

محسن نقوی
نظم

جینے سے دل بیزار ہے
ہر سانس اک آزار ہے
کتنی حزیں ہے زندگی
اندوہ گیں ہے زندگی
وہ بزم احباب وطن
وہ ہم نوایان سخن
آتے ہیں جس دم یاد اب
کرتے ہیں دل ناشاد اب
گزری ہوئی رنگینیاں
کھوئی ہوئی دلچسپیاں
پہروں رلاتی ہیں مجھے
اکثر ستاتی ہیں مجھے
وہ زمزمے وہ چہچہے
وہ روح افزا قہقہے
جب دل کو موت آئی نہ تھی
یوں بے حسی چھائی نہ تھی
کالج کی رنگیں وادیاں
وہ دل نشیں آبادیاں
وہ نازنینان وطن
زہرہ جبینان وطن
جن میں سے اک رنگیں قبا
آتش نفس آتش نوا
کر کے محبت آشنا
رنگ عقیدت آشنا
میرے دل ناکام کو
خوں گشتہ آلام کو
داغ جدائی دے گئی
ساری خدائی لے گئی
ان ساعتوں کی یاد میں
ان راحتوں کی یاد میں
مغموم سا رہتا ہوں میں
غم کی کسک سہتا ہوں میں
سنتا ہوں جب احباب سے
قصے غم ایام کے
بیتاب ہو جاتا ہوں میں
آہوں میں کھو جاتا ہوں میں
پھر وہ عزیز و اقربا
جو توڑ کر عہد وفا
احباب سے منہ موڑ کر
دنیا سے رشتہ توڑ کر
حد افق سے اس طرف
رنگ شفق سے اس طرف
اک وادئ خاموش کی
اک عالم بے ہوش کی
گہرائیوں میں سو گئے
تاریکیوں میں کھو گئے
ان کا تصور ناگہاں
لیتا ہے دل میں چٹکیاں
اور خوں رلاتا ہے مجھے
بے کل بناتا ہے مجھے
وہ گاؤں کی ہم جولیاں
مفلوک دہقاں زادیاں
جو دست فرط یاس سے
اور یورش افلاس سے
عصمت لٹا کر رہ گئیں
خود کو گنوا کر رہ گئیں
غمگیں جوانی بن گئیں
رسوا کہانی بن گئیں
ان سے کبھی گلیوں میں اب
ہوتا ہوں میں دو چار جب
نظریں جھکا لیتا ہوں میں
خود کو چھپا لیتا ہوں میں
کتنی حزیں ہے زندگی
اندوہ گیں ہے زندگی

ساحر لدھیانوی
نظم

یہ کس نے فون پہ دی سال نو کی تہنیت مجھ کو
تمنا رقص کرتی ہے تخیل گنگناتا ہے
تصور اک نئے احساس کی جنت میں لے آیا
نگاہوں میں کوئی رنگین چہرہ مسکراتا ہے
جبیں کی چھوٹ پڑتی ہے فلک کے ماہ پاروں پر
ضیا پھیلی ہوئی ہے سارا عالم جگمگاتا ہے
شفق کے نور سے روشن ہیں محرابیں فضاؤں کی
ثریا کی جبیں زہرہ کا عارض تمتماتا ہے
پرانے سال کی ٹھٹھری ہوئی پرچھائیاں سمٹیں
نئے دن کا نیا سورج افق پر اٹھتا آتا ہے
زمیں نے پھر نئے سر سے نیا رخت سفر باندھا
خوشی میں ہر قدم پر آفتاب آنکھیں بچھاتا ہے
ہزاروں خواہشیں انگڑائیاں لیتی ہیں سینے میں
جہان آرزو کا ذرہ ذرہ گنگناتا ہے
امیدیں ڈال کر آنکھوں میں آنکھیں مسکراتی ہیں
زمانہ جنبش مژگاں سے افسانے سناتا ہے
مسرت کے جواں ملاح کشتی لے کے نکلے ہیں
غموں کے ناخداؤں کا سفینہ ڈگمگاتا ہے
خوشی مجھ کو بھی ہے لیکن میں یہ محسوس کرتا ہوں
مسرت کے اس آئینے میں غم بھی جھلملاتا ہے
ہمارے دور محکومی کی مدت گھٹتی جاتی ہے
غلامی کے زمانے میں اضافہ ہوتا جاتا ہے
یہی انداز گر باقی ہیں اپنی سست گامی کے
نہ جانے اور کتنے سال آئیں گے غلامی کے

علی سردار جعفری
نظم

اے مجاز اے ترانہ بار مجاز
زندہ پیغمبر بہار مجاز
اے بروۓ سمن وشاں گل پوش
اے بہ کوۓ مغاں تمام خروش
اے پرستار مہ رخان جہاں
اے کماں دار شاعران جواں
تجھ سے تاباں جبین مستقبل
اے مرے سینۂ امید کے دل
اے مجاز اے مبصر خد و خال
اے شعور جمال و شمع خیال
اے ثریا فریب و زہرہ نواز
شاعر مست و رند شاہد باز
ناقد عشوۂ شباب ہے تو
صبح فردا کا آفتاب ہے تو
تجھ کو آیا ہوں آج سمجھانے
حیف ہے تو اگر برا مانے
خود کو غرق شراب ناب نہ کر
دیکھ اپنے کو یوں خراب نہ کر
شاعری کو تری ضرورت ہے
دور فردا کی تو امانت ہے
صرف تیری بھلائی کو اے جاں
بن کے آیا ہوں ناصح ناداں
ایک ٹھہراؤ اک تکان ہے تو
دیکھ کس درجہ دھان پان ہے تو
ننگ ہے محض استخواں ہونا
سخت اہانت ہے ناتواں ہونا
استخوانی بدن دخانی پوست
ایک سنگین جرم ہے اے دوست
شرم کی بات ہے وجود سقیم
ناتوانی ہے اک گناہ عظیم
جسم اور علم طرفہ طاقت ہے
یہی انسان کی نبوت ہے
جو ضعیف و علیل ہوتا ہے
عشق میں بھی ذلیل ہوتا ہے
ہر ہنر کو جو ایک دولت ہے
علم اور جسم کی ضرورت ہے
کثرت بادہ رنگ لاتی ہے
آدمی کو لہو رلاتی ہے
خوش دلوں کو رلا کے ہنستی ہے
شمع اختر بجھا کے ہنستی ہے
اور جب آفت جگر پہ لاتی ہے
رند کو مولوی بناتی ہے
مے سے ہوتا ہے مقصد دل فوت
مے ہے بنیاد مولویت و موت
کان میں سن یہ بات ہے نشتر
مولویت ہے موت سے بد تر
اس سے ہوتا ہے کار عمر تمام
اس سے ہوتا ہے عقل کو سرسام
اس میں انساں کی جان جاتی ہے
اس میں شاعر کی آن جاتی ہے
یہ زمین آسمان کیا شے ہے
آن جائے تو جان کیا شے ہے
گوہر شاہ وار چن پیارے
مجھ سے اک گر کی بات سن پیارے
غم تو بنتا ہے چار دن میں نشاط
شادمانی سے رہ بہت محتاط
غم کے مارے تو جی رہے ہیں ہزار
نہیں بچتے ہیں عیش کے بیمار
آن میں دل کے پار ہوتی ہے
پنکھڑی میں وہ دھار ہوتی ہے
جوئے عشرت میں غم کے دھارے ہیں
یخ و شبنم میں بھی شرارے ہیں
ہاں سنبھل کر لطافتوں کو برت
ٹوٹ جائے کہیں نہ کوئی پرت
دیکھ کر شیشۂ نشاط اٹھا
یہ ورق ہے ورق ہے سونے کا
کاغذ باد یہ نگینہ ہے
بلکہ اے دوست آبگینہ ہے
ساغر شبنم خوش آب ہے یہ
آبگینہ نہیں حباب ہے یہ
روک لے سانس جو قریب آئے
ٹھیس اس کو کہیں نہ لگ جائے
تیغ مستی کو احتیاط سے چھو
ورنہ ٹپکے گا انگلیوں سے لہو
مستیوں میں ہے تاب جلوۂ ماہ
اور سیہ مستیاں خدا کی پناہ
خوب ہے ایک حد پہ قائم نشہ
ہلکا پھلکا سبک ملائم نشہ
ہاں ادب سے اٹھا ادب سے جام
تاکہ آب حلال ہو نہ حرام
جام پر جام جو چڑھاتے ہیں
اونٹ کی طرح بلبلاتے ہیں
زندگی کی ہوس میں مرتے ہیں
مے کو رسوائے دہر کرتے ہیں
یاد ہے جب جگرؔ چڑھاتے تھے
کیا الف ہو کے ہن ہناتے تھے
میری گردن میں بھر کے چند آہیں
پاؤں سے ڈالتے تھے وہ بانہیں
عقل کی موت علم کی پستی
الاماں لعنت سیہ مستی
اف گھٹا ٹوپ نشے کا طوفان
بھوت عفریت دیو جن شیطان
لات گھونسہ چھڑی چھری چاقو
لب لباہٹ لعاب کف بدبو
طنز آوازہ برہمی افساد
طعن تشنیع مضحکہ ایراد
شور ہو حق ابے تبے ہے ہے
اوکھیاں گالیاں دھماکے قے
مس مساہٹ غشی تپش چکر
سوز سیلاب سنسنی صرصر
چل چخے چیخ چناں چنیں چنگھاڑ
چخ چخے چاؤں چاؤں چیل چلھاڑ
لپا ڈکی لتام لام لڑائی
ہول ہیجان ہانک ہاتھا پائی
کھلبلی کاؤں کاؤں کھٹ منڈل
ہونک ہنگامہ ہمہمہ ہلچل
الجھن آوارگی ادھم اینٹھن
بھونک بھوں بھوں بھنن بھنن بھن بھن
دھول دھپا دھکڑ پکڑ دھتکار
تہلکہ تو تڑاق تف تکرار
بو بھبھک بھیے بکس برر بھونچال
دبدبے دندناہٹیں دھمال
گاہ نرمی و لطف و مہر و سلام
گاہ تلخی و ترشی و دشنام
عقل کی موت علم کی پستی
الاماں لعنت سیہ مستی
صرف نشے کی بھیگنے دے مسیں
ان کو بننے نہ دے کبھی مونچھیں
الاماں خوفناک کالا نشہ
اوہ ریش و بروت والا نشہ
اژدر مرگ او دیو خوں خواری
الاماں نشۂ ''جٹادھاری''
نشے کا جھٹ پٹا ہے نور حیات
جھٹپٹے کو بنا نہ کالی رات
نشے کی تیز روشنی بھی غلط
چودھویں کی سی چاندنی بھی غلط
ذہن انساں کو بخشتا ہے جمال
نشہ ہو جب یہ قدر نور ہلال
غرفۂ عقل بھیڑ تو اکثر
پر اسے کچ کچا کے بند نہ کر
رات کو لطف جام ہے پیارے
دن کا پینا حرام ہے پیارے
دن ہے عفریت آز کی کھنکا
رات پازیب نازکی جھنکار
دن ہے خاشاک خاک دھول دھواں
رات آئینہ انجمن افشاں
دن مسلح دواں کمر بستہ
رات طاق و رواق و گلدستہ
دن ہے فولاد سنگ تیغ علم
رات کمخواب پنکھڑی شبنم
دن ہے شیون دہائیاں دکھڑے
رات مست انکھڑیاں جواں مکھڑے
دن کڑی دھوپ کی بد آہنگی
رات پچھلے پہر کی سارنگی
دن بہادر کا بان بیر کی رتھ
رات چمپاکلی انگوٹھی نتھ
دن ہے طوفان جنبش و رفتار
رات میزان کاکل و رخسار
آفتاب و شراب ہیں بیری
بوتلیں دن کو ہیں پچھل پیری
کر نہ پامال حرمت اوقات
رات کو دن بنا نہ دن کو رات
پی مگر صرف شام کے ہنگام
اور وہ بھی بہ قدر یک دو جام
وہی انساں ہے خرم و خورسند
جو ہے مقدار و وقت کا پابند
میرے پینے ہی پر نہ جا مری جاں
مجھ سے جینا بھی سیکھ ہیں قرباں
اس کے پینے میں رنگ آتا ہے
جس کو جینے کا ڈھنگ آتا ہے
یہ نصائح بہت ہیں بیش بہا
جلد سو جلد جاگ جلد نہا
باغ میں جا طلوع سے پہلے
تا نگار سحر سے دل بہلے
سرو و شمشاد کو گلے سے لگا
ہر چمن زاد کو گلے سے لگا
منہ اندھیرے فضائے گلشن دیکھ
ساحل و سبزہ زار و سوسن دیکھ
گاہ آوارہ ابر پارے دیکھ
ان کی رفتار میں ستارے دیکھ
جیسے کہرے میں تاب روئے نکو
جیسے جنگل میں رات کو جگنو
گل کا منہ چوم اک ترنم سے
نہر کو گدگدا تبسم سے
جسم کو کر عرق سے نم آلود
تاکہ شبنم پڑھے لہک کے درود
پھینک سنجیدگی کا سر سے بار
ناچ اچھل دندنا چھلانگیں مار
دیکھ آب رواں کا آئینہ
دوڑ ساحل پہ تان کر سینہ
مست چڑیوں کا چہچہانا سن
موج نو مشق کا ترانہ سن
بوستاں میں صبا کا چلنا دیکھ
سبزہ و سرو کا مچلنا دیکھ
شبنم آلود کر سخن کا لباس
چکھ دھندلکے میں بوئے گل کی مٹھاس
شاعری کو کھلا ہوائے سحر
اس کا نفقہ ہے تیری گردن پر
رقص کی لہر میں ہو گم لب نہر
یوں ادا کر عروس شعر کا مہر
جذب کر بوستاں کے نقش و نگار
ذہن میں کھول مصر کا بازار
نرم جھونکوں کا آب حیواں پی
بوئے گل رنگ شبنمستاں پی
گن گنا کر نظر اٹھا کر پی
صبح کا شیر دغدغہ کر پی
تاکہ مجرے کو آئیں کل برکات
دولت جسم و علم و عقل و حیات
یہ نہ طعنہ نہ یہ الہنا ہے
ایک نکتہ بس اور کہنا ہے
غیبت نور ہو کہ کثرت نور
ظلمت تام ہو کہ شعلۂ طور
ایک سا ہے وبال دونوں کا
تیرگی ہے مآل دونوں کا
درخور صاحب مآل نہیں
ہر وہ شے جس میں اعتدال نہیں
شادمانی سے پی نہیں سکتا
جس کو ہوکا ہو جی نہیں سکتا
اے پسر اے برادر اے ہم راز
بن نہ اس طرح دور کی آواز
کوئی بیمار تن نہیں سکتا
خادم خلق بن نہیں سکتا
خدمت خلق فرض ہے تجھ پر
دور ماضی کا قرض ہے تجھ پر
عصر حاضر کے شاعر خوددار
قرض داری کی موت سے ہشیار
ذہن انسانیت ابھار کے جا
زندگانی کا قرض اتار کے جا
تجھ پہ ہندوستان ناز کرے
عمر تیری خدا دراز کرے

جوش ملیح آبادی
نظم

تازہ دم بھی ہوں مگر پھر یہ تقاضا کیوں ہے
ہاتھ رکھ دے مرے ماتھے پہ کوئی زہرہ جبیں
ایک آغوش حسیں شوق کی معراج ہے کیا
کیا یہی ہے اثر نالۂ دل ہائے حزیں

اسرار الحق مجاز
نظم

مجھے شکوہ نہیں دنیا کی ان زہرہ جبینوں سے
ہوئی جن سے نہ میرے شوق رسوا کی پذیرائی

اسرار الحق مجاز
نظم

رات داڑھی کے اندھیرے سے تکلف برتے
عرش کے سامنے رسوائی کی گردن نہ اٹھے
اذن سجدہ پہ کمر تختہ نہ ہو جائے کہیں
کھوکھلے لفظوں میں لوہا تو نہیں بھر سکتے
سیکڑوں سال کی تبلیغ کے چالیس ثمر
کشتی بن جائے تو تنور سے پانی ابلے
سالہا سال سے آرام نتیجہ مطلوب
تین سو ساٹھ صنم خانۂ کعبہ سے چلے
ریگ زاروں میں غبار اور کھجوری سائے
اونٹ کی آنکھ میں تشہیر ہوا درد سفر
کوئی ہندہؔ سے کہے دانت کہاں ہیں تیرے
فتح مکہ سے مگر لوگ ہدایت پائیں
خون جم جائے جو نعلین میں چلتے چلتے
عرش کی آنکھ سے رحمت کا سمندر ابلے
جبرئیل اپنی ہیئت میں ہیں نمائش منظر
پاؤں پاتال میں سر چرخ سے ٹکرائے کہیں
پر جو کھولے تو ہر اک سمت پہ پردے لٹکیں
اور جلتا ہوا سورج ابھی کھو جائے کہیں
قافلہ آیا ہے بو بکرؔ سے منسوب مگر
مال تقسیم ہوا دامن حاجت منداں
نور کندھے پہ اٹھائے شب ہجرت کے سفیر
غار میں ساتھ رہے پاس ہی پیوند ہوئے
مسجد نبوی میں انبار غنیمت روشن
لوگ روتے ہوئے نکلے ہیں پریشاں منظر
روشنی پہنچی ابو جہلؔ کی دیواروں تک
گھر کی تاریکی میں رستہ نہ بنے بینائی
پیڑ کے سائے کی پہچان یہودی راہب
رک گیا آب رواں بیوہ کے دروازے پر
دست زہرا میں نشانات عیاں چکی سے
علم کے باب علیؔ عمر میں سب سے چھوٹے
چاند کا نام ترے چاک گریبانوں میں
مبتدی ڈھونڈتے ہیں مسجد اقصیٰ میں امام
سدرۃ المنتہیٰ جبریل اجازت مانگے
کون تھا کس نے پکارا کہ چلے بھی آؤ
کون موجود تھا پہلے سے وہاں کون گیا
کون سنتا تھا وہاں کس نے پکارا کس کو
کس کی آواز کی تنویر سے عالم چمکے
سربلندی تھی مقدر میں قلم سے پہلے
بکریاں کون حلیمہؔ کی چرانے جائے
آمنہؔ بطن سے اظہار ہے آدم کا عروج
مجتمع کس نے کیا لوگوں کو پربت کے قریب
کس نے للکارا ضلالت کو مسلسل تنہا
جو کی روٹی کبھی مل جائے کبھی فاقہ کشی
بھوک سے پیٹ پہ پتھر کبھی باندھے کس نے
تین سو تیرہ کی تعداد ہے کس گنتی میں
فکر پہ دائرہ کن خندقیں کھودی جائیں
دور کی دھوپ میں ہے فیصلہ کن راہ تبوک
حنظلہؔ سامنے آ جائیں جو چھٹ جائے غبار
میں نے پہنچا دیا تم تک جو مجھے پہنچا تھا
میں نے پہنچا دیا تم تک جو مجھے پہنچا تھا
میں نے پہنچا دیا تم تک جو مجھے پہنچا تھا
کوئی پردیسی ہے خیمے پہ پریشاں صورت
اور فاروقؔ چلے بیوی کو ہمراہ لیے
فاصلے توڑ کر آواز کے سائے پھیلے
حاکم وقت کا کرتا کئی پیوند لگا
بکریاں جس سے سنبھالی نہیں جاتیں تھیں کبھی
نصف دنیا پہ خلافت کے علم لہرائے
یاد ہے صاحبو خیبر کو اکھاڑا کس نے
کس کی تلوار تھی آئینہ زمانے کے لیے
کس نے زرخیز شجاعت کے ستارے بوئے
جان دی جاوداں لمحات تلاوت مشغول
خون کے دھبے ہیں قرآن پہ تابندہ نظر

عادل منصوری
نظم

میں کہ مے خانۂ الفت کا پرانا مے خوار
محفل حسن کا اک مطرب شیریں گفتار
ماہ پاروں کا ہدف زہرہ جبینوں کا شکار
نغمہ پیرا و نواسنج و غزل خواں ہوں میں

اسرار الحق مجاز
نظم

بچھڑ کے تجھ سے کئی اجنبی دیاروں نے
مجھے گلے سے لگایا مجھے تسلی دی
مجھے بتائے شب تیرہ و سیاہ کے راز
مرے بدن کو سکھائے ہزار استلذاذ
کچھ اس طرح مرے پہلو میں آئے زہرہ و شمس
میں مدتوں یہی سمجھا کیا کہ جسم کا لمس
ازل سے تا بہ ابد ایک ہی مسرت ہے
کہ سب فریب ہے میرا بدن حقیقت ہے
اور اس طرح بھی ہوا ہے کہ میری تنہائی
سمندروں سے لپٹ کر ہوا سے ٹکرا کر
کبھی سمیٹ کے مجھ کو نئے جزیروں میں
کبھی پہاڑ کے جھرنے کی طرح بکھرا کر
کبھی بٹھا کے مجھے آسماں کے دوش بدوش
کبھی زمیں کی تہوں میں جڑوں میں پھیلا کر
کچھ اس طرح مرے احساس میں سمائی ہے
کہ مجھ کو ذات سے باہر نکال لائی ہے
کچھ ایسا خواب سا نا خوابیاں سی طاری تھیں
بدن تو کیا مجھے پرچھائیاں بھی بھاری تھیں

مصطفی زیدی
نظم

سنا کے ہولی جو زہرہ بجاتی ہے طبنور
تو اس کے راگ سے بارہ بروج ہیں معمور
چھوؤں ستاروں کے اوپر پڑا ہے رنگ کا نور
سبھوں کے سر پہ یہ ہر دم پکارتی ہے حور

نظیر اکبرآبادی
نظم

ہائے وہ پہلی نظر وہ اس کی آنکھوں کے پیام
وہ لجا کر مسکرا کر دست نازک سے سلام
ہر نظر میں میکدے غلطاں وہ چنچل بانکپن
رنگ گلشن بھی تصدق یوں سراپا گل بدن
سر پہ جھومر پاؤں میں پازیب اک زہرہ خصال
اور مجسم کہکشاں اس کے دوپٹے کا جمال
برق کی تصویر کل شانوں پہ لرزاں چوٹیاں
مرمریں ہاتھوں میں اپنی دھن میں گاتی چوڑیاں
کان میں بندے سراپا آفتاب و ماہتاب
پردہ داری کیا کہوں رخ پر تجلی کی نقاب
چال میں آہو کی شوخی چال میں بدمستیاں
ہر قدم پر انقلاب‌ دہر کی رنگینیاں
ہر تکلم اک قیامت ہر تبسم برق ریز
اور جس کی سادگی بھی اک فسانہ حشر خیز
با تکلف با ادب صد ناز وہ جنت بدوش
ایک دن آئی مری پرسش کو وہ نکہت فروش
آنکھوں آنکھوں میں دیا پیغام عشق و بے خودی
زندگانی اک شراب تند بن کر رہ گئی
تھی وہ دزدیدہ نگاہ دلستاں میرے لئے
آ گیا تھا میرے گھر ہی گلستاں میرے لئے
جیسے مل جائے خدائی اس طرح مسرور تھا
گھر کی رونق کیا کہوں اس وقت کا اک طور تھا
وہ تحیر خیز وہ کافر نظارے الاماں
شوق محکم الاماں مبہم اشارے الاماں
میری جانب دیکھ کر ہنس ہنس کے شرماتی رہی
نکہت گیسو سے اک اک سانس مہکاتی رہی
نیچی نظروں سے وہ کچھ کہنا بہ عنوان حیا
آپ کب تشریف لائیں گے یہ اس کی التجا
کیا کہوں کیسے کہوں رہ رہ کے یہ سوچا کیا
جب نہ کچھ بھی بن پڑا تو درد میں ڈوبا کیا
یاس سے اٹھی نظر آنسو بہا کر رہ گئی
اور زبان حال آخر لڑکھڑا کر رہ گئی
الغرض ہونے لگی رخصت وہ جان آرزو
اشک برسانے لگا آخر جہان آرزو
اس کا جانا تھا کہ ویراں ہو گئی میری نظر
لے گئی ہم راہ اپنے رونق دیوار و در
کس قدر رنگین تھی فطرت کی نقاشی نہ پوچھ
شوخیاں کرتی ہوئی تاروں کی شہزادی نہ پوچھ

حسرتؔ جے پوری
نظم

سر پر اک پیتل کی گاگر زہرہ کو شرمائے
شوق پا بوسی میں جس سے پانی چھلکا جائے
پریم کا ساگر بوندیں بن کر جھوما امڈا آئے
سر سے برسے اور سینے کے درپن کو چمکائے
اس درپن کو جس سے جوانی جھانکے اور شرمائے
آئی پنگھٹ کی دیوی وہ پنگھٹ کی رانی

ساغر نظامی
نظم

ذکر جس کا زہرہ و پروین کے کاشانے میں ہے
وہ صنم بھی آج اپنے ہی صنم خانے میں ہے

اسرار الحق مجاز
نظم

فطرت کے پجاری کچھ تو بتا کیا حسن ہے ان گلزاروں میں
ہے کون سی رعنائی آخر ان پھولوں میں ان خاروں میں
وہ خواہ سلگتے ہوں شب بھر وہ خواہ چمکتے ہوں شب بھر
میں نے بھی تو دیکھا ہے اکثر کیا بات نئی ہے تاروں میں
اس چاند کی ٹھنڈی کرنوں سے مجھ کو تو سکوں ہوتا ہی نہیں
مجھ کو تو جنوں ہوتا ہی نہیں جب پھرتا ہوں گلزاروں میں
یہ چپ چپ نرگس کی کلیاں کیا جانے کیسی کلیاں ہیں
جو کھلتی ہیں، جو ہنستی ہیں اور پھر بھی ہیں بیماروں میں
یہ لال شفق یہ لالہ و گل اک چنگاری بھی جن میں نہیں
شعلے بھی نہیں گرمی بھی نہیں ان تیرے آتش زاروں میں
اس وقت کہاں تو ہوتا ہے جب موسم گرما کا سورج
دوزخ کی تپش بھر دیتا ہے دریاؤں میں کہساروں میں
جاڑے کی بھیانک راتوں میں وہ سرد ہواؤں کی تیزی
ہاں وہ تیزی وہ بے مہری جو ہوتی ہے تلواروں میں
دریا کے تلاطم کا منظر ہاں تجھ کو مبارک ہو لیکن
اک ٹوٹی پھوٹی کشتی بھی چکراتی ہے منجدھاروں میں
کوئل کے رسیلے گیت سنے لیکن یہ کبھی سوچا تو نے
ہیں الجھے ہوئے نغمے کتنے اک ساز کے ٹوٹے تاروں میں
بادل کی گرج بجلی کی چمک بارش میں وہ تیزی تیروں کی
میں ٹھٹھرا سمٹا سڑکوں پر تو جام بہ لب مے خواروں میں
سب ہوش و خرد کے دشمن ہیں سب قلب و نظر کے رہزن ہیں
رکھا ہے بھلا کیا اس کے سوا ان راحت جاں مہ پاروں میں
وہ لاکھ ہلالوں سے بھی حسیں کیسی زہرہ کیسی پرویں
اک روٹی کا ٹکڑا جو کہیں مل جائے مجھے بازاروں میں
جب جیب میں پیسے بجتے ہیں جب پیٹ میں روٹی ہوتی ہے
اس وقت یہ ذرہ ہیرا ہے اس وقت یہ شبنم موتی ہے

معین احسن جذبی
نظم

حسب نسب ہے نہ تاریخ و جائے پیدائش
کہاں سے آیا تھا مذہب نہ ولدیت معلوم
مقامی چھوٹے سے خیراتی اسپتال میں وہ
کہیں سے لایا گیا تھا وہاں یہ ہے مرقوم
مریض راتوں کو چلاتا ہے ''مرے اندر
اسیر زخمی پرندہ ہے اک، نکالو اسے
گلو گرفتہ ہے یہ حبس دم ہے خائف ہے
ستم رسیدہ ہے مظلوم ہے بچا لو اسے''
مریض چیختا ہے درد سے کراہتا ہے
یہ وتنام، کبھی ڈومنیکن، کبھی کشمیر
زر کثیر، سیہ قومیں، خام معدنیات
کثیف تیل کے چشمے، عوام، استحصال
زمیں کی موت بہائم، فضائی جنگ، ستم
اجارہ داری، سبک گام، دل ربا، اطفال
سرود و نغمہ، ادب، شعر، امن، بربادی
جنازہ عشق کا، دف کی صدائیں، مردہ خیال
ترقی، علم کے گہوارے، روح کا مدفن
خدا کا قتل، عیاں زیر ناف زہرہ جمال
تمام رات یہ بے ربط باتیں کرتا ہے
مریض سخت پریشانی کا سبب ہے یہاں
غرض کہ جو تھا شکایت کا ایک دفتر تھا
نتیجہ یہ ہے اسی روز منتقل کرکے
اسے اک اور شفا خانے کو روانہ کیا
سنا گیا ہے وہاں نفسیات کے ماہر
طبیب حاذق و نباض ڈاکٹر کتنے
طلب کیے گئے اور سب نے اتفاق کیا
یہ کوئی ذہنی مرض ہے، مریض نے شاید
کبھی پرندہ کوئی پالا ہوگا لیکن وہ
عدم توجہی یا اتفاق سے یونہی
بچارہ مر گیا اس موت کا اثر ہے یہ
عجیب چیز ہے تحت شعور انساں کا
یہ اور کچھ نہیں احساس جرم ہے جس نے
دل و دماغ پہ قبضہ کیا ہے اس درجہ
مریض قاتل و مجرم سمجھتا ہے خود کو!
کسی کی رائے تھی پسماندہ قوم کا اک فرد
مریض ہوگا اسی واسطے سیہ قومیں
غریب کے لیے اک ٹیبو بن گئیں افسوس
کوئی یہ کہتا تھا یہ اصل میں ہے حب وطن
مریض چاہتا تھا ہم کفیل ہوں اپنے
کسی بھی قوم کے آگے نہ ہاتھ پھیلائیں
یہیں پہ تیل کے چشمے ہیں، وہ کریں دریافت!
گمان کچھ کو تھا یہ شخص کوئی شاعر ہے
جو چاہتا تھا جہاں گردی میں گزارے وقت
حسین عورتیں مائل ہوں لطف و عیش رہے
قلم کے زور سے شہرت ملے زمانے میں
زر کثیر بھی ہاتھ آئے اس بہانے سے
مگر غریب کی سب کوششیں گئیں ناکام
شکست پیہم و احساس نارسائی نے
یہ حال کر دیا مجروح ہوگئے اعصاب
غرض کہ نکتہ رسی میں گزر گیا سب وقت
وہ چیختا ہی رہا درد کی دوا نہ ملی
نشست بعد نشست اور معائنے شب و روز
انہیں میں وقت گزرتا گیا شفا نہ ملی
پھر ایک شام وہاں سرمہ در گلو آئی
جو اس کے واسطے گویا طبیب حاذق تھی
کسی نے پھر نہ سنی درد سے بھری آواز
کراہتا تھا جو خاموش ہو گیا وہ ساز

اختر الایمان
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے